കുവൈറ്റ് സിറ്റി: കുവൈറ്റിലെ ഇന്ത്യന് നയതന്ത്ര ചരിത്രത്തില് പുതിയൊരു അധ്യായം. ഇന്ത്യയുടെ ഇരുപതാമത് അംബാസഡറായി നിയമിതയായ പരമിത ത്രിപതി കുവൈറ്റ് അമീറിന് വിശ്വാസപത്രം സമര്പ്പിച്ചു. കുവൈറ്റിലെ ഇന്ത്യയുടെ അംബാസഡര് പദവിയിലെത്തുന്ന ആദ്യ വനിതയാണ് ഇവര്.
രാവിലെ ബയാന് കൊട്ടാരത്തില് നടന്ന ഔദ്യോഗിക ചടങ്ങില് കുവൈറ്റ് അമീര് ഹിസ് ഹൈനസ് ഷെയ്ഖ് മെഷാല് അല്-അഹമ്മദ് അല്-ജാബര് അല്-സബാഹിനാണ് അവര് വിശ്വാസപത്രം കൈമാറിയത്. കൊട്ടാരത്തില് എത്തിയ അംബാസഡര്ക്ക് സൈന്യം ഗാര്ഡ് ഓഫ് ഓണര് നല്കി ആദരിച്ചു.
പുതിയ അംബാസഡറെ ഊഷ്മളമായി സ്വാഗതം ചെയ്ത അമീര്, ഇന്ത്യയും കുവൈറ്റും തമ്മിലുള്ള നൂറ്റാണ്ടുകള് പഴക്കമുള്ള സൗഹൃദവും സാംസ്കാരിക ബന്ധവും സ്മരിച്ചു. ഉഭയകക്ഷി സഹകരണം കൂടുതല് മേഖലകളിലേക്ക് വ്യാപിപ്പിക്കാന് കുവൈറ്റ് താല്പര്യപ്പെടുന്നതായും അദ്ദേഹം വ്യക്തമാക്കി.
ഇന്ത്യന് രാഷ്ട്രപതി ദ്രൗപതി മുര്മു, പ്രധാനമന്ത്രി നരേന്ദ്രമോദി എന്നിവരുടെ പ്രത്യേക ആശംസകള് അംബാസഡര് അമീറിനെ അറിയിച്ചു. കുവൈറ്റിലെ പത്തുലക്ഷത്തോളം വരുന്ന ഇന്ത്യന് പ്രവാസികള് ഇരുരാജ്യങ്ങളെയും ബന്ധിപ്പിക്കുന്ന ‘ജീവനുള്ള പാലമാണെന്ന്’ അംബാസഡര് വിശേഷിപ്പിച്ചു.
പ്രവാസി സമൂഹത്തിന് കുവൈറ്റ് നല്കിവരുന്ന പിന്തുണയ്ക്ക് അവര് പ്രത്യേകം നന്ദി രേഖപ്പെടുത്തി. വ്യാപാരം, ഊര്ജ്ജം, പ്രതിരോധം, ആരോഗ്യം, സാങ്കേതികവിദ്യ തുടങ്ങിയ മേഖലകളില് ഇന്ത്യ-കുവൈറ്റ് തന്ത്രപരമായ പങ്കാളിത്തം ഉറപ്പാക്കുമെന്ന് അംബാസഡര് പറഞ്ഞു.
ഇന്ത്യയും കുവൈറ്റും തമ്മിലുള്ള നയതന്ത്ര ബന്ധം സ്ഥാപിതമായതിന്റെ 65-ാം വാര്ഷികം ആഘോഷിക്കുന്ന വേളയിലാണ് ഈ സുപ്രധാനമായ ചുമതലയേല്ക്കല് എന്നത് ശ്രദ്ധേയമാണ്.
