തിരുവനന്തപുരം: കേരളത്തിലെ മുതിര്‍ന്ന മാധ്യമപ്രവര്‍ത്തകന്‍
കെ.കുഞ്ഞിക്കണ്ണന്‍ നിര്യാതനായി. 72 വയസ്സായിരുന്നു. ജന്മഭൂമിയുടെ ആരംഭം മുതല്‍ പത്രപ്രവര്‍ത്തനത്തില്‍ പ്രവേശിച്ചു. ഔദ്യോഗികമായി വിരമിച്ച ശേഷവും ഇപ്പോള്‍ തിരുവനന്തപുരത്ത് റസിഡന്റ് എഡിറ്ററായിരുന്നു. 50 വര്‍ഷമായി, ജന്മഭൂമിയുടെ തുടക്കം മുതല്‍ പത്രപ്രവര്‍ത്തകനായി തുടര്‍ന്നു. സംസ്‌കാരം ഇന്ന് വൈകിട്ട് നാലിന് ശാന്തികവാടത്തില്‍.
തിങ്കളാഴ്ച (07-09-2026) വൈകിട്ട് വീട്ടില്‍ വീണു. രാത്രിയോടെ ബോധക്ഷയമുണ്ടായി ആശുപത്രിയില്‍ പ്രവേശിപ്പിച്ചു. ഇന്നു രാവിലെയായിരുന്നു അന്ത്യം.
1968-ലെ തളിപ്പറമ്പില്‍ ഗുരുജി ഗോള്‍വാള്‍ക്കര്‍ പങ്കെടുത്ത ആര്‍ എസ് എസ് ശിബിരത്തില്‍ പങ്കെടുത്തു. ഉറച്ച സ്വയം സേവകനായിമാറി. ഹൈസ് കൂള്‍ വിദ്യാഭ്യാസത്തിനുശേഷം ഭാരതീയ ജനസംഘത്തിന്റെമുഴുവന്‍ സമയ പ്രവര്‍ത്ത കനായി കാസര്‍കോട്, കണ്ണൂര്‍ താലൂക്കുകളില്‍ പ്രവര്‍ത്തിച്ചു.
അടിയന്തരാവസ്ഥയ്ക്കു ശേഷം യുവജനത കണ്ണൂര്‍ ജില്ലാ സെക്രട്ടറി, സംസ്ഥാന സമിതിയംഗം യുവമോര്‍ച്ച സംസ്ഥാന പ്രസിഡണ്ട് എന്നീ നിലകളില്‍ പ്രവര്‍ത്തിച്ചു. യുവമോര്‍ച്ചയുടെ ആദ്യത്തെ ജനറല്‍ സെക്രട്ടറി ആയിരുന്നു. പേരാവൂര്‍, കണ്ണൂര്‍ നിയോ ജകമണ്ഡലങ്ങളില്‍ ബിജെപി സ്ഥാനാര്‍ത്ഥിയായി മത്സരിച്ചിട്ടുണ്ട്. ദീര്‍ഘകാലമായി ബിജെപി സംസ്ഥാന സമിതിയംഗം, മീഡിയ കണ്‍വീനര്‍, കേരള പത്രപ്രവര്‍ത്തക യൂണിയന്‍ സംസ്ഥാന വൈസ് പ്രസിഡണ്ട്, തിരുവനന്തപുരം ജില്ലാ പ്രസിഡണ്ട്, കേസരി സ്മാരക ജേര്‍ണലിസ്റ്റ് ട്രസ്റ്റ് ചെയര്‍മാന്‍, കണ്ണൂര്‍ പ്രസ്സ് ക്ലബ്ബ് സെക്രട്ടറി, ഫിലിം സെന്‍ സര്‍ ബോര്‍ഡ് അംഗം, ടെലികോം അഡൈ്വസറി ബോര്‍ഡ് അംഗം, പത്രപ്രവര്‍ത്തക അക്രഡിറ്റേഷന്‍ കമ്മിറ്റി അംഗം എന്നീ സ്ഥാനങ്ങള്‍ വഹിച്ചു.
കെ.ജി. മാരാരുടെ ജീവ ചരിത്രം (കെ.ജി.മാരാര്‍ ഒരു സ്‌നേഹ സാഗരം, കെ.പി. മാരാര്‍ മനുഷ്യപ്പറ്റിന്റെ പര്യായം), മറുപുറം, അടല്‍ജി എന്ന വിസ്മയം, കേരളത്തിലെ രാഷ്ട്രീയ ചരിത്രം എന്നീ പുസ്തകങ്ങള്‍ രചിച്ചു. മുതിര്‍ന്ന പത്രപ്രവര്‍ത്തകനുള്ള കേരള നിയമസഭയുടെ ആദരം ലഭിച്ചിട്ടുണ്ട്. കൂടാതെ ബി.കെ. ശേഖര്‍ പുരസ്‌കാരം, കാഞ്ഞങ്ങാട് തപസ്യ പുരസ്‌കാരം, ഗുരുജി സേവാസമിതി പുരസ്‌കാരം എന്നിവയും ലഭിച്ചിട്ടുണ്ട്.
കണ്ണൂര്‍ ജില്ലയിലെ ഇരിക്കൂര്‍ കുട്ടാവ് ഗ്രാമത്തിലാണ് 1954-ല്‍ ജനിച്ചത്. ഇപ്പോള്‍ തിരുവനന്തപുരത്തായിരുന്നു സ്ഥിരതാമസം. ഭാര്യ: പരേതയായ പ്രേമജ. മക്കള്‍: പ്രകുല (ഏഷ്യാനെറ്റ്), മഞ്ഞില. മരുമകന്‍: രതീഷ് (മാതൃഭൂമി ന്യൂസ്). പേരമക്കള്‍: ഗൗതമി, ബാലാമണി.
പൊതുദര്‍ശനം
രാവിലെ 8 മണി മുതല്‍ 11 വരെ ഭൗതികശരീരം തൈക്കാട്ട് ജന്മഭൂമി ഓഫീസില്‍ പൊതുദര്‍ശനത്തിന് വയ്ക്കും. തുടര്‍ന്ന് 11 മണി മുതല്‍ ഒരു മണിക്കൂര്‍ തരുവനന്തപുരം പ്രസ് ക്ലബ്ബിലും. 12 മണിക്ക് തിരുമലയിലെ വീട്ടില്‍ എത്തിക്കും. (പ്രകുലം, എവിആര്‍എ ബി 4, വടകര നഗര്‍, അരയല്ലൂര്‍, തിരുമല). അന്ത്യകര്‍മ്മങ്ങള്‍ക്കു ശേഷം നാലു മണിക്ക് ശാന്തികവാടത്തില്‍ സംസ്‌കരിക്കും.
