തിരുവനന്തപുരം: ഷാര്‍ജ ഭരണാധികാരിയും യു. എ. ഇ സുപ്രീം കൗണ്‍സില്‍ അംഗവുമായ ഡോ. ഷേക്ക് സുല്ത്താന് ബിന്‍ മുഹമ്മദ് അല്‍ ഖാസിമി രാജ്ഭവനിലെത്തി ഗവര്‍ണറുമായി കൂടിക്കാഴ്ച നടത്തി. രാവിലെ 11 മണിയോടെയാണ് അദ്ദേഹം രാജ്ഭവനില്‍ എത്തിയത്. ഗവര്‍ണര്‍ പി. സദാശിവവും മുഖ്യമന്ത്രി പിണറായി വിജയനും ബൊക്കെ നല്‍കി അദ്ദേഹത്തെ സ്വീകരിച്ചു. തുടര്‍ന്നായിരുന്നു ഗവര്‍ണറുമായി സൗഹൃദ സംഭാഷണം. ഗവര്‍ണര്‍ക്ക് അദ്ദേഹം പ്രത്യേക ഉപഹാരവും സമ്മാനിച്ചു. മുഖ്യമന്ത്രി പിണറായി വിജയന്‍, തദ്ദേശസ്വയംഭരണ മന്ത്രി ഡോ. കെ. ടി. ജലീല്‍, ചീഫ് സെക്രട്ടറി ഡോ. കെ. എം. എബ്രഹാം, ഇന്ത്യയിലെ യു. എ. ഇ അംബാസഡര്‍ അഹമ്മദ് അല്‍ബന്ന എന്നിവര്‍ സന്നിഹിതരായിരുന്നു.
ഇതിനു ശേഷം ഷാര്‍ജ ഭരണാധികാരി മുഖ്യമന്ത്രിയും സംസ്ഥാന മന്ത്രിമാരുമായും ചര്‍ച്ച നടത്തി. മന്ത്രിമാരായ ഇ. ചന്ദ്രശേഖരന്‍, എ. സി. മൊയ്തീന്‍, പ്രൊഫ. സി. രവീന്ദ്രനാഥ്, കെ. കെ. ശൈലജ ടീച്ചര്‍, ജെ. മെഴ്‌സിക്കുട്ടിഅമ്മ, കടകംപള്ളി സുരേന്ദ്രന്‍, രാമചന്ദ്രന്‍ കടന്നപ്പള്ളി, ഡോ. കെ. ടി. ജലീല്‍, ജി. സുധാകരന്‍, മാത്യു ടി. തോമസ്. ഡോ. ടി. എം. തോമസ് ഐസക്ക്, വി. എസ്. സുനില്‍കുമാര്‍, ചീഫ് സെക്രട്ടറി ഡോ. കെ. എം. എബ്രഹാം, മുഖ്യമന്ത്രിയുടെ ചീഫ് പ്രിന്‍സിപ്പല്‍ സെക്രട്ടറി നളിനി നെറ്റോ, മുഖ്യമന്ത്രിയുടെ സെക്രട്ടറി വി. എസ്. സെന്തില്‍, ഓഫീസര്‍ ഓണ്‍ സ്‌പെഷ്യല്‍ ഡ്യൂട്ടി എം. ശിവശങ്കര്‍, അഡീഷണല്‍ ചീഫ് സെക്രട്ടറിമാര്‍, ഇന്ത്യയുടെ യു. എ. ഇ അംബാസഡര്‍ നവ്ദീപ് സൂരി എന്നിവര്‍ പങ്കെടുത്തു. ഷേക്ക് സുല്ത്താന് ബിന്‍ അഹമ്മദ് അല്‍ ഖാസിമി, ഷേക്ക് സലേം ബിന്‍ അബ്ദുള്‍ റഹ്മാന്‍ അല്‍ ഖാസിമി, ഷേക്ക് ഫാഹിം ബിന്‍ സുല്ത്താന് അല്‍ ഖാസിമി, അബ്ദുള്ള ബിന്‍ മൊഹമ്മദ് അല്‍ ഒവൈസ്, മൊഹമ്മദ് ഒബൈദ് അല്‍ സാബി, മുഹമ്മദ് ഹുസൈന്‍ ഖലാഫ്, അഹമ്മദ് സലേം അല്‍ ബയ്‌റാക്ക്, ഇന്ത്യയിലെ യു. എ. ഇ അംബാസഡര്‍ അഹമ്മദ് അല്‍ബന്ന, ജമാല്‍ ഹുസൈന്‍ അല്‍ സാബി എന്നിവരാണ് യു. എ. ഇ സംഘത്തിലുണ്ടായിരുന്നത്.
മുഖ്യമന്ത്രി പിണറായി വിജയന്‍ സുല്‍ത്താനെയും ഒപ്പമുള്ളവരെയും യോഗത്തിലേക്ക് സ്വാഗതം ചെയ്തു. ഇതിനു ശേഷം മന്ത്രിമാരെ പരിചയപ്പെടുത്തി. ഷാര്‍ജ ഭരണാധികാരിക്കൊപ്പമെത്തിയവര്‍ സ്വയം പരിചയപ്പെടുത്തി. മന്ത്രിസഭാംഗങ്ങള്‍ക്ക് മലയാളത്തില്‍ പരിഭാഷപ്പെടുത്തിയ സുല്‍ത്താന്റെ ജീവചരിത്രം വിതരണം ചെയ്തു. കേരളത്തിനും ഷാര്‍ജയ്ക്കും താത്പര്യമുള്ള വിഷയങ്ങളില്‍ സഹകരിക്കുന്നത് സംബന്ധിച്ച് മുഖ്യമന്ത്രി വിശദീകരിച്ച ശേഷം വിവിധ മേഖലകളിലെ സംസ്ഥാനത്തിന്റെ സാധ്യതകള്‍ ഉള്‍ക്കൊള്ളിച്ച ഹ്രസ്വചിത്രം പ്രദര്‍ശിപ്പിച്ചു. കേരളത്തിന്റെ പദ്ധതി നിര്‍ദ്ദേശങ്ങള്‍ സുല്ത്താന് മുന്നില്‍ സമര്‍പ്പിച്ചു.
തുടര്‍ന്ന് ഷേക്ക് സുല്ത്താന് ബിന്‍ മുഹമ്മദ് അല്‍ ഖാസിമി സംസാരിച്ചു. ഇരുകൂട്ടര്‍ക്കും സഹകരിക്കാന്‍ സാധിക്കുന്ന വിഷയങ്ങളില്‍ ഒരുമിച്ച് പോകാന്‍ തീരുമാനിച്ചു. വലിയ ഉരുവിന്റെ മാതൃക ഷാര്‍ജ സുല്ത്താന് മുഖ്യമന്ത്രി സമ്മാനിച്ചു. ഷേക്ക് സുല്ത്താന് ബിന്‍ മുഹമ്മദ് അല്‍ ഖാസിമിക്കായി രാജ്ഭവനില്‍ ഗവര്‍ണര്‍ ഉച്ചവിരുന്ന് ഒരുക്കിയിരുന്നു.
Discussion about this post