തിരുവനന്തപുരം: കാസര്കോട് മുതല് തിരുവനന്തപുരം വരെയുള്ള ദേശീയപാത 66ന്റെ വികസനത്തിന്റെ ഭാഗമായി ഭൂമി ഏറ്റെടുക്കലിന് ആവശ്യമായ 5200 കോടി കിഫ്ബിയില്നിന്ന് നല്കുമെന്ന് ധനമന്ത്രി ഡോ.ടി.എം.തോമസ് ഐസക് പറഞ്ഞു. ഇതോടെ ദേശീയപാത സ്ഥലമേറ്റെടുപ്പ് സംബന്ധിച്ച എല്ലാ ആശങ്കകളും അവസാനിച്ചതായി അദ്ദേഹം വാര്ത്താസമ്മേളനത്തില് പറഞ്ഞു.
ഈ തുക ഇതിനോടകം ഭൂമി ഏറ്റെടുക്കുന്നതിനായി കിഫ്ബി അനുവദിച്ച തുകയില്നിന്ന് കണ്ടെത്തും. വിവിധ വകുപ്പുകളില് 588 പദ്ധതികളിലായി ആകെ 45,380.37 കോടി രൂപയുടെ അംഗീകാരം കിഫ്ബി നല്കിയതായും മന്ത്രി പറഞ്ഞു. ഇതില് 31,105.20 കോടി പദ്ധതികള്ക്കും കൂടാതെ വ്യവസായപാര്ക്കുകള് ഉള്പ്പെടെയുള്ള പദ്ധതികള്ക്ക് സ്ഥലം ഏറ്റെടുക്കുന്നതിന് 14,275.17 കോടി രൂപയും അനുവദിച്ചിട്ടുണ്ട്.
19, 20 തീയതികളിലായി നടന്ന കിഫ്ബി എക്സിക്യൂട്ടീവ് കമ്മിറ്റിയും ജനറല് ബോഡിയും അംഗീകരിച്ച പദ്ധതികളുള്പ്പെടെയാണിത്. 20ന് നടന്ന കിഫ്ബി ബോര്ഡ് യോഗം നാല് പ്രോജക്റ്റുകള്ക്കും ഒരു സബ് പ്രോജക്റ്റിനുമായി 541.87 കോടി രൂപയ്ക്കും 19ന് നടന്ന എക്സിക്യൂട്ടീവ് കമ്മിറ്റി യോഗം 32 പ്രോജക്റ്റുകള്ക്കും ഒരു സബ് പ്രോജക്റ്റിനുമായി 1203.63 കോടി രൂപയ്ക്കും അംഗീകാരം നല്കിയിരുന്നു.
കണ്ണൂര് ടൗണ് സൗത്ത് ബസാര് ജംങ്ഷന് ഫ്ളൈ ഓവര് പദ്ധതി (130.87 കോടി രൂപ), വട്ടിയൂര്ക്കാവ് ജങ്ഷന് വികസനപദ്ധതി ഭൂമി ഏറ്റെടുക്കല് (95 കോടി രൂപ) കോഴിക്കോട് ജില്ലയിലെ അരയിടത്തുപാലം കാരന്തൂര് റോഡ് (205 കോടി). മാവേലിക്കര താലൂക്ക് ആശുപത്രി (102.80 കോടി രൂപ) തുടങ്ങിയവ കിഫ്ബി ബോര്ഡ് മീറ്റിംഗ് അംഗീകാരം ലഭിച്ച പദ്ധതികളില് ഉള്പ്പെടുന്നു.
Discussion about this post