തിരുവനന്തപുരം: നഗരത്തില്‍ അനധികൃതപാര്‍ക്കിങ്ങിനെതിരെയുള്ള ജില്ലാഭരണകൂടത്തിന്റെ നടപടികള്‍ തുടരുന്നു. ഇന്നലെ (സെപ്‌തംബര്‍ 19) നഗരത്തിലെ വിവിധ സ്‌കൂളുകള്‍ക്കു സമീപം എഡിഎം വി ആര്‍ വിനോദിന്റെ നേതൃത്വത്തില്‍ ഉദേ്യാഗസ്ഥസംഘം പരിശോധന നടത്തി അനധികൃതപാര്‍ക്കിംഗ്‌ ഒഴിപ്പിച്ചു.
വഴുതയ്‌ക്കാട്‌ കാര്‍മല്‍ സ്‌കൂള്‍ പരിസരത്തും ക്രൈസ്റ്റ്‌ നഗര്‍ സ്‌കൂളിന്‌ സമീപം കെസ്റ്റണ്‍ റോഡിലും നന്തന്‍കോട്‌ ക്‌ളിഫ്‌ഹൗസിനു സമീപവുമാണ്‌ പരിശോധന നടന്നത്‌. സെപ്‌തംബര്‍ 18-ന് ജില്ലാ കളക്‌ടര്‍ ബിജു പ്രഭാകറിന്റെ നേതൃത്വത്തില്‍ കെസ്റ്റണ്‍ റോഡിലും ക്‌ളിഫ്‌ഹൗസിനു സമീപവും പരിശോധന നടത്തി രണ്ടു വാഹനങ്ങള്‍ പിടിച്ചെടുത്തിരുന്നു. ജില്ലാഭരണകൂടത്തിന്റെ ഈ നടപടികളെത്തുടര്‍ന്ന്‌ ഇന്നലെ സ്‌കൂള്‍ പരിസരങ്ങളില്‍ പാര്‍ക്ക്‌ ചെയ്‌ത വാഹനങ്ങള്‍ കുറവായിരുന്നു. കോട്ടണ്‍ഹില്‍ എല്‍ പി സ്‌കൂള്‍ പരിസരത്ത്‌ റോഡില്‍ പാര്‍ക്ക്‌ ചെയ്‌തിരുന്ന സ്‌കൂള്‍ ബസ്‌ മാറ്റിയിടണമെന്ന്‌ എഡിഎം സ്‌കൂള്‍ അധികൃതര്‍ക്ക്‌ നിര്‍ദേശം നല്‍കി. സ്‌കൂള്‍ വിദ്യാര്‍ത്ഥികളുമായി വരുന്ന വാഹനങ്ങള്‍ രാവിലെ കുട്ടികളെ ഇറക്കിക്കഴിഞ്ഞാല്‍ സ്‌കൂള്‍ വിടുന്നതുവരെ റോഡില്‍ തന്നെ പാര്‍ക്ക്‌ ചെയ്യുന്നത്‌ ഗതാഗതക്കുരുക്കും സമീപപ്രദേശത്തുള്ള വീട്ടുകാര്‍ക്ക്‌ ബുദ്ധിമുട്ടും ഉണ്ടാക്കുന്നതായി പരാതിയുയര്‍ന്നിരുന്നു. സ്ഥിരമായ പാര്‍ക്കിങ്‌ ഒഴിവാക്കണമെന്ന്‌ വാഹന ഉടമകള്‍ക്കും ഡ്രൈവര്‍മാരുടെ സംഘടനകള്‍ക്കും പലതവണ മുന്നറിയിപ്പ്‌ നല്‍കിയിട്ടും ഫലമുണ്ടാകാത്തതിനെത്തുടര്‍ന്നാണ്‌ നടപടി സ്വീകരിക്കാന്‍ ജില്ലാഭരണകൂടം തീരുമാനിച്ചത്‌, പോലീസിനും മോട്ടോര്‍ വാഹനവകുപ്പ്‌ ഉദേ്യാഗസ്ഥര്‍ക്കും പുറമേ റവന്യുഉദേ്യാഗസ്ഥരും എഡിഎമ്മിനൊപ്പമുണ്ടായിരുന്നു. പരിശോധന വരും ദിവസങ്ങളിലും തുടരും.
Discussion about this post