* ഓണത്തിന് 100 സ്റ്റാളുകള്‍, 25 കോടിയുടെ വില്‍പന ലക്ഷ്യം * സര്‍ക്കാര്‍ ജീവനക്കാര്‍ക്ക് ഉത്പന്നം വാങ്ങാന്‍ കൂപ്പണ്‍ സംവിധാനം, ഗഡുക്കളായി നല്‍കാം
ആലപ്പുഴ: കയര്‍ മേഖലയുടെ വികസനത്തിനായി അടുത്ത അഞ്ചുവര്‍ഷം കൊണ്ട് 1000 കോടി രൂപ മുടക്കുമെന്ന് ധനകാര്യകയര്‍ വകുപ്പു മന്ത്രി ഡോ. റ്റി.എം. തോമസ് ഐസക് പറഞ്ഞു. ജില്ലാ ആസൂത്രണ സമിതി ഹാളില്‍ നടന്ന കയര്‍കേരള 2017 സംഘാടകസമിതി രൂപീകരണ യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
ഓണത്തിന് കയര്‍ ഉത്പന്ന വിപണന മേളകള്‍ നടത്താന്‍ സംസ്ഥാനത്ത് 100 സ്റ്റാളുകള്‍ തുടങ്ങും. 50 ശതമാനം വരെ വിലകുറച്ചാണ് ഉത്പന്നങ്ങള്‍ വില്‍ക്കുക. ഇതിലൂടെ 25 കോടി രൂപയുടെ വില്‍പന ലക്ഷ്യമിടുന്നു. സര്‍ക്കാര്‍ ജീവനക്കാര്‍ക്ക് കയര്‍ ഉത്പന്നങ്ങള്‍ വാങ്ങാന്‍ ആയിരം രൂപയുടെ കൂപ്പണ്‍ സംവിധാനം ഏര്‍പ്പെടുത്തും. ശമ്പളത്തില്‍നിന്ന് ഗഡുക്കളായി ഈ തുക ഈടാക്കുന്ന നിലയിലാണ് കൂപ്പണ്‍ നല്‍കുക. കയര്‍ തടുക്കുകള്‍ സര്‍ക്കാര്‍ ഓഫീസുകളില്‍ വാങ്ങി ഉപയോഗിക്കാം. വീടുകളിലും ഫ്‌ളാറ്റുകളിലുമെത്തിയുള്ള ഉത്പന്ന വില്‍പനയും ആലോചിക്കുന്നു.
ഒക്‌ടോബറില്‍ ആലപ്പുഴയിലെ ബോംബെ കയര്‍ കമ്പനി പുനസ്ഥാപിക്കും. ആസ്പിന്‍വാള്‍ എറ്റെടുക്കും. ആഭ്യന്തര വിപണനത്തിന് പ്രാധാന്യം നല്‍കുന്ന പുതിയ വിപണന രീതിയാണ് ഉപയോഗിക്കുക. മറ്റു സംസ്ഥാനങ്ങളില്‍ മൊത്തക്കച്ചവട വിപണന ശൃംഖലകള്‍ തീര്‍ക്കും. മാനേജീരിയല്‍ സബ്‌സിഡി, പ്രവര്‍ത്തന മൂലധനം എന്നീ ഇനങ്ങളിലായി സംഘങ്ങള്‍ക്ക് 23 കോടി രൂപ അനുവദിക്കും. മുന്‍കാലത്ത് പല സ്‌കീമുകള്‍ക്കായി നല്‍കിയിട്ട് ചെലവാക്കാതെ കിടക്കുന്ന ആറരക്കോടി രൂപ പ്രവര്‍ത്തന മൂലധനമായി ഉപയോഗിക്കാന്‍ അനുവാദം നല്‍കി. ഏറ്റവും ആധുനികമായ ഓട്ടോമാറ്റിക് ഫീഡിങ് സ്പിന്നിങ് യന്ത്രമാണ് സഹകരണസംഘങ്ങള്‍ക്ക് നല്‍കാനുദ്ദേശിക്കുന്നത്. 150 സംഘങ്ങള്‍ക്ക് ഇത് നല്‍കും.
പരമ്പരാഗത രീതിയില്‍ ഉത്പാദിപ്പിക്കുന്ന കയര്‍ കയര്‍ഫെഡ് സംഭരിച്ച് പണം നല്‍കും. കേരളത്തില്‍ ഉത്പാദിപ്പിക്കുന്ന തൊണ്ടിന്റെ മൂന്നിലൊന്ന് ചകിരിയാക്കിമാറ്റി ക്ഷാമം പരിഹരിക്കും. കുടുംബശ്രീയുമായി സഹകരിച്ച് ഇതിനായി 1000 ഡീഫൈബറിങ് യൂണിറ്റുകളാണ് പഞ്ചായത്തുകളില്‍ സ്ഥാപിക്കുന്നത്. 400 രൂപയെങ്കിലും തൊഴിലാളികള്‍ക്ക് ഉറപ്പുവരുത്തി. ചകിരി കയര്‍ഫെഡ് സംഭരിച്ച് സംഘങ്ങള്‍ക്ക് നല്‍കും. കയര്‍വ്യവസായ സഹകരണ സംഘങ്ങളെ സമൂലമായി പുനസംഘടിപ്പിക്കുന്ന പദ്ധതി എന്‍.സി.ഡി.സി.ക്ക് സമര്‍പ്പിച്ചു. കയറ്റുമതിക്ക് യോഗ്യമായ കയര്‍ ഉത്പാദിപ്പിക്കുകയാണ് ലക്ഷ്യം.
കയര്‍ ഭൂവസ്ത്രം ഉപയോഗിക്കുന്നതിനുള്ള കാമ്പയിന്‍ 14 ജില്ലയിലും നടത്തി. തൊഴിലുറപ്പു പദ്ധതിയുടെ ഭാഗമായി ഒരു പഞ്ചായത്ത് 10 ലക്ഷം രൂപയുടെ കയര്‍ഭൂവസ്ത്രം ഉപയോഗിച്ചാല്‍ തന്നെ പ്രശ്‌നങ്ങള്‍ മാറും. കയര്‍മേഖലയെ ഉത്പന്ന വൈവിധ്യവത്കരണത്തിലേക്ക് മാറ്റും. മാറ്റത്തിന് കയര്‍ വകുപ്പും തയാറെടുക്കുന്നു. ഉദ്യോഗസ്ഥര്‍ക്കായി മൂന്നു ദിവസത്തെ പ്രത്യേക ക്യാമ്പ് സംഘടിപ്പിക്കും. മൊത്തം മാറ്റം വരുത്തുകയാണ് ലക്ഷ്യമെന്നും മന്ത്രി പറഞ്ഞു.
Discussion about this post