തിരുവനന്തപുരം: കണ്സ്യൂമര്ഫെഡിന്റെ പ്രവര്ത്തനങ്ങളെപ്പറ്റി സഹകരണ വകുപ്പുമന്ത്രിയുടെ അദ്ധ്യക്ഷതയില് ചേര്ന്ന യോഗം അവലോകനം നടത്തി. ത്രിവേണി യൂണിറ്റുകളുടെ വിറ്റുവരവ് നടപ്പുവര്ഷം 200 കോടി രൂപയിലധികരിക്കുമെന്നു സഹകരണ വകുപ്പ് മന്ത്രി സി.എന്.ബാലകൃഷ്ണന്റെ അധ്യക്ഷതയില് ചേര്ന്ന യോഗം വിലയിരുത്തി.
നഷ്ടത്തില് പ്രവര്ത്തിക്കുന്ന യൂണിറ്റുകള് ലാഭത്തിലാക്കും. പ്രവര്ത്തനക്ഷമമല്ലാത്തതും നഷ്ടത്തിലുളളതുമായവയുടെ പ്രവര്ത്തനം പുന:ക്രമീകരിക്കും. മൊബൈല് ത്രിവേണികളുടെ പ്രവര്ത്തനം ഊര്ജ്ജിതമാക്കി പ്രവര്ത്തനനഷ്ടം ഒഴിവാക്കും. കൂടുതല് ഇനം സബ്സിഡിയിതര സാധനങ്ങള് വില്പന നടത്തും. നീതി മെഡിക്കല് സ്റ്റോറുകളില് സാധാരണക്കാര്ക്കാവശ്യമുളള എല്ലാ ഇനം മരുന്നുകളും ലഭ്യമാക്കി പ്രവര്ത്തനം മെച്ചപ്പെടുത്തും. ഈ പ്രവര്ത്തനങ്ങള്ക്ക് ആവശ്യമായ നിര്ദ്ദേശങ്ങള് മന്ത്രി നല്കി. നോട്ട് ബുക്ക് ഡിവിഷന്റെ പ്രവര്ത്തനത്തെ അഭിനന്ദിച്ച മന്ത്രി വരും വര്ഷങ്ങളില് പ്രവര്ത്തനം കൂടുതല് വ്യാപിപ്പിക്കാനും മന്ത്രി നിര്ദ്ദേശിച്ചു. കണ്സ്യൂമര്ഫെഡിന്റെ പ്രവര്ത്തനം എല്ലാ മാസവും സെക്രട്ടറി തലത്തില് അവലോകനം നടത്തുന്നതിനും കണ്സ്യൂമര്ഫെഡിന്റെ ഡയറക്ടര് ബോര്ഡിലേക്ക് സഹകരണ വകുപ്പിന്റെയും ധന വകുപ്പിന്റെയും പ്രതിനിധികളെ ഉള്പ്പെടുത്താന് നടപടി സ്വീകരിക്കുന്നതിനും സെക്രട്ടറിക്ക് നിര്ദ്ദേശം നല്കി. കൂടാതെ സഹകരണ രജിസ്ട്രാര് നിര്ബന്ധമായും ബോര്ഡ് മീറ്റിംഗുകളില് പങ്കെടുക്കണമെന്നും മന്ത്രി നിര്ദ്ദേശിച്ചു.
കണ്സ്യൂമര്ഫെഡ് ചെയര്മാന് അഡ്വ.ജോയി തോമസ്, സഹകരണ വകുപ്പ് സെക്രട്ടറി കെ.എസ്.ശ്രീനിവാസ്, സഹകരണ സംഘം രജിസ്ട്രാര് എസ്.ലളിതാംബിക, കണ്സ്യൂമര്ഫെഡ് ഡയറക്ടര് വി.രതീഷ് എന്നിവരും വകുപ്പിലെ ഉന്നത ഉദ്യോഗസ്ഥരും യോഗത്തില് പങ്കെടുത്തു.
Discussion about this post