തിരുവനന്തപുരം: ഹോമിയോ ചികിത്സാ കേന്ദ്രങ്ങളില്ലാത്ത സംസ്ഥാനത്തെ അറുപത്തിയെട്ട് പഞ്ചായത്തുകളിലും ഹോമിയോ ഡിസ്‌പെന്‍സറികള്‍ തുടങ്ങാന്‍ നടപടി സ്വീകരിക്കുമെന്ന് ആരോഗ്യമന്ത്രി വി.എസ്. ശിവകുമാര്‍ അറിയിച്ചു. ഹോമിയോ, ആയുര്‍വേദം, സിദ്ധ, യുനാനി വിഭാഗങ്ങളിലായി സംസ്ഥാനത്ത് ജോലി ചെയ്യുന്ന 750 എന്‍എച്ച്എം ആയുഷ് ഡോക്ടര്‍മാരുടെ ശമ്പളം പത്ത് ശതമാനം വര്‍ധിപ്പിക്കാനും നടപടി കൈക്കൊള്ളുമെന്ന് അദ്ദേഹം പറഞ്ഞു.
തിരുവനന്തപുരത്ത്, ആയുഷ് ഡോക്ടര്‍മാരുടെ സംസ്ഥാനതല തുടര്‍ വിദ്യാഭ്യാസ പരിപാടി ഉദ്ഘാടനം ചെയ്യുകയായിരുന്നു മന്ത്രി. പുതിയ പഞ്ചായത്തുകള്‍ നിലവില്‍വന്ന സാഹചര്യത്തിലാണ് കൂടുതല്‍ ഡിസ്‌പെന്‍സറികള്‍ തുടങ്ങുന്നത്. സംസ്ഥാനത്ത് ഇപ്പോള്‍ 33 ഹോമിയോ ആശുപത്രികളും 1123 ഡിസ്‌പെന്‍സറികളുമുണ്ട്. അമ്മയും കുഞ്ഞും എന്ന പേരിലുള്ള ഹോമിയോ വന്ധ്യതാ ചികിത്സാ പദ്ധതി കണ്ണൂരില്‍ വന്‍ വിജയമായ സാഹചര്യത്തില്‍ അത് എല്ലാ ജില്ലാ ആസ്ഥാനങ്ങളിലേക്കും വ്യാപിപ്പിക്കും. ആദ്യഘട്ടത്തില്‍ കോഴിക്കോടും എറണാകുളത്തും തിരുവനന്തപുരത്തും വന്ധ്യതാ ചികിത്സാ കേന്ദ്രങ്ങള്‍ തുടങ്ങും. രാജ്യത്തിനൊട്ടാകെ മാതൃകയാക്കാവുന്ന പദ്ധതിയാണ് അമ്മയും കുഞ്ഞുമെന്ന് മന്ത്രി കൂട്ടിച്ചേര്‍ത്തു. പകര്‍ച്ചവ്യാധി പ്രതിരോധ മേഖലയില്‍ ഹോമിയോപ്പതിയുടെ പ്രസക്തി നാള്‍ക്കുനാള്‍ വര്‍ധിക്കുകയാണ്. അതിനാല്‍ ഇതു സംബന്ധിച്ച ബോധവത്ക്കരണം വ്യാപകമാക്കും. സംസ്ഥാനത്തെ ഹോമിയോ ചികിത്സാ കേന്ദ്രങ്ങള്‍ക്ക് ആവശ്യാനുസരണം മരുന്നുകള്‍ ലഭ്യമാക്കുന്നതിന്, ഹോംകോ (കേരള സ്റ്റേറ്റ് ഹോമിയോപ്പതിക് കോ-ഓപ്പറേറ്റീവ് ഫാര്‍മസി) യുടെ ഔഷധ നിര്‍മ്മാണകേന്ദ്രം തിരുവനന്തപുരത്ത് സ്ഥാപിക്കുമെന്നും അദ്ദേഹം പറഞ്ഞു.
എ.ടി. ജോര്‍ജ്ജ് എംഎല്‍എ, ഹോമിയോവകുപ്പ് ഡയറക്ടര്‍ ഡോ. കെ. ജമുന, ആയുഷ് സ്റ്റേറ്റ് പ്രോഗ്രാം മാനേജര്‍ ഡോ. ജി.എസ്. ബാലചന്ദ്രന്‍ നായര്‍, ഡോ. പി. ഹരിദാസ്, എന്‍എച്ച്എം സ്റ്റേറ്റ് അഡ്മിനിസ്‌ട്രേറ്റീവ് ആന്റ് എച്ച്.ആര്‍ മാനേജര്‍ പി.കെ. ഹരികൃഷ്ണന്‍, ഡി.പി.എം ഡോ. ബി. ഉണ്ണികൃഷ്ണന്‍, ഡോ. അനൂജ് ബെന്‍സണ്‍, ഡോ. പി.എസ്. ശ്രീകാന്ത്, ഡോ. എസ്.ഒ. ശ്രീജിത്ത് എന്നിവര്‍ പ്രസംഗിച്ചു. ഡോ. വിപിന്‍ ഗോപാല്‍, ഡോ. അമര്‍ ഫെറ്റില്‍ തുടങ്ങിയവര്‍ ക്ലാസ്സെടുത്തു. വിവിധ ജില്ലകളില്‍ നിന്നായി 198 പ്രതിനിധികള്‍ പങ്കെടുത്തു.
