തിരുവനന്തപുരം: തേനീച്ചകൃഷി മേഖലയുടെ വികസനത്തിനുള്ള പദ്ധതികള്‍ക്ക് ബഡ്ജറ്റില്‍ പ്രത്യേക പരിഗണന നല്‍കുമെന്ന് കൃഷി മന്ത്രി വി.എസ്. സുനില്‍കുമാര്‍ പറഞ്ഞു. വി.ജെ.റ്റി. ഹാളില്‍ തേനുത്സവം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
കേരളത്തില്‍ ജൈവകാര്‍ഷിക നയം നടപ്പിലാക്കാനുള്ള സര്‍ക്കാര്‍ നടപടികള്‍ പുരോഗമിക്കുമ്പോള്‍ തേനീച്ച വളര്‍ത്തല്‍ ജൈവകൃഷിയുടെ വിജയത്തിന് ഏറ്റവും പ്രധാന ഘടകമായിട്ടാണ് സര്‍ക്കാര്‍ കാണുന്നത്. തേനീച്ച കര്‍ഷകര്‍ നേരിടുന്ന പ്രയാസങ്ങള്‍ പരിഹരിക്കാനുള്ള വിപുലമായ കര്‍മപരിപാടികള്‍ ആരംഭിക്കാന്‍ സര്‍ക്കാര്‍ പ്രതിജ്ഞാബദ്ധമാണെന്നും കേരളത്തില്‍ ഉടന്‍ ആരംഭിക്കുന്ന മൂന്ന് അഗ്രോ പാര്‍ക്കുകളിലൊന്ന് തേന്‍പഴവര്‍ഗങ്ങളുടെ മൂല്യ വര്‍ധിത ഉത്പന്ന നിര്‍മാണത്തിനും വിപണനത്തിനുമായി തൃശൂരില്‍ ആയിരിക്കുമെന്നും മന്ത്രി പറഞ്ഞു. യോഗത്തില്‍ തേനീച്ച കര്‍ഷകരുടെ മക്കള്‍ക്കുള്ള വിദ്യാഭ്യാസ പുരസ്‌കാരങ്ങള്‍ മന്ത്രി വിതരണം ചെയ്തു.
മുല്ലക്കര രത്‌നാകരന്‍ എം.എല്‍.എ, കാര്‍ഷികോത്പാദന കമ്മീഷണര്‍ ഡോ. രാജു നാരായണ സ്വാമി, ഹോര്‍ട്ടികള്‍ച്ചര്‍ മിഷന്‍ ഡയറക്ടര്‍ രഞ്ജന്‍ എസ്. കരിപ്പായി, കേരള കാര്‍ഷിക സര്‍വകലാശാല വിജ്ഞാന വ്യാപന വിഭാഗം മേധാവി ഡോ. എസ്. എസ്റ്റലിറ്റ, എം.ആര്‍. സജയകുമാര്‍, എ. അബ്ദുള്‍കലാം എന്നിവര്‍ സംബന്ധിച്ചു.
Discussion about this post