തിരുവനന്തപുരം: 2013ലെ ദേശീയ ഭക്ഷ്യസുരക്ഷാനിയമം കേരളത്തില് നടപ്പാക്കേണ്ട സമയപരിധി ഒക്ടോബര് 10ന് തീരുന്ന സാഹചര്യത്തില് ഇതു നടപ്പാക്കുന്നതിനുള്ള വിവിധ തീരുമാനങ്ങള് മന്ത്രിസഭായോഗം കൈക്കൊണ്ടു. നിലവിലുള്ള എഎവൈ വിഭാഗങ്ങള്, ബിപിഎല് കാര്ഡുള്ള കുടുംബങ്ങള്, ബിപിഎല് കാര്ഡില്ലെങ്കിലും ബിപിഎല് പട്ടികയിലുളള കുടുംബങ്ങള് എന്നിവരെ ഉള്പ്പെടുത്തി മുന്ഗണനാ പട്ടിക തയാറാക്കി പുതിയ താത്ക്കാലിക റേഷന് കാര്ഡുകള് അനുവദിക്കുന്നതാണ്. ഇതുപ്രകാരം ഏകദേശം 54 ലക്ഷം പേര് കൂടി മുന്ഗണനാ പട്ടികയില് വരും.
നിലവില് 27.57 ലക്ഷം എഎവൈ, 73.08 ലക്ഷം ബിപിഎല് വിഭാഗങ്ങളാണുള്ളത്. ലിസ്റ്റ് വിപുലീകരിക്കുമ്പോള് 154.8 ലക്ഷം പേര് മുന്ഗണനാ പട്ടികയില് വരും. സംസ്ഥാനത്ത് ഇപ്പോള് ബിപിഎല് വിഭാഗക്കാര്ക്ക് നല്കിവരുന്ന സബ്സിഡി നിരക്ക് എല്ലാ മുന്ഗണനാ വിഭാഗക്കാര്ക്കും അനുവദിക്കും. ബിപിഎല് അരി ഒരു രൂപയ്ക്കും ഗോതമ്പ് രണ്ട് രൂപയ്ക്കുമാണ് നല്കുന്നത്. ഇത് 54 ലക്ഷം പേര്ക്കു കൂടി ലഭിക്കും. മുന്ഗണനാ പട്ടികയില് ഉള്പ്പെടാത്ത എപിഎല് (എസ്.എസ്- സംസ്ഥാന സബ്സിഡി) വിഭാഗക്കാര്ക്ക് നിലവിലുള്ള സബ്സിഡി നിരക്കില് ഭക്ഷ്യധാന്യം വിതരണം ചെയ്യും. എപിഎല് (എസ്.എസ്) വിഭാഗത്തില് 42 ലക്ഷം കാര്ഡുകളാണുള്ളത്. ഇവര്ക്ക് രണ്ടു രൂപ നിരക്കിലാണ് അരിയും ഗോതമ്പും നല്കുന്നത്. മുന്ഗണനാ വിഭാഗത്തിലും എപിഎല് (എസ്.എസ്) വിഭാഗത്തിലും ഇല്ലാത്ത മുഴുവന് എപിഎല് കാര്ഡ് ഉടമകള്ക്കും (179 ലക്ഷം) നിലവിലുള്ള നിരക്കില് ഭക്ഷ്യധാന്യം നല്കുന്നത് തുടരും. ഇവര്ക്ക് 8.90 രൂപയ്ക്ക് അരിയും 6.70 രൂപയ്ക്ക് ഗോതമ്പുമാണു നല്കുന്നത്.
