നാലുലക്ഷം കോടിയോളം രൂപയുടെ കള്ളപ്പണം ബാങ്കുകളിലെത്തി: ആദായനികുതി വകുപ്പ്

ന്യൂഡല്‍ഹി: 1000,500 നോട്ടു അസാധുവാക്കലിന് ശേഷം കണക്കില്‍പ്പെടാത്ത നാല് ലക്ഷത്തോളം കോടി രൂപ ബാങ്കുകളില്‍ നിക്ഷേപമായി എത്തിയതായി ആദായ നികുതി വകുപ്പ്. ആദായനികുതി വകുപ്പ് ഉദ്യോഗസ്ഥരെ ഉദ്ധരിച്ച് പ്രസ് ട്രസ്റ്റ് ഓഫ് ഇന്ത്യ(പിടിഐ) ആണ് ഇക്കാര്യം റിപ്പോര്‍ട്ട് ചെയ്തത്. മൂന്നു ലക്ഷത്തിനും നാലു ലക്ഷം കോടിക്കും ഇടയിലുള്ള തുകയുടെ കള്ളപ്പണം ബാങ്കുകളില്‍ എത്തിയതായാണ് പ്രാഥമിക വിവരം. ഈ നിക്ഷേപങ്ങളെക്കുറിച്ച് വിശദമായി അന്വേഷണം നടത്തുമെന്ന് ആദായനികുതി വകുപ്പ് വ്യക്തമാക്കി.

നിഷ്‌ക്രിയമായിരുന്ന അക്കൗണ്ടുകളിലും 25,000 കോടി രൂപ നിക്ഷേപിക്കപ്പെട്ടിട്ടുണ്ട്. നവംബര്‍ എട്ടിന് ശേഷം വായ്പ തിരിച്ചടവായി 80,000 കോടി രൂപയും ബാങ്കുകളിലെത്തി. 60 ലക്ഷം ബാങ്ക് അക്കൗണ്ടിലായി രണ്ട് ലക്ഷത്തിലധികം രൂപയുടെ വീതം നിക്ഷേപം വന്നു. വടക്കു കിഴക്കന്‍ സംസ്ഥാനങ്ങളിലെ വിവിധ ബാങ്ക് അക്കൗണ്ടുകളില്‍ മാത്രം 10,700 കോടി രൂപയുടെ നിക്ഷേപം വന്നു. വിവിധ സഹകരണ ബാങ്കുകളിലായി എത്തിയ 16000 കോടി രൂപയുടെ ഉറവിടവും അന്വേഷിക്കുമെന്നും ആദായനികുതി വകുപ്പ് അറിയിച്ചു.