തൊടുപുഴ: മുല്ലപ്പെരിയാര്‍ അണക്കെട്ടിലെ ജലനിരപ്പ് 152 അടിയാക്കാനുള്ള നടപടി തമിഴ്‌നാട് തുടങ്ങി. മുല്ലപ്പെരിയാറിലെ ബേബി ഡാം ബലപ്പെടുത്തി ജലനിരപ്പ് ഉയര്‍ത്താനാണു തമിഴ്‌നാട് ശ്രമിക്കുന്നത്. ഇതിന്റെ ഭാഗമായി തമിഴ്‌നാട് പൊതുമരാമത്ത് വകുപ്പ് ചീഫ് എഞ്ചിനീയറുടെ നേതൃത്വത്തിലുള്ള സംഘം അണക്കെട്ടിലെത്തി പരിശോധന നടത്തി.
അടുത്ത കാലവര്‍ഷത്തിനുമുമ്പു ബേബിഡാം ബലപ്പെടുത്തി കൂടുതല്‍ വെള്ളം ശേഖരിക്കാനാണു തമിഴ്‌നാടിന്റെ നീക്കം. അണക്കെട്ടിലെ ജലനിരപ്പ് 142 അടിയായി ഉയര്‍ത്താമെന്ന വിധി ഉണ്ടായ ഘട്ടത്തില്‍ തന്നെ ബേബിഡാം ബലപ്പെടുത്തി ജലനിരപ്പ് 152 അടിയാക്കാമെന്നു സുപ്രീം കോടതി ഉത്തരവിട്ടിരുന്നു. ഇതിന്റെ അടിസ്ഥാനത്തിലാണു പുതിയ നീക്കം.
തമിഴ്‌നാട് പൊതുമരാമത്ത് വകുപ്പ് ചീഫ് എഞ്ചിനീയര്‍ എസ്.പി പാണ്ഡ്യന്‍, മുല്ലപ്പെരിയാര്‍ അണക്കെട്ടിന്റെ ചുമതലയുള്ള സൂപ്രണ്ടിംഗ് എഞ്ചിനീയര്‍, ഡെപ്യൂട്ടി ചീഫ് എഞ്ചിനീയര്‍ അബ്ദുസലാം, തമിഴ്‌നാട് പിഡബ്ല്യുഡി ടെക്‌നിക്കല്‍ ഓഫീസര്‍ ഇളങ്കോവന്‍ എന്നിവരുള്‍പ്പെട്ട പത്തംഗ സംഘമാണു മുല്ലപ്പെരിയാറില്‍ പരിശോധന നടത്തിയത്. ബേബിഡാം ബലപ്പെടുത്തുന്നതിന് എസ്റ്റിമേറ്റ് തയാറാക്കുന്നതിനാണ് ഇവര്‍ എത്തിയത്. പൂര്‍ണമായ എസ്റ്റിമേറ്റ് തയാറാക്കി ഈ മാസം അവസാനത്തോടെ തമിഴ്‌നാട് സര്‍ക്കാരിനു സമര്‍പ്പിക്കും.
Discussion about this post