കോട്ടയം: ചിന്മയാനന്ദ സ്വാമികളുടെ ജന്മശതാബ്ദി ആഘോഷങ്ങളുടെ ഉദ്ഘാടനവേദിയില്‍ നിന്നു പ്രയാണമാരംഭിച്ച ചിന്മയ ജ്യോതി പ്രയാണത്തിനു കോട്ടയത്ത് ഉജ്വലസ്വീകരണം.
ഏറ്റുമാനൂര്‍ മഹാദേവക്ഷേത്രനടയില്‍ നിന്നു വിവിധ ഹൈന്ദവ സംഘടനകളുടെ നേതൃത്വത്തില്‍ കോട്ടയത്ത് എത്തിയ ജ്യോതി പ്രയാണത്തിനു തിരുനക്കര ക്ഷേത്രമൈതാനത്ത് രാവിലെ 11ന് പൗരാവലിയുടെ ആഭിമുഖ്യത്തില്‍ സ്വീകരണം നല്‍കി. തുടര്‍ന്നു മാമന്‍ മാപ്പിളഹാളില്‍ നടന്ന സ്വീകരണ സമ്മേളനത്തില്‍ ചിന്മയാമിഷന്‍ കേരള ഘടകം മേധാവി സ്വാമി വിവിക്താനന്ദ സരസ്വതി അധ്യക്ഷതവഹിച്ചു.
മന്ത്രി തിരുവഞ്ചൂര്‍ രാധാകൃഷ്ണന്‍ ഉദ്ഘാടനം ചെയ്തു. മുന്‍ അഡീഷണല്‍ ചീഫ് സെക്രട്ടറി സി.വി ആനന്ദബോസ് മുഖ്യപ്രഭാഷണം നടത്തി. കോട്ടയം ചിന്മയാവിദ്യാലയ പ്രസിഡന്റ് എ. ഗോപാലകൃഷ്ണന്‍, സെക്രട്ടറി എ. അരവിന്ദന്‍, പ്രഫ. മാടവന ബാലകൃഷ്ണപിള്ള, കോട്ടയം ചിന്മയാമിഷന്‍ പ്രസിഡന്റ് എ. രാജഗോപാല്‍, സെക്രട്ടറി എ.എസ് മണി, പ്രിന്‍സിപ്പല്‍ ഗീതാദേവി വര്‍മ എന്നിവര്‍ പ്രസംഗിച്ചു. വൈകുന്നേരം നടന്ന ചടങ്ങില്‍ ചിന്മയമിഷന്‍ ആഗോളതലവന്‍ സ്വാമി തേജോമയാനന്ദന്‍ അനുഗ്രഹപ്രഭാഷണം നടത്തി. സമ്പത്തിനെ അടിസ്ഥാനപ്പെടുത്തിയുള്ള ബന്ധങ്ങളാണ് ആധുനിക മനുഷ്യന്റെ ദുരിതങ്ങള്‍ക്ക് കാരണമെന്നും സമ്പത്തിനോടുള്ള മനുഷ്യന്റെ ആര്‍ത്തിയാണ് എല്ലാ പ്രശ്‌നങ്ങളുടെയും അടിസ്ഥാന കാരണമെന്നും സ്വാമി തേജോമയാനന്ദന്‍ പറഞ്ഞു.
സമ്മേളനത്തെത്തുടര്‍ന്ന് ചിന്മയ വിദ്യാലയത്തിലെ കുട്ടികള്‍ അവതരിപ്പിച്ച സ്വാമി ചിന്മയാന്ദജിയുടെ ജീവിതത്തെ ആസ്പദമാക്കി അവതരിപ്പിച്ച ചിന്മയപ്രഭ എന്ന നൃത്തശില്‍പവും വയലിനിസ്റ്റ് കോട്ടയം ഹരിഹരനും സംഘവും അവതരിപ്പിച്ച വയലിന്‍ ഫ്യൂഷനും അരങ്ങേറി. ഗുരുദക്ഷിണ സമര്‍പ്പണത്തോടെയാണ് സ്വീകരണ സ മ്മേളനം സമാപിച്ചത്.
Discussion about this post