തിരുവനന്തപുരം: പോലീസ് പ്രവര്‍ത്തനങ്ങള്‍ മെച്ചപ്പെടുത്തുന്നതിനുള്ള ആശയങ്ങളും കര്‍മപദ്ധതികളും സാങ്കേതിക ഉപദേശവും സംഭാവന ചെയ്യുന്നതിന് വിവിധ മേഖലകളില്‍ വൈദഗ്ധ്യമുള്ള പോലീസ് ഉദ്യോഗസ്ഥര്‍ക്കൊപ്പം വകുപ്പിനു പുറത്തുള്ള അക്കാദമിക് വിദഗ്ധര്‍, സാങ്കേതിക-സാമൂഹിക വിഷയങ്ങളില്‍ പ്രാഗത്ഭ്യമുള്ളവരെയും ഉള്‍പ്പെടുത്തി ടീമുകള്‍ രൂപവത്കരിക്കുന്നു.
പോലീസുദ്യോഗസ്ഥര്‍ ദിനംപ്രതി വ്യത്യസ്ത വിഷയങ്ങള്‍ കൈകാര്യം ചെയ്യേണ്ടി വരുമ്പോള്‍ ഇത്തരം വിഷയങ്ങളില്‍ അതീവ വൈദഗ്ധ്യം നേടി കൂടുതല്‍ പുരോഗമനപരമായ ആശയങ്ങളും നടപടികളും പ്രയോഗത്തില്‍ വരുത്തണം എന്ന ലക്ഷ്യത്തോടെയാണ് സംസ്ഥാന പോലീസ് മേധാവി ടി.പി. സെന്‍കുമാറിന്റെ നിര്‍ദേശപ്രകാരം ഈ പുതിയ ടീമുകള്‍ക്ക് രൂപം നല്‍കുന്നത്. സംസ്ഥാന തലത്തിലും, റേഞ്ച് തലത്തിലും റിസര്‍ച്ച് ആന്റ് ഡവലപ്‌മെന്റ് (ആര്‍.ആന്റ്ഡി) ടീമുകള്‍ ഉണ്ടാക്കും. വകുപ്പിലെ ഉദ്യോഗസ്ഥര്‍ വിവിധ മേഖലകളില്‍ പ്രത്യേക താല്പര്യവും, പ്രാവീണ്യവും ഉള്ളവരായിരിക്കുമെങ്കിലും വകുപ്പിലെ നിലവിലുള്ള അധികാര ശ്രേണി പ്രകാരം പലപ്പോഴും ഇത്തരത്തിലുള്ള ഉദ്യോഗസ്ഥര്‍ക്ക് അവരുടെ വൈദഗ്ധ്യമോ, കൂടുതല്‍ പുരോഗമനപരമായ നടപടികളോ മുന്നോട്ടുകൊണ്ടുവരാനാകാത്ത സ്ഥിതിയുണ്ട്.
കൂടാതെ വിരമിച്ച ഉദ്യോഗസ്ഥര്‍, മറ്റ് സാങ്കേതിക, സാമൂഹികമേഖലകളിലുള്ളവര്‍, സാമൂഹിക പ്രതിബദ്ധതയുള്ള മറ്റ് വിഭാഗങ്ങളിലുള്ളവര്‍, നിയമം, ശാസ്ത്രീയ പഠനശാഖകള്‍ തുടങ്ങിയവയില്‍ നിന്നുള്ളവര്‍ എന്നിവര്‍ക്കും ഇത്തരം കാര്യങ്ങളില്‍ സംഭാവന നല്‍കാനുള്ള അവസരങ്ങള്‍ തുലോം കുറവാണ്. ഇന്‍ഫര്‍മേഷന്‍ ടെക്‌നോളജി, ഫോറന്‍സിക്‌സ്, ശാസ്ത്രീയ കുറ്റാന്വേഷണം, നിയമം, വാഹനഗതാഗതം, ആശയവിനിമയം, ആള്‍ക്കൂട്ട നിയന്ത്രണം, വിവിധ ഭാഷാ പഠനം, മാധ്യമം, സ്‌പോര്‍ട്‌സ്, കല, ആരോഗ്യം, ഭരണനിര്‍വഹണം, ഭാവി വികസനം, കെട്ടിടങ്ങള്‍, പരിശീലനം, ദുരന്ത നിവാരണം, സ്‌ഫോടക വസ്തുക്കള്‍ കണ്ടെത്തുന്നതും നശിപ്പിക്കുന്നതും, റോഡ് സുരക്ഷ, പോലീസ് സ്റ്റേഷനുകളുടെ പ്രവര്‍ത്തനം മെച്ചപ്പെടുത്തല്‍, മറ്റ് വിഭാഗങ്ങള്‍ എന്നീ മേഖലകളില്‍ വൈദഗ്ധ്യവും താല്പര്യവുമുള്ളവര്‍ക്ക് പങ്കെടുക്കാം. ഓരോ ടീമിലും വരുന്ന ഏറ്റവും സീനിയര്‍ ഉദ്യോഗസ്ഥന്‍ ടീം ലീഡര്‍ ആയിരിക്കും. ഓരോ ടീമിലേക്കും വരാന്‍ താത്പര്യവും, അഭിരുചിയും തെളിയിച്ചിട്ടുള്ളവരായ ഏതു ശ്രേണിയിലുള്ള ഉദ്യോഗസ്ഥര്‍ക്കും സ്വമേധയാ ഈ ടീമില്‍ അംഗമാകാം. തികച്ചും സന്നദ്ധ സേവനമായാണ് ഇത് വിഭാവനം ചെയ്തിട്ടുള്ളത്. അതത് മേഖലകളില്‍ ലഭ്യമായ എല്ലാ വിവരങ്ങളും പുതുതായി നടപ്പാക്കേണ്ട സംവിധാനങ്ങളും സാര്‍വദേശീയ തലത്തില്‍തന്നെ ലഭ്യമായ വിവരങ്ങളെയും വിഭവങ്ങളെയുംപറ്റി ടീമംഗങ്ങള്‍ വിവരശേഖരണം നടത്തുകയും ആശയങ്ങള്‍ പങ്കുവെച്ചും ക്രോഡീകരിച്ചും വകുപ്പിന് ഏറ്റവും ഉതകുന്ന വിധത്തില്‍ പ്രാവര്‍ത്തികമാക്കുകയാണ് ലക്ഷ്യം. ആവശ്യമെങ്കില്‍ അതത്‌മേഖലകളില്‍ പ്രാവീണ്യം തെളിയിച്ചിട്ടുള്ള വിവാദരഹിതരായ പുറത്തുള്ള വ്യക്തികളില്‍ നിന്നും ഇത്തരം കാര്യങ്ങളില്‍ ഉപദേശങ്ങള്‍ സ്വീകരിക്കും. ഇത് ഒരു തുടര്‍ പ്രക്രിയയാണ് വിഭാവനം ചെയ്യുന്നത്. പോലീസ് വകുപ്പിലെ കഴിവുറ്റ ഉദ്യോഗസ്ഥര്‍ക്ക് തങ്ങള്‍ നിത്യേന ചെയ്യുന്ന കര്‍ത്തവ്യങ്ങള്‍ക്കു പുറമെ കൂടുതല്‍ മന:സംതൃപ്തി നല്‍കുന്ന വിഷയങ്ങളില്‍ ഗഹനമായി പഠിക്കുന്നതിനും, അത് വകുപ്പിന്റെ പ്രവര്‍ത്തനങ്ങള്‍ക്ക് ഉപയോഗപെടുത്തുന്നതിനുമാണ് ഇത്തരം ആര്‍.ആന്റ് ഡി. ടീമുകള്‍ കൊണ്ട് ഉദ്ദേശിക്കുന്നതെന്ന് സംസ്ഥാന പോലീസ് മേധാവി പറഞ്ഞു.
ടീമുകളില്‍ അംഗമാകാന്‍ താല്പര്യവും കഴിവുമുള്ള പോലീസ് വകുപ്പിലെ ഏത് ഉദേ്യാഗസ്ഥനും അഭിരുചിയുള്ള വിഷയങ്ങളില്‍ അംഗമായി പങ്കെടുക്കുന്നതിന് അതാത് യൂണിറ്റ് മേധാവി മുഖാന്തിരം താല്പര്യം അറിയിക്കണം. 2015 ജൂലൈ മാസത്തിനകം ഇത്തരത്തില്‍ ചേരുവാന്‍ ആഗ്രഹിക്കുന്ന എല്ലാവരുടെയും വിവരങ്ങള്‍ യൂണിറ്റ് മേധാവികള്‍ സംസ്ഥാന പോലീസ് മേധാവിക്ക് അയയ്ക്കണമെന്നും നിര്‍ദ്ദേശിച്ചിട്ടുണ്ട്.
Discussion about this post