നെയ്യാറ്റിന്കര: ബോണക്കാട് കുരിശുമല തീര്ഥാടകരെ തടഞ്ഞതിനെ ചൊല്ലിയുള്ള പ്രക്ഷോഭം വിതുരയിലേക്ക് മാറ്റുന്നു. കാണിത്തടം ചെക്പോസ്റ്റില് നിന്ന് സമരം വിതുരയിലേക്ക് മാറ്റാനാണ് തീരുമാനമായിരിക്കുന്നത്.
വിതുരയില് സംസ്ഥാന പാത തടയുന്നത് അടക്കമുള്ള സമരത്തിനാണ് നീക്കം നടക്കുന്നത്. സംഘര്ഷത്തെ തുടര്ന്ന് തഹസില്ദാറും സഭാനേതൃത്വവുമായി സമവായ ചര്ച്ചനടന്നു. ചര്ച്ചയില് 15 പേരെ കുരിശുമലയിലേക്ക് കടത്തിവിടാമെന്ന് തഹസില്ദാര് അറിയിച്ചു. എന്നാല് ഇത് അംഗീകരിക്കില്ലെന്നും മുഴുവന് വിശ്വാസികളേയും കടത്തിവിടണമെന്ന് അവര് നിലപാട് എടുത്തു.
ഏറ്റവും ഒടുവില് പ്രതിപക്ഷ നേതാവ് ഇടപെട്ട് വനംമന്ത്രിയുമായി ചര്ച്ചനടത്തി പുതിയ ഫോര്മുല മുന്നോട്ടുവച്ചിട്ടുണ്ട്. 50 പേരടങ്ങുന്ന രണ്ട് സംഘങ്ങളെ കുരിശുമലയിലേക്ക് പ്രാര്ത്ഥന നടത്താന് അനുമതി നല്കണമെന്ന് പ്രതിപക്ഷ നേതാവ് നിര്ദേശം മുന്നോട്ടുവച്ചിട്ടുണ്ട്.
നെയ്യാറ്റിന്കര രൂപതയ്ക്ക് കീഴിലെ തീര്ഥാടന കേന്ദ്രമായ ബോണക്കാട് കുരിശുമലയിലേക്കുള്ള വിശ്വാസികളുടെ സന്ദര്ശനം രാവിലെ പോലീസ് തടഞ്ഞതിനെത്തുടര്ന്ന് സംഘര്ഷമുണ്ടായിരുന്നു. പിരിഞ്ഞു പോകാന് കൂട്ടാക്കാത്തവര്ക്കുനേരെ പോലീസ് ലാത്തിവീശി. ജനക്കൂട്ടം പോലീസിന് നേരെ കല്ലേറ് നടത്തി. പോലീസും തിരിച്ച് കല്ലെറിഞ്ഞു. ബാരിക്കേഡുകള് തള്ളിമാറ്റാന് ശ്രമിച്ചതോടെ പോലീസ് ലാത്തിവീശി. ലാത്തിച്ചാര്ജിലും കല്ലേറിലും പോലീസുകാരടക്കം നിരവധിപ്പേര്ക്ക് പരിക്കേറ്റു. വനഭൂമിയില് കുരിശുസ്ഥാപിക്കാന് പാടില്ലെന്നു ഹൈക്കോടതി ഉത്തരവ് നിലനില്ക്കുന്നതിന്റെ പശ്ചാത്തലത്തിലാണ് പോലീസ് ജനക്കൂട്ടത്തെ തടഞ്ഞത്.
