കൊച്ചി: നരേന്ദ്ര മോദി മന്ത്രിസഭയിലെ കേരളത്തില്‍ നിന്നുള്ള ആദ്യ പ്രതിനിധിയായ അല്‍ഫോന്‍സ് കണ്ണന്താനത്തിന് വിപുലമായ സ്വീകരണമൊരുക്കാന്‍ ബിജെപി കേരള നേതൃത്വം തീരുമാനിച്ചു. ഞായറാഴ്ച കേരളത്തിലെത്തുന്ന കണ്ണന്താനത്തിന് സംസ്ഥാനത്തെ വിവിധ നഗരങ്ങള്‍ സ്വീകരണം നല്‍കും. സംസ്ഥാന അധ്യക്ഷന്‍ കുമ്മനം രാജശേഖരന്റെ നേതൃത്വത്തിലായിരിക്കും സ്വീകരണമൊരുക്കുക.
ഞായറാഴ്ച നെടുമ്പാശേരി വിമാനത്താവളത്തില്‍ എത്തുന്ന കണ്ണന്താനത്തെ സംസ്ഥാന അധ്യക്ഷനും നേതാക്കളും പ്രവര്‍ത്തകരും ചേര്‍ന്ന് വരവേല്‍ക്കും. നെടുമ്പാശേരിയിലെ സ്വീകരണത്തിന് ശേഷം കണ്ണന്താനം ജന്മദേശമായ കാഞ്ഞിരപ്പള്ളിയില്‍ നടക്കുന്ന റോഡ് ഷോയില്‍ പങ്കെടുക്കും. എല്‍ഡിഎഫ് സ്വതന്ത്രനായി കാഞ്ഞിരപ്പള്ളിയില്‍ നിന്നും നിയമസഭയില്‍ സാന്നിധ്യമറിയിച്ചയാളാണ് അദ്ദേഹം.
മധ്യകേരളത്തിലെ മറ്റ് സ്വീകരണ പരിപാടികള്‍ക്ക് ശേഷം തിങ്കളാഴ്ച കണ്ണൂരിലാകും മന്ത്രിക്ക് സ്വീകരണം നല്‍കുക. 16-നാണ് തലസ്ഥാനത്ത് മന്ത്രിക്ക് സ്വീകരണം ഒരുക്കിയിരിക്കുന്നത്.
