തിരുവനന്തപുരം: കേരളം ജലസുഭിക്ഷ സംസ്ഥാനമല്ലെന്നും സംസ്ഥാനത്തിന് അര്ഹമായ ജലം ലഭ്യമാക്കുന്നതിന് ഗൗരവപൂര്ണമായ ഇടപെടലുകളുണ്ടാവണമെന്നും മുഖ്യമന്ത്രി പിണറായി വിജയന് പറഞ്ഞു. അന്തര് സംസ്ഥാന നദീജല കരാറുകളും നദീജല വിഷയങ്ങളും കേരളത്തിനുള്ള ജല ലഭ്യതയും സംബന്ധിച്ച് സംഘടിപ്പിച്ച ചര്ച്ചയില് സംസാരിക്കുകയായിരുന്നു അദ്ദേഹം.
ഓരോ തുള്ളി വെള്ളവും അമൂല്യമാണെന്നുള്ള ഒരു പൊതു സമീപനം നമുക്കുണ്ടാവണം. അന്തര് സംസ്ഥാന നദീജല കേസുകള് കൈകാര്യം ചെയ്യാന് സംസ്ഥാന താത്പര്യം എല്ലാ അര്ത്ഥത്തിലും സംരക്ഷിക്കുമെന്നുറപ്പുള്ള ഏറ്റവും പ്രഗദ്ഭരായ സുപ്രീം കോടതി അഭിഭാഷകരെ നിയോഗിച്ചിട്ടുണ്ട്. അവരെ സഹായിക്കാന് പരിചയ സമ്പന്നരായ അഭിഭാഷകരെ സംസ്ഥാനത്തും നിയോഗിക്കും. ഇതു കൂടാതെ സര്ക്കാര് തലത്തിലും ഉദ്യോഗസ്ഥര് തമ്മിലും നടത്തേണ്ട ചര്ച്ചകള് ഫലപ്രദമായി നടക്കണമെന്നും സംസ്ഥാന താത്പര്യം സംരക്ഷിക്കലാണ് ഏറ്റവും പ്രധാനമെന്നും മുഖ്യമന്ത്രി പറഞ്ഞു.
വെള്ളത്തിന്റെ കാര്യത്തില് സംസ്ഥാനങ്ങള് തമ്മില് സംഘര്ഷമുണ്ടായേക്കാം. എന്നാല് സംഘര്ഷങ്ങളിലേക്കു പോകാതെ മറ്റു സംസ്ഥാനങ്ങളുമായി മാന്യമായി കാര്യങ്ങള് ചര്ച്ച ചെയ്യുക എന്ന നിലപാടാണ് സര്ക്കാരിനുള്ളത്. മുഖ്യമന്ത്രി എന്ന നിലയില്, ഈ വിഷയത്തില് തമിഴ്നാട് മുഖ്യമന്ത്രിക്കു കത്തയച്ചത് നല്ല ചുവടുവയ്പായിരുന്നു എന്നും അദ്ദേഹം പറഞ്ഞു. നദീ ജലം സംബന്ധിച്ച് കോടതിയിലും പുറത്തുമുള്ള തര്ക്കങ്ങള് രമ്യമായി പരിഹരിച്ച് അവകാശപ്പെട്ട ജലം നേടിയെടുക്കുക എന്നത് സര്ക്കാരിന്റെ ഏറ്റവും പ്രധാന ഉത്തരവാദിത്വമാണെന്ന് സ്വാഗതപ്രസംഗത്തില് ജലവിഭവ മന്ത്രി മാത്യു ടി. തോമസ് പറഞ്ഞു.
Discussion about this post