തിരുവനന്തപുരം: പൊതുജനങ്ങള്ക്ക് പോലീസ് സ്റ്റേഷനുകളിലും മറ്റ് പോലീസ് ഓഫീസുകളിലും നേരിട്ടെത്താതെ വിവിധ സേവനങ്ങള് ഓണ്ലൈനായി ലഭ്യമാക്കുന്ന പുതിയ സിറ്റിസണ് പോര്ട്ടല് ‘തുണ’ പ്രവര്ത്തനം തുടങ്ങി. മുഖ്യമന്ത്രി പിണറായി വിജയന് പോര്ട്ടലിന്റെ ഉദ്ഘാടനം നിര്വഹിച്ചു. www.thuna.keralapolice.gov.in ല് രജിസ്റ്റര് ചെയ്ത് ലോഗിന് ചെയ്യാം.
തുണ സിറ്റിസണ് പോര്ട്ടലിലൂടെ ഏതു സ്റ്റേഷനിലേക്കും ഓണ്ലൈനായി പരാതി സമര്പ്പിക്കാം. ഓണ്ലൈന് പരാതിയുടെ തല്സ്ഥിതി അറിയാനും സാധിക്കും. പോലീസ് സ്റ്റേഷനില് രജിസ്റ്റര് ചെയ്ത കേസുകളുടെ എഫ്.ഐ.ആര് പകര്പ്പ് ഓണ്ലൈനില് ലഭിക്കും. പോലീസ് വെരിഫിക്കേഷന് സര്ട്ടിഫിക്കറ്റിനും ഓണലൈനായി അപേക്ഷിക്കാം. കാണാതായ വ്യക്തികളുടെ പേരു വിവരം ലഭിക്കാനും കാണാതായവരെക്കുറിച്ച് ലഭിക്കുന്ന വിവരങ്ങള് ഓണ്ലൈനായി നല്കാനും തുണയില് സംവിധാനമുണ്ട്.
സംശയകരമായ സാഹചര്യങ്ങളില് കാണപ്പെടുന്ന വസ്തുക്കള്, വ്യക്തികള്, സംഭവങ്ങള് എന്നിവയെക്കുറിച്ച് പോലീസിന് രഹസ്യവിവരങ്ങള് നല്കാനും പോര്ട്ടല് പ്രയോജനപ്പെടും. പ്രധാനപ്പെട്ട കോടതി ഉത്തരവുകള്, വിധികള്, പോലിസ് മാന്വല്, സ്റ്റാന്ഡിംഗ് ഓര്ഡറുകള്, ക്രൈം ഇന് ഇന്ത്യ എന്നിവയുടെ ഓണ്ലൈന് ലൈബ്രറി സൗകര്യവുമുണ്ട്. സമ്മേളനങ്ങള്, കലാപ്രകടനങ്ങള്, സമരങ്ങള്, ജാഥകള്, പ്രചാരണ പരിപാടികള് എന്നിവയ്ക്ക് പോലീസിന്റെ അനുവാദത്തിന് ഓണ്ലൈനായി അപേക്ഷ സമര്പ്പിക്കാം. ഉച്ചഭാഷിണി പ്രവര്ത്തിപ്പിക്കാനുള്ള അപേക്ഷ ഓണ്ലൈനായി സമര്പ്പിക്കാനും സാധിക്കും.
പോലീസിന്റെ പ്രവര്ത്തനങ്ങളെക്കുറിച്ചുള്ള അഭിപ്രായങ്ങളും നിര്ദേശങ്ങളും സമര്പ്പിക്കാം. എസ്.എം.എസ്., ഇ-മെയില് എന്നിവ വഴി പൊതുജനങ്ങള്ക്ക് ജാഗ്രതാനിര്ദേശം നല്കാനും കഴിയും. പോര്ട്ടല് വഴി ലഭിക്കുന്ന പരാതികളും സേവനങ്ങള്ക്കുള്ള അപേക്ഷകളും സമയബന്ധിതമായി തീര്പ്പാക്കുക വഴി ഇതിന്റെ ഫലപ്രാപ്തി വര്ധിപ്പിക്കണമെന്ന് മുഖ്യമന്ത്രി നിര്ദേശിച്ചു.
കേരള പോലീസിനെ സാങ്കേതികവിദ്യയില് മുന്നിലെത്തിക്കുന്നതിനുള്ള പദ്ധതികളുടെ ഭാഗമാണ് ഈ സംവിധാനമെന്ന് ആമുഖപ്രഭാഷണം നടത്തിയ സംസ്ഥാന പോലീസ് മേധാവി ലോക്നാഥ് ബെഹറ പറഞ്ഞു. സംസ്ഥാനത്തെ 661 ഓഫീസുകളുമായി ഈ സംവിധാനത്തെ ബന്ധപ്പെടുത്തിയിട്ടുണ്ടെന്ന് പദ്ധതിയുടെ നോഡല് ഓഫീസര് കൂടിയായ എസ്.സി.ആര്.ബി. എഡിജിപി ടോമിന് തച്ചങ്കരി പറഞ്ഞു. എ.പി.ബറ്റാലിയന് ഡി.ഐ.ജി. ഷെഫിന് അഹമ്മദ് പദ്ധതി വിശദീകരണം നടത്തി.
വിജിലന്സ് ഡയറക്ടര് ഡോ. എന്.സി. അസ്താന, ഡി.ജി.പി. എന്.ശങ്കര് റെഡ്ഡി, എഡിജിപി ഡോ.ബി.സന്ധ്യ, തിരുവന്തപുരം റെയ്ഞ്ച് ഐ.ജി. മനോജ് എബ്രഹാം, ക്രൈം ബ്രാഞ്ച് ഡി.ഐ.ജി. കെ സേതുരാമന്, ഇന്ഫര്മേഷന് കമ്മ്യൂണിക്കേഷന് ആന്റ് ടെക്നോളജി എസ്.പി.ജെ.ജയനാഥ്, സിസ്റ്റം അനലിസ്റ്റ് മാത്യൂ സൈമണ് തുടങ്ങിയവര് ചടങ്ങില് പങ്കെടുത്തു.
Discussion about this post