തിരുവനന്തപുരം: കേന്ദ്രത്തില് നിന്നുള്ള അധിക അരി വിഹിതം ലഭ്യമാകാത്ത സാഹചര്യമാണ് നിലവിലുള്ളതെന്നും, എ.പി.എല്, ബി.പി.എല് വിഹിതത്തില് കുറവുവരാതിരിക്കാന് കേന്ദ്രം അടിയന്തരമായി തീരുമാനം പുനപരിശോധിക്കണമെന്നും ഭക്ഷ്യവകുപ്പ് മന്ത്രി അനൂപ് ജേക്കബ്ബ് ആവശ്യപ്പെട്ടു.
പ്രതിമാസ അധിക വിഹിതമായ 30,000 ടണ് നിര്ത്തലാക്കരുതെന്ന് ആവശ്യപ്പെട്ട് കേന്ദ്രഭക്ഷ്യമന്ത്രി രാംവിലാസ് പസ്വാനെ സന്ദര്ശിച്ചിരുന്നു. ഇക്കാര്യം ആവശ്യപ്പെട്ട് മുഖ്യമന്ത്രി പ്രധാനമന്ത്രിക്ക് കത്തയയ്ക്കുകയും ചെയ്തു. എന്നാല് കേന്ദ്രത്തില് നിന്ന് അനുകൂല നിലപാട് ഇതുവരെ ഉണ്ടായിട്ടില്ല. ഇത് നീതീകരിക്കാനാവില്ല. കേന്ദ്ര നിലപാട് തിരുത്തുമെന്ന പ്രതീക്ഷയാണ് സംസ്ഥാനത്തിനുള്ളതെന്ന് മന്ത്രി തിരുവനന്തപുരത്ത് പറഞ്ഞു. കേരളം ഭക്ഷ്യധാന്യ കമ്മിയുള്ള സംസ്ഥാനമാണ്. ഭക്ഷ്യസുരക്ഷാ നിയമം നടപ്പിലാക്കുമ്പോള് കേന്ദ്രവിഹിതം കുറയ്ക്കരുതെന്ന നിലപാടാണ് കേരളത്തിനുള്ളതെന്നും മന്ത്രി പറഞ്ഞു. റേഷന് വ്യാപാരികളുമായി നടത്തിയ ചര്ച്ചയുടെ പശ്ചാത്തലത്തില് അവര് സമരത്തില് നിന്ന് പിന്മാറുന്നതായി അറിയിച്ചതായും മന്ത്രി പറഞ്ഞു. ഇന്ന് നെല്ലുസംരഭരണം ആരംഭിക്കുന്നതിന്റെ പശ്ചാത്തലത്തില് മില് ഉടമകളുമായും ചര്ച്ച നടത്തി. പ്രോസസിംഗ് ചാര്ജ്ജില് 25% വര്ദ്ധനവരുത്തി ക്വിന്റലിന് 180 രൂപ നല്കാമെന്ന് ഗവണ്മെന്റ് നിര്ദ്ദേശം വച്ചിട്ടുണ്ട്. ഇതിലധികം പ്രായോഗികമല്ല. മില്ലുടമകള് യോഗം ചേര്ന്നശേഷം തീരുമാനം അറിയിക്കും. പുതുക്കിയ റേഷന് കാര്ഡുകള് മാര്ച്ച് മാസത്തില് വിതരണം ചെയ്യാന് കഴിയുമെന്നാണ് പ്രതീക്ഷിക്കുന്നതെന്നും മന്ത്രി പറഞ്ഞു.
Discussion about this post