തിരുവനന്തപുരം: ആഡംബരങ്ങള്ക്കും ആഘോഷങ്ങള്ക്കും അനാവശ്യ ധൂര്ത്തിനും വേണ്ടി പണം പാഴാക്കിക്കളയാതെ നിരാലംബരായ രോഗികള്ക്കു വേണ്ടിയും സന്നദ്ധ സംഘടനകള്ക്കു വേണ്ടിയും പണം ചെലവാക്കണമെന്നു ഗവര്ണര് ജസ്റ്റീസ് പി. സദാശിവം. തിരുവനന്തപുരം റീജണല് കാന്സര് സെന്ററില് പ്രവര്ത്തിക്കുന്ന സ്ത്രീകളുടെ സന്നദ്ധ സംഘടനയായ ആശ്രയയ്ക്കുള്ള സംഭാവന നല്കി സംസാരിക്കുകയായിരുന്നു ഗവര്ണര്. സ്വന്തം നിലയില് 25000 രൂപയും രാജ്ഭവന് ഫണ്ടില് നിന്ന് 25000 രൂപയും ഗവര്ണര് സദാശിവം ആശ്രയ പ്രസിഡന്റ് ശാന്താ ജോസിനു കൈമാറി.
ആര്സിസി സന്ദര്ശിച്ച വേളയില്, ആശ്രയ അര്ബുദ രോഗികള്ക്കു വേണ്ടി ചെയ്യുന്ന സേവനങ്ങള് നേരില് കണ്ടതിന്റെ ഭാഗമായാണു വ്യക്തിപരമായ സംഭാവനയും രാജ്ഭവന് ഫണ്ടിനൊപ്പം ഗവര്ണര് നല്കിയത്. ആശ്രയ രക്ഷാധികാരി ജെ. ലളിതാംബിക, വൈസ് പ്രസിഡന്റ് ജെസി ജേക്കബ്, ട്രഷറര് ലിസി കുര്യന് എന്നിവര് സംഭാവന സ്വീകരിക്കാന് രാജ്ഭവനില് എത്തിയിരുന്നു. കഴിഞ്ഞ 19 വര്ഷങ്ങളായി തിരുവനന്തപുരം ആര്സിസിയില് സേവന പ്രവര്ത്തനങ്ങള് നടത്തി വരുന്ന സന്നദ്ധ സംഘടനയാണ് ആശ്രയ.
കൂടുതല് പേര്ക്ക് സഹായമെത്തിക്കാന് പ്രവര്ത്തനങ്ങള് വിപുലീകരിക്കണമെന്നു ഗവര്ണര് നിര്ദേശിച്ചു. 19 വര്ഷം മുന്പാണ് ആര്.സി.സി. കേന്ദ്രീകരിച്ച് ആശ്രയയുടെ പ്രവര്ത്തനം ആരംഭിച്ചത്. രോഗികള്ക്കു സാമ്പത്തിക സഹായം, പുനരധിവാസം, കാന്സര് രോഗത്തില് മരണമടഞ്ഞവരുടെ മക്കള്ക്കു പ്രൊഫഷണല് കോഴ്സുകളില് പ്രവേശനം ഉള്പ്പെടെ വിവിധ മേഖലകളിലായി ആശ്രയ പ്രവര്ത്തിക്കുന്നു. 360 ഓളം കുട്ടികള്ക്ക് നിലവില് വിദ്യാഭ്യാസ സഹായം നല്കുന്നുണ്ട്. 350 ഓളം അംഗങ്ങള് ആശ്രയയില് പ്രവര്ത്തിക്കുന്നു. കഴിഞ്ഞവര്ഷം ഒരു കോടി രൂപയുടെ സഹായധനം ആശ്രയ നല്കിയിട്ടുണ്ട്.
Discussion about this post