കൊച്ചി: മൂന്ന് ദിവസത്തെ സന്ദര്‍ശനത്തിനായി ബിജെപി ദേശീയ അദ്ധ്യക്ഷന്‍ അമിത് ഷാ നാളെ കേരളത്തിലെത്തും. ജൂണ്‍ 2, 3, 4 തീയതികളില്‍ അദ്ദേഹത്തിന്റെ കേരള സന്ദര്‍ശനം. അടുത്ത പാര്‍ലമെന്റ് തെരഞ്ഞെടുപ്പിന് മുന്നോടിയായി നടത്തുന്ന ദേശീയ പര്യടനത്തിന്റെ ഭാഗമായിട്ടാണ് അമിത് ഷാ കേരളത്തില്‍ എത്തുന്നത്.
നാളെ രാവിലെ 10ന് കൊച്ചിയിലെത്തുന്ന അമിത് ഷായ്ക്ക് ഉജ്ജ്വലവരവേല്‍പ്പാണ് ബിജെപി ഒരുക്കിയിരിക്കുന്നത്. ഒരു ദിവസം കൊച്ചിയിലും രണ്ട് ദിവസം തിരുവനന്തപുരത്തുമാണ് അമിത്ഷായുടെ പരിപാടികള്‍.
ബിജെപി കോര്‍ കമ്മിറ്റി യോഗത്തിലും എന്‍ഡിഎ നേതൃയോഗത്തിലും അദ്ദേഹം പങ്കെടുക്കും. ലോക്‌സഭാ തെരഞ്ഞെടുപ്പിനുളള മുന്നൊരുക്കങ്ങള്‍ പ്രധാന ചര്‍ച്ചയാകും. സംസ്ഥാനത്തെ രാഷ്ട്രീയ-സാംസ്‌കാരിക രംഗത്തെ പ്രമുഖരുമായും അമിത് ഷാ കൂടിക്കാഴ്ച നടത്തും.
പുതുതായി നിര്‍മ്മിക്കുന്ന പാര്‍ട്ടി സംസ്ഥാന കാര്യാലയത്തിന് നാലിന് രാവിലെ അമിത്ഷാ തറക്കല്ലിടും. 46000 ചതുരശ്ര അടിയില്‍ നാലുനില കെട്ടിടമാണ് പണിയുന്നത്. കേരളത്തില്‍ എന്‍ഡിഎ യുടെ അടിത്തറ വികസിപ്പിക്കാനുള്ള ചര്‍ച്ചകളിലും അമിത്ഷാ പങ്കെടുക്കും.
Discussion about this post