തിരുവനന്തപുരം: അക്ഷരാഘോഷമായി ജില്ലാതല വായനാവാരാചരണത്തിന് തേമ്പാംമൂട് ജനത ഹയര്സെക്കന്ഡറി സ്കൂളില് തുടക്കമായി. വായനദിന പരിപാടികളുടെയും വാരാചരണത്തിന്റെയും ഉദ്ഘാടനം കവി മുരുകന് കാട്ടാക്കട നിര്വഹിച്ചു. വായന നാളെയുള്ള ജീവിതത്തില് വെളിച്ചമാകുമെന്നും ചെറുപ്രായത്തില് നന്നായി വായിച്ചുവളര്ന്നാല് ഭാവിയില് അറിവും ഭാവനയും വിശാലമാകുമെന്നും മുരുകന് കാട്ടാക്കട പറഞ്ഞു.
ആദ്യക്ഷരം പഠിപ്പിച്ച ഗുരുനാഥന്റെ ലളിതവും രസകരവുമായ ശൈലിയാണ് പേടികൂടാതെ പഠനത്തെ സമീപിക്കാന് തന്നെ സഹായിച്ചതെന്നും അദ്ദേഹം കൂട്ടിച്ചേര്ത്തു. തുടര്ന്ന് നെല്ലിക്ക, കണ്ണട തുടങ്ങിയ തന്റെ കവിതകളും അദ്ദേഹം ആലപിച്ചു. വായനദിന പ്രതിജ്ഞയും അദ്ദേഹം ചൊല്ലിക്കൊടുത്തു. കുട്ടികള് വൃക്ഷക്കൊമ്പില് അക്ഷരമാലയണിച്ച് അക്ഷരമരമൊരുക്കിയതോടെയാണ് പരിപാടികള്ക്ക് തുടക്കമായത്. തുടര്ന്ന് ഉദ്ഘാടനസമ്മേളനത്തില് കവിതകള് കോര്ത്തിണക്കി വിദ്യാര്ഥികള് അവതരിപ്പിച്ച ഭാഷാവന്ദനവും വ്യത്യസ്തമായി. ചടങ്ങില് അഡീഷണല് ജില്ലാ മജിസ്ട്രേറ്റ് ജെ. ഗിരിജ അധ്യക്ഷത വഹിച്ചു. രചനാമല്സരങ്ങളില് വിജയികളായ വിദ്യാര്ഥികള്ക്കുള്ള സമ്മാനദാനം കാര്ട്ടൂണിസ്റ്റ് ഹക്കു നിര്വഹിച്ചു. ജില്ലാ ഇന്ഫര്മേഷന് ഓഫീസര് കെ. സുരേഷ് കുമാര് സ്വാഗതവും സ്റ്റാഫ് സെക്രട്ടറി നിഹാസ് ബാബു കൃതജ്ഞതയും പറഞ്ഞു. വിക്ടേഴ്സ് ചാനല് ഹെഡ് സലിന് മാങ്കുഴി, സ്കൂള് മാനേജര് സജീബ് ആനക്കുഴി, പ്രിന്സിപ്പല് എം. അബ്ദുല് നാസര്, ഹെഡ്മിസ്ട്രസ് എ. ഷീജ, സാഹിതി കണ്വീനര് ബിന്നി സാഹിതി തുടങ്ങിയവര് സംസാരിച്ചു. എസ്.എസ്.എയുടെ വായനക്കൂട്ടം പദ്ധതിയില് ജില്ലാ, സംസ്ഥാനതല മല്സരവിജയികളായ കുട്ടികളുടെ രചനകള് ഉള്പ്പെടുത്തി പ്രസിദ്ധീകരിച്ച ‘അക്ഷരസൂനം’ പുസ്തകം ചടങ്ങില് മുരുകന് കാട്ടാക്കട സലിന് മാങ്കുഴിക്ക് നല്കി പ്രകാശനം ചെയ്തു. വാരാചരണത്തിന്റെ ഭാഗമായുള്ള സാഹിത്യമല്സരങ്ങള് ഇന്ന് (ജൂണ് 20) രാവിലെ 10 മുതല് നെയ്യാറ്റിന്കര ബ്ളോക്ക് റിസോഴ്സ് സെന്ററില് നടക്കും. സമാപനസമ്മേളനം ജൂണ് 25ന് വഴുതക്കാട് കോട്ടണ്ഹില് എല്.പി സ്കൂളില് നടക്കും. ഗ്രന്ഥശാലാ പ്രസ്ഥാനത്തിന്റെ സ്ഥാപകന് പി.എന്. പണിക്കരുടെ ചരമദിനമായ ജൂണ് 19 മുതല് 25 വരെയാണ് വായനാവാരം ആചരിക്കുന്നത്. ജില്ലാതല പരിപാടികള് ജില്ലാ ഇന്ഫര്മേഷന് ഓഫീസിന്റെ ആഭിമുഖ്യത്തില് പി.എന് പണിക്കര് ഫൗണ്ടേഷന്, സാഹിതി തിരുവനന്തപുരം എന്നിവയുടെ സഹകരണത്തോടെയാണ് സംഘടിപ്പിച്ചിരിക്കുന്നത്.
Discussion about this post