തൃശൂര്: സംസ്ഥാനത്തെ മറ്റ് ഉത്സവങ്ങള്ക്ക് മാതൃകയാകും വിധം തൃശൂര് പൂരത്തിന്റെ നടത്തിപ്പ് മാറ്റി തീര്ക്കുമെന്ന് കൃഷി മന്ത്രി അഡ്വ.വി.എസ്.സുനില്കുമാര് അറിയിച്ചു.പെസോയുടെ നിബന്ധയോടെയും ഭരണകൂടത്തിന്റെ നിര്ദ്ദേശങ്ങള് മാനിച്ചുമാണ് പൂരം നടത്തുക. പെസോ ഉന്നത ഉദ്യോഗസ്ഥരുടെയും പോലീസിന്റെയും ജില്ലാ ഭരണകൂടത്തിന്റെയും സുരക്ഷാ അവലോകനയോഗ ശേഷം സംസാരിക്കുകയായിരുന്നു മന്ത്രി വി.എസ്.സുനില്കുമാര്.
യോഗ ശേഷം സ്വരാജ് റൗണ്ടില് 32 ഫയര് ഹൈഡ്രന്റ് സ്ഥാപിച്ചതിന്റെ പരീക്ഷണ പ്രവര്ത്തനം നടന്നു. ഫയര് ഹൈഡ്രന്റിന്റെ ഉദ്ഘാടനം ഇന്ന് വൈകീട്ട് 4 ന് നടക്കും. സ്വരാജ് റൗണ്ടിന്റെ 75 ശതമാനം പ്രദേശവും ഫയര് ഹൈഡ്രന്ററിന്റെ പരിധിയില് വരും. അംഗീകരിച്ച രാസപദാര്ത്ഥം ഉപയോഗിച്ച് നിബന്ധനകള്ക്ക് വിധേയമാണ് പെസോ പൂരം വെടിക്കെട്ടിന് അനുമതി നല്കിയിട്ടുളളത്. സുരക്ഷാ ക്രമീകരണങ്ങളില് പെസോ സംതൃപ്തി രേഖപ്പെടുത്തിയിട്ടുണ്ട്. തൃശൂര് പുരത്തിന്റെ സുരക്ഷാക്രമീകരണങ്ങളുടെ മാതൃകയില് എക്സപ്ലോസീവ് നിയമത്തിന് ഭേദഗതി വരുത്തുന്നത് കേന്ദ്രത്തിന്റെ ശ്രദ്ധയില്പ്പെടുത്തുമെന്ന് ചെന്നൈ ജോയിന്റെ ചീഫ് കണ്ട്രോളര് ഡോ.എ.കെ.യാദവ് പറഞ്ഞു.
വിദൂര നിയന്ത്രിത ഫയര് ഹൈഡ്രന്റ് അടുത്ത വര്ഷത്തെ പൂരത്തിന് മുന്പ് (ഹൈ വോള്യം ലോങ്ങ് റേഞ്ച്) സ്ഥാപിക്കാന് നടപടി ആരംഭിക്കുമെന്ന് മന്ത്രി അഡ്വ.വി.എസ്.സുനില്കുമാര് അറിയിച്ചു. വിദൂരത്തു നിന്ന് കൊളുത്താന് കഴിയുന്ന വെടിക്കോപ്പുകള് ഏര്പ്പെടുത്താന് കഴിയുമോ എന്നതും പരിശോധിച്ചു വരികയാണെന്നും മന്ത്രി കൂട്ടിച്ചേര്ത്തു. എ.ഡി.എം സി.കെ.അനന്തകൃഷ്ണന്, തൃശൂര് ഐ.ജി. എം.ആര്.അജിത് കുമാര്, ജില്ലാ പോലീസ് മേധാവി ടി.നാരായണ്, ഡെപ്യൂട്ടി കളക്ടര്മാര്, ഹൈദ്രബാദ് ഡെപ്യൂട്ടി ചീഫ് കണ്ട്രോളര് ആര്.വേണുഗോപാല്, എറണാകുളം ഡെപ്യൂട്ടി കണ്ട്രോളര് എസ്.കന്ദസ്വാമി, ചെന്നൈ ഡെപ്യൂട്ടി ചീഫ് കണ്ട്രോളര് സുമിരന്കുമാര് തുടങ്ങിയവര് സംബന്ധിച്ചു.
Discussion about this post