ആലുവ: ബലിതര്‍പ്പണത്തിനും മറ്റുമായി ശിവരാത്രി ദിനത്തില്‍ അദ്വൈതാശ്രമത്തിലേക്ക് വരുന്ന വാഹനങ്ങള്‍ തടയുന്നത് ഒഴിവാക്കണമെന്ന് ആശ്രമം സെക്രട്ടറി ശിവസ്വരൂപാനന്ദ സ്വാമി ആവശ്യപ്പെട്ടു. ആശ്രമത്തിലേക്ക് ബലിതര്‍പ്പണത്തിനായി വരുന്ന ഭക്തജനങ്ങളുടെ സ്വകാര്യ വാഹനങ്ങളടക്കം പമ്പ് കവലയിലും പുളിഞ്ചോട്ടിലും പറവൂര്‍ കവലയിലും ഗതാഗത നിയന്ത്രണത്തിന്റെ പേരില്‍ തടയുകയാണ്. എല്ലാ വര്‍ഷവും ഇത് ഒഴിവാക്കണമെന്ന് ആവശ്യപ്പെടാറുണ്ടെങ്കിലും നടപടികളില്ലാത്തത് ആശ്രമത്തോടുള്ള അധികൃതരുടെ ബോധപൂര്‍വമായ അവഗണനയാണ്. ആറ് വര്‍ഷത്തോളമായി ഇത് തുടരുന്നു. പലവട്ടം അധികാരികളെ കണ്ടിട്ടും പ്രയോജനമുണ്ടായില്ല. ശിവരാത്രി മണപ്പുറത്തോളം തന്നെ പ്രാധാന്യമുള്ള അദ്വൈതാശ്രമത്തെ അവഗണിക്കുകയാണ്. ആശ്രമത്തില്‍ തന്നെ ബലിതര്‍പ്പണം നടത്തേണ്ട ആയിരക്കണക്കിന് ഭക്തരുണ്ട്. ഇവര്‍ക്ക് സുഗമമായി ഇവിടെയെത്താന്‍ അവസരം ഒരുക്കേണ്ടതുണ്ടെന്നും, കെ.എസ്.ആര്‍.ടി.സര്‍വീസുകള്‍ക്ക് പാര്‍ക്കിങ്ങിനായി ആശ്രമത്തിന്റെ സ്‌കൂള്‍ ഗ്രൗണ്ട് ശിവരാത്രി ദിവസം വിട്ടു നല്‍കാന്‍ തയ്യാറാണെന്നും സ്വാമി അറിയിച്ചു.
ശിവരാത്രി ദിനത്തില്‍ അദ്വൈതാശ്രമത്തിലേക്ക് വരുന്ന വാഹനങ്ങള്‍ തടയരുത്: സ്വാമി ശിവസ്വരൂപാനന്ദ
പുതിയ വാർത്തകൾ
