തൃശൂര്‍: പി.സി.ജോര്‍ജ് എംഎല്‍എയ്‌ക്കെതിരേ രൂക്ഷ വിമര്‍ശനവുമായി ആക്രമിക്കപ്പെട്ട യുവനടി രംഗത്ത്. തനിക്കെതിരേ ജോര്‍ജ് നടത്തുന്ന പ്രസ്താവനകളില്‍ ദുഃഖവും അമര്‍ഷവും ഉണ്ടെന്ന് നടി പറഞ്ഞു. വനിതാ കമ്മീഷന്‍ ചെയര്‍പേഴ്‌സണ്‍ എം.സി.ജോസഫൈന്‍ കൊച്ചിയില്‍ ആക്രമിക്കപ്പെട്ട നടിയുടെ വീട്ടിലെത്തി അവരുമായി സംസാരിച്ചു.
തനിക്കെതിരെ നിരന്തരം പ്രസ്താവനകള്‍ നടത്തുന്ന ജോര്‍ജിനെതിരെ നടി വനിതാ കമ്മീഷന്‍ മുന്പാകെ പരാതി ഉന്നയിച്ചു. ജോര്‍ജിന്റെ പ്രസ്താവനയില്‍ വേദനയും അമര്‍ഷവുമുണ്ട്. പ്രസ്താവനകള്‍ തുടരുന്നത് വേദനിപ്പിക്കുന്നതാണെന്നും ജനപ്രതിനിധിയില്‍ നിന്ന് ഇത്തരം പരാമര്‍ശം പ്രതീക്ഷിച്ചില്ലെന്നും നടി പറഞ്ഞു. മറ്റൊരു സ്ത്രീക്കും ഇത്തരമൊരു ദുരനുഭവമുണ്ടാകരുതെന്നും അവര്‍ കമ്മീഷന്‍ മുന്പാകെ പറഞ്ഞു.
നടിയോട് ധൈര്യമായിരിക്കാനും എല്ലാം നേരിടാന്‍ കഴിയണമെന്നും കേസും നടപടികളുമായി മുന്നോട്ടുപോകണമെന്നും കമ്മീഷന്‍ ആവശ്യപ്പെട്ടു.
നടിക്കെതിരേ അപകീര്‍ത്തികരമായി സംസാരിക്കുന്ന ജോര്‍ജിനെതിരേ നടപടി സ്വീകരിക്കാന്‍ വനിതാ കമ്മീഷന്‍ കഴിഞ്ഞ ദിവസം സ്പീക്കറുടെ അനുമതി തേടിയിരുന്നു. സ്പീക്കര്‍ പി.ശ്രീരാമകൃഷ്ണനും കഴിഞ്ഞ ദിവസം ജോര്‍ജിനെതിരേ വിമര്‍ശനവുമായി രംഗത്തുവന്നിരുന്നു.
Discussion about this post