തിരുവനന്തപുരം: ഭാഷാ ഇന്സ്റ്റിറ്റിയൂട്ട്, മലയാളം മിഷന്, ഔദ്യോഗിക ഭാഷാ വകുപ്പ്, മലയാളം സര്വകലാശാല, സാഹിത്യ അക്കാദമി തുടങ്ങി വിവിധ സാംസ്കാരിക സ്ഥാപനങ്ങളുടെ ആഭിമുഖ്യത്തില് കേരള സംസ്ഥാന രൂപീകരണത്തിന്റെ അറുപതാം പിറന്നാള് ആഘോഷിക്കാന് മുഖ്യമന്ത്രിയുടെ അധ്യക്ഷതയില് ചേര്ന്ന ഔദ്യോഗിക ഭാഷാ ഉന്നതതല സമിതി യോഗത്തില് തീരുമാനമായി.
തിരുവനന്തപുരത്ത് നവീകരിച്ച ടാഗോര് തീയറ്ററിലായിരിക്കും സംസ്ഥാനതല ആഘോഷപരിപാടികള്. ഇത് സംബന്ധിച്ച് അന്തിമതീരുമാനം സാംസ്കാരിക വകുപ്പ് മന്ത്രിയുടെ അധ്യക്ഷതയില് ചേരുന്ന യോഗത്തില് കൈക്കൊള്ളും. കേരള ഭാഷാ ഇന്സ്റ്റിറ്റിയൂട്ട് പ്രസിദ്ധീകരണമായ ഭരണശബ്ദതാരാവലി പരിഷ്കരിച്ച് നവംബര് ഒന്നിന് പുനഃപ്രസിദ്ധീകരിക്കാനും തീരുമാനമായി. ഇതിനായി ഔദ്യോഗിക ഭാഷാ വകുപ്പില് നിന്നും ഒരു വിദഗ്ദ്ധന്റെ സേവനം ലഭ്യമാക്കും. മലയാളം ഭാഷാശൈലി പുസ്തകം തയാറാക്കാനും മലയാളം കംപ്യൂട്ടിങ് ലിപി പരിഷ്കരിക്കുന്നതിനും തീരുമാനമായി.
നവംബര് ഒന്നു മുതല് കേരളഗാനം ആലപിക്കാനും തീരുമാനിച്ചു. യോഗത്തില് സുഗതകുമാരി, കെ.എല്.മോഹനവര്മ, എം.ആര്.തമ്പാന്, ഔദ്യോഗിക ഭാഷാ വകുപ്പ് സ്പെഷ്യല് സെക്രട്ടറി, മലയാളം മിഷന് ഡയറക്ടര് തുടങ്ങിയവര് പങ്കെടുത്തു.
Discussion about this post