തിരുവനന്തപുരം: ചരക്കുസേവന നികുതി നിലവില് വരുമ്പോള് സംസ്ഥാന സര്ക്കാരുകളും കേന്ദ്ര സംസ്ഥാന സര്ക്കാരുകളും തമ്മില് സമവായമുണ്ടാക്കേണ്ട കാര്യങ്ങള് സംബന്ധിച്ച് ഏകദേശ ധാരണയായി. അവശേഷിക്കുന്നവ തുടര് ചര്ച്ചകളിലൂടെ പരിഹരിക്കുമെന്ന് കോവളത്ത് ചേര്ന്ന ധനമന്ത്രിമാരുടെ എംപവേര്ഡ് കമ്മിറ്റി യോഗത്തിനുശേഷം ചെയര്മാന് കൂടിയായ സംസ്ഥാന ധനകാര്യ വകുപ്പുമന്ത്രി കെ.എം.മാണി വാര്ത്താസമ്മേളനത്തില് പറഞ്ഞു.
ജി.എസ്.ടി. നിലവില് വരുമ്പോള് അന്തര് സംസ്ഥാന വ്യാപാര സേവന ഇടപാടുകളില് ചുമത്തുന്ന ഐ.ജി.എസ്.ടിയെയും ഇറക്കുമതിയിന്മേല് ചുമത്തുന്ന ചരക്കു സേവന നികുതിയെയും കുറിച്ചുള്ള ജോയിന്റ് വര്ക്കിംഗ് കമ്മിറ്റിയുടെ റിപ്പോര്ട്ട് എംപവേര്ഡ് കമ്മിറ്റി ചര്ച്ച ചെയ്ത് അംഗീകരിച്ചതായി മന്ത്രി പറഞ്ഞു. ബിസിനസ് പ്രോസസ് ഡോക്കുമെന്റേഷന് സംബന്ധിച്ച റിപ്പോര്ട്ടുകളില് രജിസ്ട്രേഷനുമായി ബന്ധപ്പെട്ട ശുപാര്ശകള് കമ്മിറ്റി പൂര്ണ്ണമായി അംഗീകരിച്ചു. നിലവിലുള്ള വ്യാപാരികളെ ചരക്ക് സേവന നികുതിയിലേക്ക് മാറ്റുമ്പോള് ചെയ്യേണ്ടതും പുതുതായി ജി.എസ്.ടി. രജിസ്ട്രേഷന് നടത്തുമ്പോള് സ്വീകരിക്കേണ്ടതുമായ നടപടിക്രമങ്ങള് സംബന്ധിച്ച ജോയിന്റ് വര്ക്കിംഗ് കമ്മിറ്റി റിപ്പോര്ട്ടും എംപവേര്ഡ് കമ്മിറ്റി അംഗീകരിച്ചു. റിട്ടേണ്സ്, റീഫണ്ട്, പേമെന്റ് എന്നിവ സംബന്ധിച്ച ശുപാര്ശയില് ചില സംസ്ഥാനങ്ങള് ഭേദഗതി നിര്ദ്ദേശിച്ച സാഹചര്യത്തില് കൂടുതല് ചര്ച്ചകള്ക്ക് വിധേയമാക്കി റിപ്പോര്ട്ട് പുതുക്കി സമര്പ്പിക്കാന് ജോയിന്റ് വര്ക്കിംഗ് കമ്മിറ്റിയോട് നിര്ദ്ദേശിച്ചതായും മന്ത്രി വ്യക്തമാക്കി.
കോവളം ലീലാ ഹോട്ടലില് നടത്തിയ വാര്ത്താസമ്മേളനത്തില് കേന്ദ്ര റവന്യു അഡീഷണല് സെക്രട്ടറി രശ്മി വര്മ്മ, സംസ്ഥാന നികുതി വകുപ്പ് പ്രിന്സിപ്പല് സെക്രട്ടറി ഡബ്ല്യു.ആര്.റെഡ്ഡി, എംപവേര്ഡ് കമ്മിറ്റി മെമ്പര് സെക്രട്ടറി സതീഷ് ചന്ദ്ര തുടങ്ങിയവര് പങ്കെടുത്തു.
Discussion about this post