തിരുവനന്തപുരം: പൗരാണികമായ സനാതന ധര്മ്മത്തിന്റെ അടിസ്ഥാന തത്വങ്ങള് വളര്ന്നുവരുന്ന തലമുറകളിലേക്ക് പകര്ന്നു നല്കുന്നതിനും ഭാരതീയ സംസ്കാരവും ആചാരാനുഷ്ഠാനങ്ങളുടെ ശാസ്ത്രീയതയും മനസിലാക്കിക്കുന്നതിനുമായി ചെമ്പഴന്തി അണിയൂര് ദുര്ഗ്ഗാഭഗവതീക്ഷേത്രത്തില് വേദാന്ത സംസ്കൃത മതപാഠശാലയും ഗ്രന്ഥശാലയും ഭക്തജനങ്ങളുടെ ആധ്യാത്മികസമിതിയും ആരംഭിച്ചു. ക്ഷേത്രത്തിലെ ലൈബ്രറി ഹാളില് നടന്ന ചടങ്ങിന്റെ ഉദ്ഘാടനം ചേങ്കോട്ടുകോണം ശ്രീരാമദാസ ആശ്രമത്തിലെ സ്വാമി യോഗാനന്ദ സരസ്വതി നിര്വഹിച്ചു.
ആദ്ധ്യാത്മിക സമിതി പ്രസിഡന്റ് സി.രാജേന്ദ്രന് പിള്ളയുടെ അധ്യക്ഷതയില് ചേര്ന്ന യോഗത്തില് തിരുവിതാംകൂര് ദേവസ്വംബോര്ഡ് മതപാഠശാല കണ്വീനര് തച്ചപ്പള്ളി വി.ശശിധരന് നായര് മുഖ്യപ്രഭാഷണം നിര്വഹിച്ചു. അണിയൂര് ദേവസ്വം സബ്ഗ്രൂപ്പ് ഓഫീസര് ജെ.വിഷ്ണു പ്രകാശ്, ആദ്ധ്യാത്മിക സമിതിയുടെ രക്ഷാധികാരി എസ്.ഗോപാലകൃഷ്ണന് നായര്, സമിതി പ്രസിഡന്റ് ഹരികുമാര്.എസ്.എസ് എന്നിവര് ആശംസാപ്രസംഗം നിര്വഹിച്ചു. ആര്.ശ്രീലത, വി.ഉദയകുമാര് യദുകുലം തുടങ്ങിയവര് സംസാരിച്ചു.
