ന്യൂഡല്ഹി: മുല്ലപ്പെരിയാര് അണക്കെട്ടില് ജലനിരപ്പ് ക്രമാതീതമായി ഉയരുന്ന സാഹചര്യം കണക്കിലെടുത്ത് സുപ്രീം കോടതി ഇടപെടണമെന്നാവശ്യപ്പെട്ടു കേരളം അപേക്ഷ നല്കി. ജലനിരപ്പു താഴ്ത്താന് തമിഴ്നാടിനോട് ആവശ്യപ്പെടണമെന്നാണു സംസ്ഥാനം നല്കിയിരിക്കുന്ന അപേക്ഷയിലെ സുപ്രധാന ആവശ്യം. മുല്ലപ്പെരിയാര് അണക്കെട്ടിലെ എല്ലാ ഷട്ടറുകളും അറ്റകുറ്റപ്പണി പൂര്ത്തിയാക്കി പ്രവര്ത്തനയോഗ്യമാക്കിയശേഷം മാത്രം ജലനിരപ്പുയര്ത്തിയാല് മതിയെന്നു തമിഴ്നാടിനോടു നിര്ദേശിക്കണമെന്നാണു കേരളത്തിന്റെ അപേക്ഷയില് ചൂണ്ടിക്കാണിക്കുന്നത്. മുല്ലപ്പെരിയാറിലെ അധികജലം തമിഴ്നാട്ടിലെ വൈഗ അണക്കെട്ടിലേക്കു കൊണ്ടുപോകാന് നിര്ദേശിക്കണമെന്നും ജനങ്ങളുടെ ആശങ്ക അകറ്റുന്നതിനു കോടതി അടിയന്തര ഇടപെടല് നടത്തണമെന്നുമാണ് സംസ്ഥാനത്തിന്റെ പ്രധാന ആവശ്യം.
മുല്ലപ്പെരിയാര് അണക്കെട്ടിന്റെ ജലനിരപ്പ് 142 അടിയായി ഉയര്ത്തിക്കൊണ്ടുള്ള സുപ്രീംകോടതി ഉത്തരവിന്മേല് കേരളം സമര്പ്പിച്ച പുനഃപരിശോധനാ ഹര്ജി കോടതിയുടെ പരിഗണനയിലാണ്. ഇതുകൊണ്ടുതന്നെ നിലവില് 136 അടി വരെ ഉയര്ത്തിയാല് മതിയെന്നാണു സംസ്ഥാനത്തിന് ലഭിച്ചിട്ടുള്ള നിയമോപദേശം. ഇതിന്റെ അടിസ്ഥാനത്തിലായിരിക്കും കേരളം കോടതിയില് വാദിക്കുക. അണക്കെട്ടിലുള്ള 13 ഷട്ടറുകളില് രണെ്ടണ്ണം പ്രവര്ത്തിക്കുന്നില്ലെന്നും, ഈ സാഹചര്യത്തില് 136 അടിക്കു മുകളില് ജലനിരപ്പ് ഉയരുന്നത് അണക്കെട്ടിന് ഭീഷണിയാണെന്നും അപേക്ഷയില് പറയുന്നു.
അതേസമയം ജലനിരപ്പ് 141 അടിയിലേക്ക് ഉയര്ന്ന സാഹചര്യത്തില് അടിയന്തരമായ ഏതു പ്രത്യേക സാഹചര്യവും നേരിടാന് ദുരന്തനിവാരണസേനയെ സജ്ജമാക്കിയതായി റവന്യു മന്ത്രി അടൂര് പ്രകാശ്.
മുല്ലപ്പെരിയാറില് ജലനിരപ്പ് ഉയര്ന്ന സാഹചര്യത്തില് ഇന്നലെ രാവിലെ ചേര്ന്ന പ്രത്യേക മന്ത്രിസഭായോഗം കരുതല് നടപടി കൈക്കൊള്ളാന് റവന്യു വകുപ്പിനോടു നിര്ദേശിച്ചിരുന്നു. ഇതേത്തുടര്ന്നാണു റവന്യു വകുപ്പ് ഇടുക്കി ജില്ലാ ഭരണകൂടവുമായി ബന്ധപ്പെട്ടു കൂടുതല് സുരക്ഷാ നടപടികള് പ്രഖ്യാപിച്ചത്. രക്ഷാപ്രവര്ത്തനത്തിനായി 2,104 പേര്ക്കു പ്രത്യേക പരിശീലനം നല്കി. ഏതെങ്കിലും തരത്തിലുള്ള ദുരന്തമുണ്ടായാല് ജനങ്ങളെ രക്ഷപ്പെടുത്തി സുരക്ഷിത കേന്ദ്രങ്ങളില് എത്തിക്കാന് പ്രത്യേക പരിശീലനം നല്കി. രക്ഷാപ്രവര്ത്തനത്തിനുള്ള രൂപരേഖയും തയാറാക്കി. മുല്ലപ്പെരിയാര് അണക്കെട്ടിനു ഭീഷണി നേരിട്ടാല് പെരിയാറിന്റെ തീരത്ത് ഉള്പ്പെടെയുള്ളവരെ മാറ്റിപ്പാര്പ്പിക്കാനായി 92 സുരക്ഷിത കേന്ദ്രങ്ങള് ഒരുക്കിയിട്ടുണ്ട്.
എട്ടു സ്ഥലങ്ങളിലായി 24 മണിക്കൂറും പ്രവര്ത്തിക്കുന്ന കണ്ട്രോള് റൂമുകള് തുറന്നു. 141 അടിയിലേക്ക് ജലനിരപ്പ് ഉയര്ന്നതോടെ സുപ്രീംകോടതിയില് ഇന്നലെത്തന്നെ ഹര്ജി നല്കാന് മന്ത്രിസഭായോഗം നിര്ദേശിച്ചു. തുടര്ന്ന് ഇന്നലെ ഉച്ചയോടെ സുപ്രീംകോടതിയില് ഹര്ജി ഫയല് ചെയ്തു.
Discussion about this post