തിരുവനന്തപുരം: പരമ്പരാഗത വ്യവസായ മേഖലയോടും ഖാദിത്തൊഴിലാളികളോടും പ്രതിബദ്ധതയുള്ള സര്ക്കാരാണ് ഇപ്പോഴത്തേതെന്ന് മുഖ്യമന്ത്രി പിണറയി വിജയന് പറഞ്ഞു. ഓണം ബക്രീദ് ഖാദി മേളയുടെ സംസ്ഥാനതല ഉദ്ഘാടനം നിര്വഹിച്ച് സംസാരിക്കുകയായിരുന്നു മുഖ്യമന്ത്രി.
രാജ്യത്തിന്റെ ചരിത്രത്തില് ഖാദിക്കും ഖാദിപ്രസ്ഥാനത്തിനും വലിയ ഇടമുണ്ട്. സ്വാതന്ത്ര്യാനന്തര ഭാരതത്തില് ഖാദിയുടെ പ്രസക്തിയും പ്രാധാന്യവും ഉയര്ത്തിപ്പിടിക്കാനാണ് ഖാദി വ്യവസായ കമ്മീഷനും ഖാദി ബോര്ഡും രൂപീകരിക്കപ്പെട്ടത്. സംസ്ഥാനത്ത് പതിമൂവായിരത്തോളം തൊഴിലാളികള് ഖാദി മേഖലയിലും പതിനായിരത്തിലധികം പേര് ഗ്രാമവ്യവസായമേഖലയിലും തൊഴിലെടുക്കുന്നുണ്ട്. ഇത്രയധികം പേര്ക്ക് നേരിട്ട് തൊഴില് നല്കുന്ന ഖാദിവ്യവസായത്തിന് ഉത്സവകാല വിപണനമേളകള് ഏറെ പ്രാധാന്യമുള്ളതാണെന്നും മുഖ്യമന്ത്രി പറഞ്ഞു.
ഖാദിബോര്ഡിന്റെ പ്രവര്ത്തനങ്ങള് സുതാര്യമാക്കുമെന്നും തൊഴിലാളികളുടെ അധ്വാനഭാരം കുറച്ച് ഉത്പാദനക്ഷമത വര്ധിപ്പിക്കാനുള്ള നടപടികള് സ്വീകരിക്കുമെന്നും ചടങ്ങില് അധ്യക്ഷത വഹിച്ച വ്യവസായ വകുപ്പുമന്ത്രി എ.സി. മൊയ്തീന് പറഞ്ഞു. ഖാദി മേളയിലെ ആദ്യ വില്പന ജയലക്ഷ്മിക്കു നല്കി വ്യവസായമന്ത്രി നിര്വഹിച്ചു.
സമ്മാനകൂപ്പണ് വിതരണോദ്ഘാടനം മേയര് വി.കെ. പ്രശാന്ത് നിര്വഹിച്ചു. ഖാദിബോര്ഡ് വൈസ് ചെയര്മാന് എം.വി. ബാലകൃഷ്ണന് മാസ്റ്റര്, ഖാദി ആന്ഡ് വില്ലേജ് ഇന്ഡസ്ട്രീസ് കമ്മീഷന് സംസ്ഥാന ഡയറക്ടര് കെ.പി. ലളിതാമണി, ഖാദി ബേഅര്ഡ് അംഗം കെ. ധനഞ്ജയന്, കേരള ഖാദി ഗ്രാമ വ്യവസായ ഫെഡറേഷന് സെക്രട്ടറി കെ.പി. ഗോപാല പൊതുവാള്, കേരള ഖാദി ഗ്രാമ വ്യവസായ അസോസിയേഷന് സെക്രട്ടറി വി. കേശവന്, കേരള ഗാന്ധി സ്മാരക നിധി സെക്രട്ടറി കെ.ജി. ജഗദീശന് തുടങ്ങിയവര് സംബന്ധിച്ചു
Discussion about this post