വാഷിങ്ടണ്: ആര്ട്ടെമിസ് 2 ചാന്ദ്രദൗത്യം വിജയകരമായി പൂര്ത്തിയാക്കി ബഹിരാകാശ യാത്രികര് ഭൂമിയിലേക്കുള്ള മടക്കയാത്ര ആരംഭിച്ചു. ചന്ദ്രനെ വലംവെച്ച് ചരിത്രനേട്ടം കൈവരിച്ച ഓറിയോണ് പേടകം സുരക്ഷിതമായി ഭൂമിയില് തിരിച്ചിറക്കാനുള്ള തയാറെടുപ്പിലാണ് ശാസ്ത്രലോകം.
നാസ പുറത്തുവിട്ട റിപ്പോര്ട്ടുകള് പ്രകാരം, യുഎസ് സമയം ഏപ്രില് 10ന് രാത്രി അല്ലെങ്കില് ഭാരത സമയം ഏപ്രില് 11ന് പുലര്ച്ചെ പേടകം സുരക്ഷിതമായി ഭൂമിയിലിറങ്ങും. യാത്രാപഥത്തിലെ സങ്കീര്ണമായ തിരുത്തലുകള് ഉള്പ്പെടെ എല്ലാ ഘട്ടങ്ങളും പൂര്ത്തിയാക്കിയ ശേഷമാണ് യാത്രികര് മടക്കയാത്ര തുടങ്ങിയത്. ഭൂമിയില് നിന്ന് ഏകദേശം 2,00,000 നോട്ടിക്കല് മൈല് അകലെയായിരിക്കെ, ചരിത്രത്തിലാദ്യമായി ഒരു ചാന്ദ്രദൗത്യ പേടകം അന്താരാഷ്ട്ര ബഹിരാകാശ നിലയവുമായി ഷിപ്പ് ടു ഷിപ്പ് കോള് നടത്തിയെന്ന അപൂര്വ നേട്ടവും ആര്ട്ടെമിസ് 2 ഇതിനകം സ്വന്തമാക്കി.
ഓറിയോണ് പേടകം ഇനി നേരിടാന് പോകുന്ന ഏറ്റവും വെല്ലുവിളി നിറഞ്ഞ ഘട്ടമാണ് ഭൂമിയുടെ അന്തരീക്ഷത്തിലേക്കുള്ള പുനഃപ്രവേശനം (റീ-എന്ട്രി). ഭൂമിയുടെ അന്തരീക്ഷത്തിലേക്ക് പ്രവേശിക്കുമ്പോള് അനുഭവപ്പെടുന്ന അതിശക്തമായ വായുഘര്ഷണം (അറ്റ്മോസ്ഫെറിക് (ഫ്രിക്ഷന്) മൂലം പേടകത്തിന് ചുറ്റും ഏകദേശം 2,800 ഡിഗ്രി സെല്ഷ്യസ് വരെ ചൂട് ഉയരും.
കൊടുംചൂടില് നിന്ന് പേടകത്തെയും യാത്രികരെയും സംരക്ഷിക്കുന്നത് ഓറിയോണിലെ അത്യാധുനിക ഹീറ്റ് ഷീല്ഡുകളാണ്. അന്തരീക്ഷത്തില് പ്രവേശിച്ച് സമുദ്രത്തില് പതിക്കുന്നത് വരെയുള്ള 20 മിനിറ്റുകളാണ് ദൗത്യത്തിലെ ഏറ്റവും നിര്ണായക സമയം. ഈ ഘട്ടത്തില് പേടകവുമായുള്ള ആശയവിനിമയം താത്ക്കാലികമായി തടസപ്പെടാന് സാധ്യതയുണ്ട്. പസഫിക് സമുദ്രത്തിലാണ് പേടകം ഇറങ്ങുകയെന്ന് നാസ വ്യക്തമാക്കി. നിലവില് പേടകത്തിലെ എല്ലാ സംവിധാനങ്ങളും തൃപ്തികരമാണെന്നും യാത്രികര് ആരോഗ്യവാന്മാരാണെന്നും നാസ വക്താക്കള് അറിയിച്ചു.
