കൊച്ചി: ഇന്ത്യന് ഓയില് കോര്പറേഷന്റെ പുതുവൈപ്പ് എല്പിജി ടെര്മിനല് നിര്മാണവുമായി ബന്ധപ്പെട്ട് സംസ്ഥാനസര്ക്കാര് നിയോഗിച്ച സമിതി ഒക്ടോബര് അവസാനത്തോടെ റിപ്പോര്ട്ട് സമര്പ്പിക്കും. എറണാകുളം ഗവ ഗസ്റ്റ്ഹൗസില് നടന്ന സിറ്റിങിനും പുതുവൈപ്പ് സന്ദര്ശനത്തിനും ശേഷം മാധ്യമപ്രവര്ത്തകരോട് സംസാരിക്കുകയായിരുന്നു സമിതിയംഗങ്ങള്.
ഐഒസിയുടെ പദ്ധതിയെക്കുറിച്ചുള്ള എല്ലാ വിശദാംശങ്ങളും പരിശോധിക്കുകയും ചോദിച്ചറിയുകയും ചെയ്തെന്ന് സമിതി ചെയര്മാന് നാഷണല് സെന്റര് ഫോര് എര്ത്ത് സയന്സ് സ്റ്റഡീസ് ഡയറക്ടര് ഡോ എന് പൂര്ണചന്ദ്രറാവു പറഞ്ഞു. ഇന്ത്യന് ഓയില് കോര്പറേഷന് അധികൃതര്, പുതുവൈപ്പ് നിവാസികള്, വിവിധ രാഷ്ട്രീയപാര്ട്ടികളുടെ പ്രതിനിധികള് തുടങ്ങി പദ്ധതിയുമായി ബന്ധപ്പെട്ട എല്ലാവരുടെയും അഭിപ്രായങ്ങള് ശേഖരിച്ചിട്ടുണ്ട്. നേരത്തെ തിരുവനന്തപുരത്ത് സമിതി രണ്ടു യോഗങ്ങള് ചേര്ന്ന് രേഖകള് പരിശോധിച്ചിരുന്നു.
പദ്ധതിയുടെ സാങ്കേതികവും സാമൂഹികവുമായ എല്ലാ വശങ്ങളും പരിശോധിക്കും. പദ്ധതിയുമായി ബന്ധപ്പെട്ട എല്ലാ രേഖകളും ശേഖരിച്ച അഭിപ്രായങ്ങളും പരിശോധിച്ചശേഷം ഒക്ടോബര് അവസാനത്തോടെ റിപ്പോര്ട്ട് സമര്പ്പിക്കുമെന്നും ഡോ എന് പുര്ണചന്ദ്രറാവു പറഞ്ഞു. നാഷണല് സെന്റര് ഫോര് എര്ത്ത് സയന്സ് സ്റ്റഡീസ് ഡയറക്ടര് ഡോ എന് പൂര്ണചന്ദ്രറാവു, മുന് ചീഫ് ടൗണ്പ്ളാനര് ഈപ്പന് വര്ഗീസ്, എന്സിഇഎസ്എസ് മുന് ശാസ്ത്രജ്ഞന് കെ വി തോമസ് എന്നിവരാണ് സമിതിയംഗങ്ങള്.
ജില്ലാ കളക്ടര് കെ മുഹമ്മദ് വൈ സഫീറുള്ള, അസിസ്റ്റന്റ് കളക്ടര് ഈശപ്രിയ, മുഖ്യമന്ത്രിയുടെ ശാസ്ത്ര ഉപദേഷ്ടാവ് എംസി ദത്തന്, എന്സിഇഎസ്എസിലെ ഡോ കെ കെ രാമചന്ദ്രന്, ഡോ പ്രകാശ്, ഡോ രമേശന്, ജോണ് മത്തായി തുടങ്ങിയവര് സിറ്റിങില് പങ്കെടുത്തു.
Discussion about this post