തിരുവനന്തപുരം: ബിജെപി സര്‍ക്കാര്‍ തുടര്‍ന്ന് വീണ്ടും അധികാരത്തിലെത്തിയാല്‍ കേരളജനതയുടെ വിശ്വാസങ്ങളും ആചാരങ്ങളും സംരക്ഷിക്കാന്‍ കഴിയുന്നതെല്ലാം ചെയ്യുമെന്ന് അനന്തപുരിയില്‍ തടിച്ചുകൂടിയ വന്‍ജനാവലിയെ സാക്ഷിയാക്കി പ്രധാനമന്ത്രി നരേന്ദ്രമോദി പറഞ്ഞു. വിശ്വാസങ്ങള്‍ക്കും ആചാരാനുഷ്ഠാനുങ്ങള്‍ക്കും ഭരണഘടനാപരമായ സംരക്ഷണം ഉറപ്പുവരുത്തും. തിരുവനന്തപുരം സെന്‍ട്രല്‍ സ്റ്റേഡിയത്തില്‍ തെക്കന്‍ജില്ലകളിലെ എന്‍.ഡി.എ സ്ഥാനാര്‍ത്ഥികളുടെ തിരഞ്ഞെടുപ്പ് പ്രചാരണയോഗം ഉദ്ഘാടനം ചെയ്യുകയായിരുന്നു അദ്ദേഹം.
കോണ്‍ഗ്രസിനെയും സി.പി.എമ്മിനെയും കടുത്ത ഭാഷയില്‍ നരേന്ദ്രമോദി വിമര്‍ശിച്ചു. ഇരുമുന്നണികളും കേരളത്തില്‍ പരസ്പരം പോരടിക്കുകയും ഡല്‍ഹിയില്‍ എത്തുമ്പോള്‍ കൈകോര്‍ക്കുകയും ചെയ്യുന്ന അവസരവാദ രാഷ്ട്രീയ നയമാണ് കൈക്കൊള്ളുന്നതെന്ന് മോദി പരിഹസിച്ചു.
കേരളത്തിലെ പ്രശസ്തനായ ശാസ്ത്രജ്ഞന്‍ നമ്പി നാരായണനോടു കോണ്‍ഗ്രസ് എന്താണ് ചെയ്തതെന്നു നിങ്ങള്‍ക്കറിയാം. നമ്പി നാരായണനോടു കോണ്‍ഗ്രസ് ചെയ്തത് ക്രൂരതയാണ്. നമ്പി നാരായണനോടു ചെയ്ത ദ്രോഹത്തിന് ആര്‍ക്കെങ്കിലും ക്ഷമിക്കാനാകുമോയെന്നും മോദി ചോദിച്ചു. ഇന്ത്യ ഒരു തരത്തിലും ഭയപ്പെടേണ്ടതില്ല. രാജ്യത്തിന് സുരക്ഷയൊരുക്കാന്‍ ശാസ്ത്രജ്ഞര്‍ക്ക് അധികാരം നല്‍കി. നിങ്ങളുടെ കാവല്‍ക്കാരന്‍ എല്ലാവരേയും സംരക്ഷിക്കുമെന്നും മോദി പറഞ്ഞു. ഇടതുമുന്നണി സര്‍ക്കാരിനെതിരെ ഗുരുതര ആരോപണങ്ങളാണ് അദ്ദേഹം ഉന്നയിച്ചത്. മുഖ്യമന്ത്രി പിണറായി വിജയനും മന്ത്രിമാരും അടക്കം അഴിമതിക്കാരാണ്. ദുരിതാശ്വാസത്തിനായി നല്‍കിയ പണത്തെപ്പോലും വെറുതെ വിട്ടില്ല. പ്രളയമുണ്ടായത് സംസ്ഥാന സര്‍ക്കാരിന്റെ കെടുകാര്യസ്ഥ മൂലമാണെന്ന് റിപ്പോര്‍ട്ട് വന്നിരിക്കുന്നു. കാര്യക്ഷമതയില്ലാത്ത ഈ സര്‍ക്കാരിന് തുടരാന്‍ അവകാശമില്ലെന്നും പ്രധാനമന്ത്രി പറഞ്ഞു. ദൈവത്തിന്റെ പേര് പറഞ്ഞാല്‍ കേരളത്തില്‍ അറസ്റ്റെന്നും മോദി ആവര്‍ത്തിച്ചു. ഈശ്വരന്റെ പേര് പറയുന്നവരെ കള്ളക്കേസില്‍ കുടുക്കുകയാണ്. വിശ്വാസ പാരമ്പര്യത്തെ രാഷ്ട്രീയത്തിന്റെ പേരില്‍ നശിപ്പിക്കാന്‍ അനുവദിക്കില്ല. വിശ്വാസപ്രമാണങ്ങള്‍ക്ക് ഭരണഘടനാപരമായ സംരക്ഷണം അധികാരത്തില്‍ എത്തിയാല്‍ നടപ്പാക്കും.
തിരുവനന്തപുരം, ആറ്റിങ്ങല്‍, കൊല്ലം മണ്ഡലങ്ങളിലെ പ്രവര്‍ത്തകരാണ് മോദിയുടെ വിജയ സങ്കല്‍പ് റാലിയില്‍ പങ്കെടുക്കുന്നത്. സ്ഥാനാര്‍ത്ഥികളായ കുമ്മനം രാജശേഖരന്‍, ശോഭാ സുരേന്ദ്രന്‍ തുടങ്ങിയവര്‍ റാലിയില്‍ പങ്കെടുക്കുന്നുണ്ട്. ബി.ജെ.പി സംസ്ഥാന അദ്ധ്യക്ഷന്‍ പി.എസ്.ശ്രീധരന്‍ പിള്ള, എം.പിമാരായ വി.മുരളീധരന്‍, റിച്ചാര്‍ഡ് ഹെ, മുന്‍ ഡി.ജി.പി ടി.പി. സെന്‍കുമാര്‍, മുന്‍ അംബാസിഡര്‍ ടി.പി. ശ്രീനിവാസന്‍, ക്രിക്കറ്റ് താരം ശ്രീശാന്ത്, ടോം വടക്കന്‍ തുടങ്ങിയവരും പ്രചാരണയോഗത്തില്‍ പങ്കെടുത്തു.
ആന്ധ്രാപ്രദേശിലെ തിരഞ്ഞെടുപ്പ് റാലിക്ക് ശേഷം പ്രത്യേക വിമാനത്തിലാണ് മോദി തിരുവനന്തപുരത്ത് എത്തിച്ചേര്‍ന്നത്. ശ്രീപദ്മനാഭന്റെ മണ്ണില്‍ അണികളില്‍ ആവേശം പകരുന്ന പ്രസംഗമാണ് പ്രധാനമന്ത്രി കാഴ്ചവച്ചത്.
Discussion about this post