തിരുവനന്തപുരം: പോലീസ് സേനയ്ക്ക് ആവശ്യമായ ഉപകരണങ്ങള് വാങ്ങുമ്പോള് ആക്ഷേപങ്ങളും പരാതികളും ഒഴിവാക്കാന് മതിയായ ജാഗ്രതയും സുതാര്യതയും ഉറപ്പുവരുത്തണമെന്ന് ആഭ്യന്തര മന്ത്രി രമേശ് ചെന്നിത്തല ഡി.ജി.പി.ക്ക് നല്കിയ കത്തില് ആവശ്യപ്പെട്ടു.
നിലവിലുള്ള സ്റ്റോര് പര്ച്ചേയ്സ് നിയമങ്ങള് കര്ശനമായി പാലിക്കണം. സേനയുടെ ആധുനികവത്ക്കരണത്തിനായി ഉപകരണങ്ങള് വാങ്ങുമ്പോള് അതിന്റെ ആവശ്യകതയും ഗുണനിലവാരവും ഉറപ്പുവരുത്തണം. ആവശ്യമെങ്കില് വിദഗ്ദ്ധരുടെ സേവനം ഉപയോഗപ്പെടുത്തണം. വാഹനങ്ങളും ഉപകരണങ്ങളും വാങ്ങുന്നതിനുള്ള മാനദണ്ഡങ്ങള് തീരുമാനിക്കുമ്പോള് ഏതെങ്കിലും പ്രത്യേക കമ്പനിയില് നിന്നു മാത്രം ലഭ്യമാകുന്ന തരത്തിലുള്ള മാനദണ്ഡങ്ങള് ഒഴിവാക്കണം. കമ്പനികളുടെ സ്വീകാര്യത പരിശോധിക്കുകയും സാധനങ്ങളുടെ ഗുണനിലവാരം ഉറപ്പുവരുത്തുകയും വേണം. ഒരു പ്രത്യേക വിഭാഗത്തിനായി ഉപകരണങ്ങള് വാങ്ങുമ്പോള് ആ വിഭാഗത്തിന്റെ അഭിപ്രായം കൂടി പരിഗണിക്കണം. സര്ക്കാര് ഇ-ടെണ്ടര് നിര്ബന്ധമാക്കിയ പര്ച്ചേയ്സുകള് അത്തരത്തിലാണ് നടന്നതെന്ന് ഉറപ്പുവരുത്തണം. വാങ്ങുന്ന സാധനങ്ങളുടെ ആധുനികതയും സാങ്കേതിക മികവും പരിശോധിച്ച് സുതാര്യതയോടും മതിയായ ജാഗ്രതയോടുംകൂടി മാത്രമേ ഉപകരണങ്ങള് വാങ്ങാവൂവെന്ന് ആഭ്യന്തര മന്ത്രി കത്തില് നിര്ദ്ദേശിച്ചു.
Discussion about this post