പെരുമ്പാവൂര്‍: ഇതര സംസ്ഥാന തൊഴിലാളികളിലെ നിരക്ഷരരെ കണ്ടെത്താനുള്ള സര്‍വേ പെരുമ്പാവൂര്‍ വല്ലം കൊച്ചങ്ങാടി കവലയില്‍ തുറമുഖ വകുപ്പു മന്ത്രി രാമചന്ദ്രന്‍ കടന്നപ്പള്ളി ഉദ്ഘാടനം ചെയ്തു. ഇതോടെ ഇതര സംസ്ഥാന തൊഴിലാളികളെ സാക്ഷരരാക്കുന്നതിനുള്ള സംസ്ഥാന സാക്ഷരതാമിഷന്‍ അതോറിറ്റിയുടെ പദ്ധതിയ്ക്ക് പെരുമ്പാവൂരില്‍ തുടക്കമായി.
രാജ്യത്തിനു തന്നെ മാതൃകയാകാവുന്ന പദ്ധതിയെ സംസ്ഥാന സര്‍ക്കാര്‍ ഏറെ ഗൗരവത്തോടെയാണ് നോക്കിക്കാണുന്നതെന്ന് അദ്ദേഹം പറഞ്ഞു. നവോത്ഥാനകാലത്ത് അധ:സ്ഥിതരുടെ വിദ്യാഭ്യാസത്തിനുവേണ്ടി നടന്ന അവകാശപ്രക്ഷോഭത്തിനുശേഷം അനൗപചാരിക വിദ്യാഭ്യാസമേഖലയില്‍ മറ്റൊരു വിപ്ലകരമായ മുന്നേറ്റം ഉണ്ടാക്കാന്‍ ഈ പദ്ധതിയ്ക്കു കഴിയും. ഇതര സംസ്ഥാന തൊഴിലാളികളോടുള്ള മലയാളികളുടെ പൊതുസമീപനം മാറ്റാനും അതിലൂടെ കേരളത്തിന്റെ അന്തസ്സ് ഉന്നതിയിലെത്തിക്കാനും പദ്ധതിയിലൂടെ സാധിക്കുമെന്നും മന്ത്രി പറഞ്ഞു. സര്‍വേ, സാക്ഷരതാ ക്ലാസ്സുകള്‍, വിവിധ പരിശീലനങ്ങള്‍, ബോധവല്‍ക്കരണ പരിപാടികള്‍, കലോത്സവം, സാക്ഷരതാ പരീക്ഷ, സര്‍ട്ടിഫിക്കറ്റ് വിതരണം എന്നിവയാണ് പദ്ധതിയുമായി ബന്ധപ്പെട്ട പ്രധാന പ്രവര്‍ത്തനങ്ങള്‍. ആറുമാസമാണ് ക്ലാസുകളുടെ ദൈര്‍ഘ്യം. ആഴ്ചയില്‍ ചുരുങ്ങിയത് അഞ്ചു മണിക്കൂറാണ് ക്ലാസുകള്‍. പഠിതാക്കളുടെ സൗകര്യാര്‍ത്ഥമായിരിക്കും പഠനകേന്ദ്രങ്ങള്‍. അടുത്ത വര്‍ഷം സെപ്റ്റംബര്‍ വരെ മാതൃക സാക്ഷരതാ പദ്ധതി പെരുമ്പാവൂര്‍ നഗരസഭയില്‍ നടപ്പാക്കും. തുടര്‍ന്നു സംസ്ഥാന വ്യാപകമായി നടപ്പാക്കും.
പഠിതാക്കളെ കണ്ടെത്തി അടുത്തമാസം ക്ലാസുകള്‍ തുടങ്ങാനാണു ലക്ഷ്യമിടുന്നത്. ഇതര സംസ്ഥാനക്കാരുടെ ക്യാമ്പുകള്‍, ലൈബ്രറികള്‍, വിദ്യാകേന്ദ്രങ്ങള്‍, സ്‌കൂളുകള്‍, പൊതു സ്ഥാപനങ്ങള്‍ എന്നിവിടങ്ങളിലായിരിക്കും ക്ലാസുകള്‍. ജൂണ്‍ അവസാനവാരം പരീക്ഷയും ലോകസാക്ഷരതാ ദിനമായ സെപ്റ്റംബര്‍ എട്ടിന് സര്‍ട്ടിഫിക്കറ്റ് വിതരണവും നടത്തും. സംസ്ഥാന സാക്ഷരതാമിഷന്‍ അതോറിറ്റിയുടെ നേതൃത്വത്തില്‍ തദ്ദേശ സ്വയംഭരണം, തൊഴില്‍, സാമൂഹികക്ഷേമ വകുപ്പുകളുടെയും കുടുംബശ്രീ, സംസ്ഥാന ലൈബ്രറി കൗണ്‍സില്‍, യുവജനക്ഷേമ ബോര്‍ഡ്, ഡയറ്റ്,സ്റ്റേറ്റ് റിസോഴ്‌സ് സെന്റര്‍എന്നിവയുടെയും സഹകരണത്തോടെയാണു പദ്ധതി നടപ്പാക്കുന്നത്.
