തിരുവനന്തപുരം: ജുഡീഷ്യറിയുടെ തീരുമാനങ്ങള്‍ നടപ്പാക്കുന്ന എക്സിക്യൂട്ടീവാണ് കേരളത്തിലുള്ളതെന്ന് മുഖ്യമന്ത്രി പിണറായി വിജയന്‍ പറഞ്ഞു. ഇങ്ങനെ ചെയ്യുമ്പോള്‍ എക്സിക്യൂട്ടീവിനെതിരെ സ്ഥാപിത ശക്തികളുടെ ആക്രമണമുണ്ടായെന്ന് വരാം. അത്തരം സാഹചര്യത്തില്‍ എക്സിക്യൂട്ടീവിന്റെ സംരക്ഷണത്തിന് ജുഡീഷ്യറി ഉണ്ടാവേണ്ടതുണ്ടെന്ന് അദ്ദേഹം പറഞ്ഞു. തിരുവനന്തപുരം കോബാങ്ക് ടവറില്‍ നടന്ന ലീഗല്‍ റിഫ്രഷര്‍ കോഴ്സ് സംസ്ഥാനതല ഉദ്ഘാടനം നിര്‍വഹിക്കുകയായിരുന്നു അദ്ദേഹം.
നിയമങ്ങള്‍ വന്‍ തോതില്‍ അനുകൂലമാക്കാനും അഭിഭാഷകരെ തങ്ങളുടെ സേവകരാക്കി കൂടെ നിര്‍ത്താനും കോര്‍പറേറ്റുകള്‍ ഒരു പരിധി വരെ വിജയിച്ചിട്ടുണ്ട്. നിയമങ്ങള്‍ വ്യാഖ്യാനിക്കുമ്പോള്‍ അവ സമൂഹത്തില്‍ സൃഷ്ടിക്കാവുന്ന പ്രത്യാഘാതം അഭിഭാഷകര്‍ പരിശോധിക്കണം. മാനുഷിക, സാമൂഹ്യ മൂല്യങ്ങള്‍ക്ക് മുന്‍തൂക്കം നല്‍കുമ്പോള്‍ അവ സമൂഹത്തിനുതകുന്നതാകും. നീതിന്യായ മേഖലയില്‍ പ്രവര്‍ത്തിക്കുന്നവരില്‍ നിന്ന് സാമൂഹ്യ ജാഗ്രതയുണ്ടായാല്‍ നിയമത്തിലെ പഴുതുകള്‍ ഉപയോഗപ്പെടുത്തിയുള്ള ദുരുപയോഗം തടയാനാവും. നിയമത്തെ സാമൂഹ്യ പരിഷ്‌കരണ ഉപകരണമാക്കാന്‍ അഭിഭാഷകര്‍ക്ക് കഴിയണം. നിയമത്തിന്റെ ഉള്ളടക്കം വിമര്‍ശനാത്മകമായി പരിശോധിക്കാനും സാധിക്കണം. നിയമവ്യവസ്ഥയുടെ അടിസ്ഥാന പ്രശ്നം മനസിലാക്കാനും പരിഹരിക്കാനും സാധിക്കണമെങ്കില്‍ ശക്തമായ വൈജ്ഞാനിക അടിത്തറയുണ്ടാവണം. നിയമവിദ്യാഭ്യാസത്തില്‍ ആവശ്യമായ മാറ്റം വരുത്തുകയാണ് ഇതിനുള്ള മാര്‍ഗം. അഭിഭാഷകരുടെ തുടര്‍വിദ്യാഭ്യാസവും പ്രധാനമാണ്. നിയമം നിലനില്‍ക്കുന്നതും ശക്തിപ്പെടുന്നതും അവയ്ക്ക് ജനങ്ങളില്‍ സ്വീകാര്യത വര്‍ദ്ധിക്കുമ്പോഴാണെന്ന് മുഖ്യമന്ത്രി പറഞ്ഞു.
അഡ്വ. ഇ. ഷാനവാസ് ഖാന്‍ അധ്യക്ഷത വഹിച്ചു. അഭിഭാഷകര്‍, നിയമ അധ്യാപകര്‍, വിദ്യാര്‍ത്ഥികള്‍ എന്നിവര്‍ പങ്കെടുത്തു.
