തിരുവനന്തപുരം: രൂക്ഷമായ തെരുവുനായ ശല്യം നിയന്ത്രിക്കാനായി അനിമല് ബര്ത്ത് കണ്ട്രോള് പ്രോഗ്രാം (എ.ബി.സി) നടപ്പാക്കുന്നതിന് ജില്ലയിലെ ത്രിതല പഞ്ചായത്തുകള് സംയുക്ത പദ്ധതിക്ക് രൂപം നല്കാന് തീരുമാനിച്ചു.
തദ്ദേശസ്ഥാപനങ്ങളുടെയും മൃഗസംരക്ഷണ വകുപ്പ് ഉദ്യോഗസ്ഥരുടേയും യോഗത്തിലാണ് തീരുമാനം. ജില്ലാ കളക്ടര് ബിജു പ്രഭാകര് അധ്യക്ഷത വഹിച്ച യോഗം ജില്ലാ പഞ്ചായത്ത് പ്രസിഡന്റ് അന്സജിതാ റസ്സല് ഉദ്ഘാടനം ചെയ്തു. ജില്ലയില് അപകടകരമായി അലഞ്ഞുനടക്കുന്ന നായ്ക്കളെ ഒഴിവാക്കുന്നതിനും മറ്റുള്ളവയെ വന്ധ്യംകരിക്കുന്നതിനും യോഗത്തില് തീരുമാനമായി. വീടുകളില് വളര്ത്തുന്ന നായ്ക്കള്ക്ക് ലൈസന്സ് ഏര്പ്പെടുത്തി പ്രതിരോധ കുത്തിവെപ്പുകള് നല്കും.
ജൂലൈ 31ന് കൂടുന്ന ജില്ലാ ആസൂത്രണസമിതി യോഗത്തില് പദ്ധതിക്ക് അന്തിമ അനുമതി ലഭ്യമാക്കുമെന്ന് ജില്ലാ പഞ്ചായത്ത് പ്രസിഡന്റ് അറിയിച്ചു. യോഗത്തില് ജില്ലാ പഞ്ചായത്ത് സെക്രട്ടറി ചന്ദ്രശേഖരന് നായര്, ജില്ലാ മൃഗസംരക്ഷണ ഓഫീസര്, ഡി.പി.സി അംഗങ്ങള്, ബ്ളോക്ക്-ഗ്രാമപഞ്ചായത്ത് പ്രസിഡന്റുമാര്, സെക്രട്ടറിമാര്, കോര്പറേഷന് പ്രതിനിധികള് തുടങ്ങിയവര് പങ്കെടുത്തു.
Discussion about this post