തിരുവനന്തപുരം: ഭരണഘടന ഉറപ്പുനല്കുന്ന അവകാശങ്ങളുടെയും ഐക്യരാഷ്ട്രസഭാ പ്രഖ്യാപനങ്ങളുടെയും അന്തസത്ത പാലിച്ചുകൊണ്ട് മനുഷ്യാവകാശങ്ങള് സംരക്ഷിക്കപ്പെടുന്നുണ്ടെന്ന് ഭരണകൂടവും, നിയമപാലകരും, ഉദ്യോഗസ്ഥരും ഉറപ്പാക്കണമെന്ന് ഗവര്ണര് പി.സദാശിവം പറഞ്ഞു. അന്തര്ദേശീയ മനുഷ്യാവകാശ ദിനത്തോടനുബന്ധിച്ച് സംസ്ഥാന മനുഷ്യാവകാശ കമ്മീഷന് തിരുവനന്തപുരത്ത് സംഘടിപ്പിച്ച ദിനാചരണം ഉദ്ഘാടനം ചെയ്യുകയായിരുന്നു അദ്ദേഹം.
ഐക്യരാഷ്ട്രസഭയുടെ മനുഷ്യാവകാശ പ്രഖ്യാപനത്തിന്റെ അന്തസത്ത ഉള്ക്കൊണ്ടുകൊണ്ടാണ് നമ്മുടെ ഭരണഘടനയ്ക്ക് രൂപം നല്കിയത്. സാധാരണ പൗരനൊപ്പം വധശിക്ഷയ്ക്ക് വിധിക്കപ്പെട്ട പ്രതിക്ക് പോലും മനുഷ്യാവകാശം ഉറപ്പാക്കുന്ന തരത്തിലുള്ളതാണ് നമ്മുടെ നീതിന്യായ വ്യവസ്ഥയും, സംവിധാനങ്ങളും. മനുഷ്യാവകാശം സംരക്ഷിക്കാനും, ലംഘനങ്ങള് ചെറുക്കാനുമുള്ള ഉത്തരവാദിത്തം പോലീസിനുണ്ട്. എന്നാല് പോലീസ് നടപടികളും മനുഷ്യാവകാശ സംരക്ഷണവും തമ്മില് പലപ്പോഴും സംഘര്ഷമുണ്ടാവാറുണ്ടെന്ന് ഗവര്ണര് പറഞ്ഞു. ഇത്തരം സാഹചര്യത്തില് നിയമം നടപ്പാക്കുന്ന സംവിധാനം എന്ന നിലയില് പോലീസ് ഭരണഘടനയുടെ സത്ത ഉള്ക്കൊണ്ട് പ്രവര്ത്തിക്കണമെന്ന് അദ്ദേഹം ആവശ്യപ്പെട്ടു. മനുഷ്യാവകാശ ലംഘനം ചെറുക്കുന്നതിലും, പുറത്തുകൊണ്ടുവരുന്നതിലും മാധ്യമങ്ങള് നിര്ണായക പങ്കുവഹിക്കുന്നുണ്ട്. മാധ്യമറിപ്പോര്ട്ടുകള് പലപ്പോഴും മനുഷ്യാവകാശ ലംഘനങ്ങള്ക്കെതിരെ നപടിയെടുക്കാന് കോടതികള്ക്ക് പ്രേരണയായിട്ടുണ്ട്. പൊതുതാത്പര്യ ഹര്ജികള് ഇക്കാര്യത്തില് മികച്ച ഉദാഹരണമാണെന്നും എന്നാല് ഇത് പ്രയോഗിക്കുന്നതില് സൂക്ഷ്മത വേണമെന്നും ഗവര്ണര് ആവശ്യപ്പെട്ടു. ഭരണകൂടം ജനക്ഷേമകരമായി പ്രവര്ത്തിക്കുന്നുവെന്ന് ഉറപ്പുവരുത്തണമെന്നും പി.സദാശിവം പറഞ്ഞു. സംസ്ഥാന മനുഷ്യാവകാശ കമ്മീഷന് പ്രസിദ്ധീകരിച്ച മനുഷ്യാവകാശ ബുള്ളറ്റിന് ഗവര്ണര് പി.സദാശിവം, ഡി.ജി.പി. ടി.പി.സെന്കുമാറിന് നല്കി പ്രകാശനം ചെയ്തു. സംസ്ഥാന മനുഷ്യാവകാശ കമ്മീഷന് അദ്ധ്യക്ഷന് ജസ്റ്റിസ് ജെ.ബി.കോശി, അംഗം കെ.മോഹന്കുമാര്, നിയമ സെക്രട്ടറി ബി.ജി.ഹരീന്ദ്രനാഥ്, സംസ്ഥാന പോലീസ് മേധാവി ടി.പി.സെന്കുമാര്, കമ്മീഷന് സെക്രട്ടറി കുമാരി സുധ തുടങ്ങിയവര് പങ്കെടുത്തു.
Discussion about this post