ഇതര സംസ്ഥാന തൊഴിലാളികളെ മലയാളത്തിലും ഹിന്ദിയിലും സാക്ഷരരാക്കുന്നതിനുള്ള പദ്ധതി സംസ്ഥാനത്തൊട്ടാകെ ലക്ഷ്യമിടുന്നത് 25 ലക്ഷത്തോളം ഉത്തരേന്ത്യന്‍ തൊഴിലാളികളെയാണ്. 15 വയസ്സിനു മുകളില്‍ പ്രായമുള്ള ഇതര സംസ്ഥാന തൊഴിലാളികളെ സര്‍വേയിലൂടെ കണ്ടെത്തിയാണ് പദ്ധതി നടപ്പാക്കുന്നത്. 25 ലക്ഷത്തിലധികം ഉത്തരേന്ത്യന്‍ തൊഴിലാളികളില്‍ ഭൂരിപക്ഷവും പുരുഷന്‍മാരാണ്. 18 നും 29 നും ഇടയില്‍ പ്രായമുള്ളവര്‍. സംസാരഭാഷ ഹിന്ദിയാണെങ്കിലും ഹിന്ദിയിലും മലയാളത്തിലും ഇവര്‍ നിരക്ഷരരാണ്. പദ്ധതിയുടെ ഭാഗമായി ആരോഗ്യം, പരിസ്ഥിതി, നിയമം തുടങ്ങിയ വിഷയങ്ങളിലും കേരളത്തിന്റെ സാമൂഹികസാംസ്‌കാരിക ജീവിതരീതിയെക്കുറിച്ചും ബോധവല്‍ക്കരിക്കും. ഇവരുടെ കലാകായികശേഷി പരിപോഷിപ്പിക്കുക, ഇവര്‍ നേരിടുന്ന മനുഷ്യാവകാശ ധ്വംസനങ്ങള്‍ തടയുക, ജീവിത ഗുണനിലവാരം മെച്ചപ്പെടുത്തുക, സാക്ഷരതാമിഷന്റെ തുല്യതാ പരിപാടികളിലൂടെ തുടര്‍പഠനത്തിന് അവസരമൊരുക്കുക, ഇവരെ കേരളത്തിന്റെ വികസനത്തിലും സാംസ്‌കാരിക പ്രവര്‍ത്തനങ്ങളിലും പങ്കാളികളാക്കുക തുടങ്ങിയവയാണു പദ്ധതിയുടെ ലക്ഷ്യങ്ങള്‍.
ജനുവരി 26ന് തുടങ്ങിയ സര്‍വേ നടത്തുന്നത് മാറംപിള്ളി എം.ഇ.എസ് കോളജ് വിദ്യാര്‍ഥികളാണ്. ഇവര്‍ക്കുള്ള പരിശീലന ക്ലാസ് വി.പി. സജീന്ദ്രന്‍ എംഎം.എല്‍.എ ഉദ്ഘാടനം ചെയ്തു. നഗരസഭാധ്യക്ഷ സതി ജയകൃഷ്ണന്‍ അധ്യക്ഷത വഹിച്ചു. എല്‍ദോസ് കുന്നപ്പിള്ളി എം.എല്‍.എ, സംസ്ഥാന സാക്ഷരതാമിഷന്‍ ഡയറക്ടര്‍ ഡോ.പി.എസ്. ശ്രീകല, കോളജ് മാനേജിങ് കമ്മിറ്റി അംഗങ്ങളായ എം.എ. മുഹമ്മദ്, ഡോ. കെ.എ. മുഹമ്മദ്, ഇതര സംസ്ഥാന തൊഴിലാളി സാക്ഷരതാ പദ്ധതിയുടെ കോര്‍ഡിനേറ്റര്‍ ഇ.വി.അനില്‍കുമാര്‍, സാക്ഷരതാമിഷന്‍ ജില്ലാ കോര്‍ഡിനേറ്റര്‍ വി.വി.മാത്യു തുടങ്ങിയവര്‍ പ്രസംഗിച്ചു.
Discussion about this post