തിരുവനന്തപുരം: പൊതുജനാരോഗ്യത്തിന് ദോഷകരമായ രീതിയില്‍ പ്രവര്‍ത്തിക്കുന്ന ആരോഗ്യസ്ഥാപനങ്ങളെ നിയന്ത്രിക്കേണ്ടത് അനിവാര്യമാണെന്ന് ആരോഗ്യമന്ത്രി കെ കെ ഷൈലജ പറഞ്ഞു. തിരുവനന്തപുരം കനകകുന്ന് കൊട്ടാരത്തില്‍ നടന്ന ലോക ഡെന്റിസ്റ്റ് ദിനാചരണത്തിന്റെ ഉദ്ഘാടനം നിര്‍വ്വഹിക്കുകയായിരുന്നു മന്ത്രി.
ആരോഗ്യ പ്രശ്‌നങ്ങളുണ്ടാക്കുന്ന സാഹചര്യങ്ങളില്ല എന്ന് ഉറപ്പ് വരുത്തുന്നതിനായി എല്ലാ ആരോഗ്യസ്ഥാപനങ്ങളും രജിസ്റ്റര്‍ ചെയ്യപ്പെടണം. അതാണ് ക്ലിനിക്കല്‍ എസ്റ്റാബ്ലിഷ്‌മെന്റ് ബില്‍ കൊണ്ട് അര്‍ത്ഥമാക്കുന്നത്. പുകയില ഉത്പന്നങ്ങള്‍ ഉപയോഗിക്കുന്നതില്‍ നിന്നും രോഗികളെ വിലക്കുന്ന തരത്തിലുള്ള ബോധവത്കരണം നടത്താന്‍ ദന്ത ഡോക്ടര്‍മാര്‍ പരിശ്രമിക്കണമെന്നും മന്ത്രി ആവശ്യപ്പെട്ടു. 2016 ലെ മികച്ച ദന്തഡോക്ടര്‍മാര്‍ക്കുള്ള അവാര്‍ഡ് ദാനവും ഏറ്റവും കൂടുതല്‍ ഡെന്റല്‍ തുടര്‍ വിദ്യാഭ്യാസ പരിപാടി സംഘടിപ്പിച്ചതിനുള്ള പുരസ്‌കാരദാനവും മന്ത്രി നിര്‍വഹിച്ചു.
ചടങ്ങില്‍ കെ മുരളീധരന്‍ എം എല്‍ എ അദ്ധ്യക്ഷനായിരുന്നു. ഡെന്റല്‍ കൗണ്‍സില്‍ പ്രസിഡന്റ് ഷാജി കെ ജോസഫ്, ജോയിന്റ് ഡി എം ഇ ജോളി മേരി വര്‍ഗീസ്, ഡെന്റല്‍ കൗണ്‍സില്‍ രജിസ്ട്രാര്‍ ഭദ്രന്‍ എസ് തുടങ്ങിയവര്‍ സംബന്ധിച്ചു. ഡോ. പ്രശാന്തില ജനം, ഡോ. വര്‍ഗീസ് മാണി, ഡോ. ഹര്‍ഷ കുമാര്‍ .കെ, ഡോ. സന്തോഷ് കുമാര്‍ പി. എന്നിവര്‍ മികച്ച ദന്തഡോക്ടര്‍മാര്‍ക്കുളള പുരസ്‌കാരങ്ങള്‍ ഏറ്റുവാങ്ങി. ഏറ്റവും കൂടുതല്‍ ഡെന്റല്‍ തുടര്‍വിദ്യാഭ്യാസ പരിപാടി സംഘടിപ്പിച്ചതിനുളള പുരസ്‌കാരം ഐ.ഡി.എ മലബാര്‍, തൃപ്പൂണിത്തുറ ബ്രാഞ്ചുകള്‍ നേടി
Discussion about this post