തിരുവനന്തപുരം: കാലവര്ഷക്കെടുതിയും ഉരുള്പൊട്ടലുണ്ടായ സ്ഥലത്ത് ദുരന്തനിവാരണസേന എത്താന് വൈകിയതു ചര്ച്ച ചെയ്യണമെന്ന് ആവശ്യപ്പെട്ട് സമര്പ്പിച്ച അടിയന്തിര പ്രമേയ നോട്ടീസിന് അനുമതി നിഷേധിച്ചതോടെ പ്രതിപക്ഷം നിയമസഭ ബഹിഷ്കരിച്ചു. പാറയ്ക്കല് അബ്ദുള്ള എംഎല്എയാണ് അടിയന്തിര പ്രമേയത്തിന് നോട്ടീസ് നല്കിയത്. സംസ്ഥാനത്തെ റവന്യൂ വകുപ്പ് പരാജയമാണെന്നും ദുരന്തനിവാരണ സേന പിരിച്ചുവിടണമെന്നും പ്രതിപക്ഷ നേതാവ് ആവശ്യപ്പെട്ടു.
കരിഞ്ചോലമലയില് ദുരന്തനിവാരണസേന രക്ഷാപ്രവര്ത്തനങ്ങള്ക്ക് എത്താന് വൈകിയെന്നും മുഖ്യമന്ത്രി കരിഞ്ചോലമല സന്ദര്ശിക്കണമെന്നും പ്രതിപക്ഷം സഭയില് ആവശ്യപ്പെട്ടു.
അതേസമയം കട്ടിപ്പാറ കരിഞ്ചോലയില് എല്ലാവിധത്തിലുള്ള രക്ഷപ്രവര്ത്തനവും നടന്നുവെന്ന് റവന്യു മന്ത്രി ഇ. ചന്ദ്രശേഖരന് പറഞ്ഞു. മന്ത്രിമാര് കോഴിക്കോട്ട് ക്യാന്പ് ചെയ്ത് രക്ഷാപ്രവര്ത്തനങ്ങള്ക്ക് നേതൃത്വം നല്കിയെന്നും മന്ത്രി പറഞ്ഞു. സര്ക്കാരിനു സാധിക്കുന്ന എല്ലാ സഹായവും മേഖലയില് ചെയ്തുവെന്നും മന്ത്രി അടിയന്തപ്രമേയത്തിന് മറുപടിയായി പറഞ്ഞു. ഇതോടെ സ്പീക്കര് നോട്ടീസിന് അനുമതി നിഷേധിക്കുകയായിരുന്നു.
Discussion about this post