ഹര്യാന: വേദങ്ങളിലും ഹിന്ദു പുരാണങ്ങളിലും വ്യാപക പരാമര്ശമുള്ള സാങ്കല്പിക നദിയായ സരസ്വതി 4000 വര്ഷത്തെ അജ്ഞാതവാസത്തിനു ശേഷം തിരിച്ചെത്തുന്നു. കിഴക്ക് യമുനയ്ക്കും പടിഞ്ഞാറ് സത്ലജിനും മദ്ധ്യേ ഒഴുകിയിരുന്നുവെന്ന് ഋഗ്വേദത്തില് പരാമര്ശിക്കുന്ന ഈ നദി ഒരു മരുഭൂമിയില് വച്ചു വറ്റിവരണ്ടതായാണ് മഹാഭാരതത്തില് പറയുന്നത് ചരിത്രകാരന്മാരുടെ മതവും അതുതന്നെ. ഹര്യാന, പഞ്ചാബ്, രാജസ്ഥാന്, ഗുജറാത്ത്, പാക്കിസ്ഥാന്റെ ചില ഭാഗങ്ങള് എന്നിവിടങ്ങളിലുടെ നദി ഒഴുകിയിരുന്നുവെന്നാണു വിശ്വാസം.
സരസ്വതിയെ പുനരുജ്ജീവിപ്പിക്കാനുള്ള ഇപ്പോഴത്തെ കാരണം ഹര്യാന സര്ക്കാരിന്റെ നീക്കമാണ്. പണ്ട്, നദി ഒഴുകിയിരുന്ന യഥാര്ത്ഥ വഴി അന്വേഷിച്ചു കണ്ടെത്താനും അതു പുനരുജ്ജീവിപ്പിക്കാനും സര്ക്കാര് ഒരു സംഘത്തെ നിയോഗിക്കുകയുണ്ടായി. സരസ്വതിയുടെ അസ്സല് വഴി കണ്ടെത്താന് യമുനാ നഗര് ജില്ലയിലെ മുഗള്വാലി ഗ്രാമത്തില് എണ്പതോളം പേര് കുഴിച്ചുകൊണ്ടിരിക്കെ 8 അടി ആഴത്തില് വെള്ളം കണ്ടതാണ് അന്വേഷണത്തിന് ആക്കം കൂട്ടിയത്. സരസ്വതി നദി ഒഴുകിയിരുന്ന വഴി കണ്ടെത്താന് ഇക്കഴിഞ്ഞ ഏപ്രിലില് സര്ക്കാര് പദ്ധതി ആവിഷ്ക്കരിച്ചതിനു ശേഷം ഇതാദ്യമായാണ് സംഘം വെള്ളം കണ്ടെത്തുന്നത്.
“യമുന നഗര്, കുരുക്ഷേത്രം, കൈതല് ജില്ലകളിലെ സരസ്വതി നദിയുടെ അടിത്തട്ട് വൃത്തിയാക്കുകയും ആഴം കൂട്ടുകയും ചെയ്യുന്ന ജോലികള് ഊര്ജിതമായി നടന്നുവരികയാണ്” – ഔദ്യോഗിക വക്താവ് പറഞ്ഞു.
കാലവര്ഷം നദിയെ ഇപ്പോഴത്തെപ്പോലെ നിലനിര്ത്തും. എന്നാല്, വെള്ളം ഒഴുകുന്നത് ഉറപ്പാക്കാന് ഈ നദിയുടെ ഉദ്ഭവ സ്ഥാനമായ ആദിബദ്രിയില് രണ്ടാം ഘട്ടമായി ഒരു അണക്കെട്ട് നിര്മിക്കാന് തങ്ങള്ക്ക് പദ്ധതിയുണ്ടെന്ന് പ്രവര്ത്തനങ്ങള്ക്കു ചുക്കാന് പിടിക്കുന്ന സരസ്വതി പൈതൃക വികസന ബോര്ഡ് അധികൃതര് വ്യക്തമാക്കി. ഹര്യാനയിലെ മനോഹര് ലാല് ഘട്ടര് സര്ക്കാര്, പദ്ധതിക്കായി 50 കോടി രൂപ നീക്കിവച്ചിട്ടുണ്ട്. അപ്രത്യക്ഷമായ നദിയെ കണ്ടെത്തുന്നതിനു മോദി സര്ക്കാര് മുന്ഗണന നല്കുമെന്ന് കേന്ദ്ര ജലവിഭവകാര്യ വകുപ്പ് മന്ത്രി ഉമാഭാരതി 2014ല് പറഞ്ഞിരുന്നു. നദിയുടെ സാന്നിദ്ധ്യം കെട്ടുകഥയല്ലെന്നും ആയിരക്കണക്കിനു വര്ഷങ്ങള്ക്കു മുന്പ് ഭാരതത്തിലൂടെ സരസ്വതി ഒഴുകിയിരുന്നുവെന്നതിനു ശാസ്ത്രീയമായ തെളിവുണ്ടെന്നും അവര് അന്നു പറയുകയുണ്ടായി.
Discussion about this post