മുംബൈ: പത്രപ്രവര്‍ത്തകന്‍ ജെ.ഡേയ്‌ക്കു നേരെ നിറയൊഴിച്ച സതീഷ്‌ കാലിയ എന്ന രോഹിത്‌ തങ്കപ്പന്‍ ജോസഫ്‌ തിരുവനന്തപുരം പൂവാര്‍ സ്വദേശിയാണെന്നു മുംബൈ പൊലീസ്‌. എന്നാല്‍ കേരള പൊലീസ്‌ അധികൃതര്‍ക്ക്‌ ഇക്കാര്യത്തില്‍ അറിയിപ്പൊന്നും ലഭിച്ചിട്ടില്ല. കേരളത്തിലായിരിക്കുമ്പോഴാണ്‌ ജെ. ഡേയെ വധിക്കാനുള്ള നിര്‍ദേശം ഛോട്ടാ രാജന്‍ നല്‍കിയത്‌. ഉടന്‍ എത്താനായിരുന്നു ആവശ്യപ്പെട്ടത്‌. ഖാര്‍ ഖോളിബറില്‍ ചേരിപ്രദേശത്താണു സതീഷ്‌ നേരത്തെ താമസിച്ചിരുന്നത്‌. മൂന്നുകൊലപാതക കേസുകളും ഒരു കൊലപാതകശ്രമ കേസും ഉള്‍പ്പെടെ പത്തു കേസുകളാണ്‌ ഇയാള്‍ക്കെതിരെയുള്ളത്‌. ഛോട്ടാ രാജന്‍ സംഘാംഗമായ ഇയാള്‍ 98ല്‍ ഖാറില്‍ ബാര്‍ ഉടമയെ ആക്രമിച്ച സംഭവത്തോടെയാണ്‌ അധോലോകത്ത്‌ സജീവമായത്‌. അതേവര്‍ഷം മോഹന്‍ മൊഹിതയെന്നയാളെ കൊലപ്പെടുത്തി. 2004ല്‍ ഖാര്‍ ഈസ്‌റ്റില്‍ എന്‍സിപി പ്രവര്‍ത്തകനായ മഹേഷ്‌ ദേവഗഡിയെ വധിച്ചു. ഛോട്ടാ രാജന്റെ നിര്‍ദേശപ്രകാരമായിരുന്നു ഇതും. പിന്നീട്‌ അധോലോക നേതാവ്‌ ദാവൂദുമായി ബന്ധമുണ്ടെന്നു സംശയിക്കുന്ന അശോക്‌ ഷെട്ടിയെയും വധിച്ചത്‌ സതീഷ്‌ ആണ്‌. വ്യാജ പാസ്‌പോര്‍ട്ട്‌ കേസിലും ഇയാള്‍ പ്രതിയാണ്‌.
ജെ. ഡേയെ കൊലപ്പെടുത്താന്‍ അഞ്ചുലക്ഷം രൂപയായിരുന്നത്രെ പ്രതിഫലം. കൂട്ടാളികളെ സംഘടിപ്പിച്ചതും സതീഷായിരുന്നു. എന്നാല്‍ കരാര്‍ ഏറ്റെടുക്കുമ്പോള്‍ ജെ. ഡേയെക്കുറിച്ചു സതീഷിനും സംഘത്തിനും കൂടുതലൊന്നും അറിയില്ലായിരുന്നു. അധോലോക പകപോക്കലിന്റെ ഭാഗമായി ഒരാളെ കൊല്ലുന്നു എന്നായിരുന്നു സംഘത്തിന്റെ നിഗമനം. മികച്ച ഒരു ഷാര്‍പ്പ്‌ ഷൂട്ടറാണ്‌ സതീഷെന്ന്‌്‌ പോലീസ്‌ പറയുന്നു. അതേസമയം പത്രപ്രവര്‍ത്തകനെയാണു വധിച്ചതെന്നു പിന്നീടു വാര്‍ത്തകളില്‍ നിന്നു മനസിലായപ്പോള്‍ പശ്‌ചാത്താപം തോന്നിയെന്നും അതിനാലാണു തീര്‍ഥാടനത്തിനു പോയതെന്നും ഇയാള്‍ പൊലീസിനോടു പറഞ്ഞത്രെ. രാമേശ്വരത്തുനിന്നാണു ക്രൈം ബ്രാഞ്ച്‌ സതീഷ്‌ കാലിയയെ അറസ്‌റ്റുചെയ്‌തത്‌.
ജെ.ഡേയ്‌ക്കുനേരെ നിറയൊഴിച്ചത്‌ മലയാളി
പുതിയ വാർത്തകൾ
Discussion about this post