സംസ്ഥാന സഹകരണ ബാങ്കിന് സര്‍വകാല നേട്ടം

തിരുവനന്തപുരം: 104 വര്‍ഷത്തെ പ്രവര്‍ത്തന കാലയളവില്‍ സംസ്ഥാന സഹകരണബാങ്കിന് ചരിത്രനേട്ടം. ബാങ്കിന്റെ ബിസിനസ് ടേണ്‍ഓവര്‍ 15,432 കോടി രൂപയിലെത്തിയതായി സഹകരണമന്ത്രി കടകംപള്ളി സുരേന്ദ്രന്‍ വാര്‍ത്താസമ്മേളനത്തില്‍ പറഞ്ഞു. 281.91 കോടി രൂപ പ്രവര്‍ത്തന ലാഭം നേടാനായി. ഇത് സര്‍വകാല റെക്കാര്‍ഡാണ്. 2001-06 കാലത്തെ ബാങ്ക് ഭരണസമിതി അനുവദിച്ച ക്രമരഹിതവും അഴിമതി നിറഞ്ഞതുമായ വായ്പകളെ തുടര്‍ന്ന് അറ്റനഷ്ടത്തിലായ ബാങ്ക് സമ്പൂര്‍ണ്ണമായും സഞ്ചിതനഷ്ടം നികത്തി അറ്റലാഭം നേടുന്നത് ഇപ്പോഴാണ്.

ബാങ്കിന്റെ അറ്റലാഭം 72.39 കോടി രൂപയാണ്. ബാങ്കിന്റെ നിഷ്‌ക്രിയ ആസ്തി (ഗ്രോസ് എന്‍.പി.എ) 3.16 ശതമാനമായി കുറഞ്ഞു. അറ്റനിഷ്‌ക്രിയ ആസ്തി (നെറ്റ് എന്‍.പി.എ) വെറും 1.43 ശതമാനമാണ്. നിരവധി ഷെഡ്യൂള്‍ഡ് നാഷണലൈസ്ഡ് വാണിജ്യബാങ്കുകള്‍ അറ്റനഷ്ടത്തിലേക്കും ക്രമാതീതമായ നിഷ്‌ക്രിയ ആസ്തിയിലേക്കും വഴി മാറുമ്പോഴാണ് സംസ്ഥാന സഹകരണബാങ്കിന് ഈ നേട്ടം കൈവരിക്കാനായത്. സഞ്ചിതനഷ്ടം സമ്പൂര്‍ണ്ണമായും നികത്താനായതിലൂടെ ഇന്ത്യയിലെ തന്നെ ഏറ്റവും ഉയര്‍ന്ന ലാഭക്ഷമതയും മൂലധന പര്യാപ്തതയുമുള്ള സംസ്ഥാന സഹകരണ ബാങ്കായി കേരള സംസ്ഥാന സഹകരണബാങ്ക് മാറി. 2018-19 സാമ്പത്തിക വര്‍ഷം രാജ്യത്തെ സംസ്ഥാന സഹകരണബാങ്കുകളുടെ ശരാശരി ലാഭം 31 കോടി രൂപ മാത്രമാണ്. റിസര്‍വ്ബാങ്ക് മാനദണ്ഡമനുസരിച്ച് ഒന്‍പത് ശതമാനം മൂലധനപര്യാപ്തതയാണ് സംസ്ഥാന സഹകരണബാങ്കിന് വേണ്ടതെങ്കില്‍ നിലവില്‍ സംസ്ഥാന സഹകരണബാങ്കിന്റെ മൂലധനപര്യാപ്തത 22.54 ശതമാനമാണ്

കഴിഞ്ഞ മൂന്നു വര്‍ഷം കൊണ്ട് നിക്ഷേപം 8945 കോടി ആയി. 2016 ല്‍ ഇത് 6112 കോടി ആയിരുന്നു. 2016 ല്‍ 3412 കോടി രൂപ വായ്പ നല്‍കിയ സ്ഥാനത്ത് ഇപ്പോള്‍ 6487 കോടി രൂപ നല്‍കി. എല്ലാവിധ ആധുനിക ബാങ്കിംഗ് സേവനങ്ങളും നടപ്പാക്കിയതായും മന്ത്രി പറഞ്ഞു.
സഹകരണ ബാങ്ക് എം.ഡി. റാണി ജോര്‍ജ്, സഹകരണ സെക്രട്ടറി മിനി ആന്റണി, സഹകരണ സംഘം രജിസ്ട്രാര്‍ എസ്. ഷാനവാസ് എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.