കൊച്ചി: കുംഭഭരണി മഹോത്സവത്തിന് പ്രസിദ്ധിയാര്ജ്ജിച്ച ചെട്ടികുളങ്ങര ദേവീക്ഷേത്രത്തിലെ പ്രധാന ആചാര അനുഷ്ഠാനങ്ങള്ക്ക് പേറ്റന്റ് ലഭിച്ചു. ക്ഷേത്രവുമായി ബന്ധപ്പെട്ട ചില പ്രത്യേക നാമധേയങ്ങള്ക്കാണ് പേറ്റന്റ് ലഭിച്ചിട്ടുള്ളത്.
ഭൗതിക സംരക്ഷണ നിയമപ്രകാരം രജിസ്റ്റര് ചെയ്ത പേരുകളുടെ പരിപൂര്ണ്ണ ഉത്തരവാദിത്വവും പരിരക്ഷയും ക്ഷേത്രാവകാശികളായ 13 കരക്കാരുടെ ഏകീകൃത സംഘടനയായ ശ്രീദേവി വിലാസം ഹിന്ദുമത കണ്വന്ഷനില് നിക്ഷിപ്തമായിരിക്കുമെന്ന് ക്ഷേത്ര ഭാരവാഹികള് ആലപ്പുഴയില് വാര്ത്താസമ്മേളനത്തില് വ്യക്തമാക്കി. പേറ്റന്റ് കിട്ടിയ ആചാരങ്ങള് പരമ്പരാഗത രീതിയില് നിന്ന വഴിമാറി അനുകരിക്കുന്നത് തടയാനും ഇത് സഹായകരമാകുമെന്ന് ഭാരവാഹികള് വ്യക്തമാക്കി. പരമ്പരാഗതമായി ഇവിടുത്തെ ആചാരവുമായി ബന്ധപ്പെട്ട് ഉപയോഗിക്കുന്ന പേരുകളാണ് ഇവ.
കുത്തിയോട്ടം, ചൂരല്മുറിയല്, കുതിരമൂട്ടില് കഞ്ഞി, തേരുംമൂട്ടില് കഞ്ഞി, ചെട്ടികുളങ്ങര കുംഭഭരണി ലോകത്തിലെ ഏറ്റവും വലിയ കെട്ടുകാഴ്ച മഹോത്സവം, മദ്ധ്യതിരുവിതാംകൂറിലെ ദേശീയോത്സവം, കാഴ്ചയുടെ പൂരം, ചെട്ടികുളങ്ങര കെട്ടുകാഴ്ചകള്, ചെട്ടികുളങ്ങര അമ്മ, ചെട്ടികുളങ്ങര ഭഗവതി, ചെട്ടികുളങ്ങര അമ്മ ഓണാട്ടുകര പരദേവ, ചെട്ടികുളങ്ങര ക്ഷേത്രം എന്നീ പേരുകളാണ് തര്ക്കമില്ലാതെ അംഗീകരിച്ച് രജിസ്റ്റര് ചെയ്തിരിക്കുന്നത്. തിരുവിതാംകൂര് ദേവസ്വം ബോര്ഡിന് കീഴിലാണ് ചെട്ടികുളങ്ങര ക്ഷേത്രം.
Discussion about this post