തിരുവനന്തപുരം: വാഹനാപകടത്തില് പരുക്കേറ്റ നടന് സന്തോഷ് കെ.നായര്(65) അന്തരിച്ചു. പത്തനംതിട്ട ഏനാത്തു വച്ച് ഇന്ന് പുലര്ച്ചെ 6.30ഓടെയായിരുന്നു അപകടം. ചികിത്സയിലിരിക്കെ സന്തോഷിനു ഹൃദയാഘാതം സംഭവിക്കുകയായിരുന്നു. സന്തോഷ് കെ.നായര് സഞ്ചരിച്ച കാര് ലോറിയുമായി കൂട്ടിയിടിക്കുകയായിരുന്നു. അപകടത്തില് സന്തോഷിന്റെ ഒപ്പമുണ്ടായിരുന്ന തിരുവനന്തപുരം സ്വദേശിനിക്കും പരുക്കേറ്റിരുന്നു. ലോറി ഡ്രൈവര്ക്കും പരുക്കുണ്ട്.
ചേങ്കോട്ടുകോണം ശ്രീരാമദാസ ആശ്രമബന്ധുവായിരുന്ന അദ്ദേഹം ജഗദ്ഗുരു സ്വാമി സത്യാനന്ദ സരസ്വതി തൃപ്പാദങ്ങളുമായി അടുത്ത ബന്ധം പുലര്ത്തിയിരുന്നു.
1982ല് പുറത്തിറങ്ങിയ ‘ഇതു ഞങ്ങളുടെ കഥ’ എന്ന ചിത്രത്തിലൂടെയാണ് സന്തോഷ് സിനിമാരംഗത്തേക്ക് എത്തിയത്. പ്രദര്ശനം തുടരുന്ന ‘മോഹിനിയാട്ടം’ ആണ് ഏറ്റവും അവസാനമായി അഭിനയിച്ച ചിത്രം. വില്ലന്, നായകന്, സഹനടന്, ഹാസ്യനടന് എന്നിങ്ങനെ വൈവിധ്യമാര്ന്ന വേഷങ്ങളില് നൂറിലധികം ചിത്രങ്ങളില് അഭിനയിച്ചിട്ടുണ്ട്. 1960 നവംബര് 12ന് തിരുവനന്തപുരത്ത് സി.എന്. കേശവന് നായരുടെയും പി. രാജലക്ഷ്മി അമ്മയുടെയും മകനായാണ് ജനനം. എംജി കോളജില് നടന് മോഹന്ലാലിന്റെ ജൂനിയറായിരുന്നു.
ഭാര്യ: ശുഭശ്രീ(റിട്ട.അധ്യാപിക, ശ്രീകൃഷ്ണ സ്കൂള്, ഗുരുവായൂര്), മകള്: ഡോ.രാജശ്രീ, മരുമകന്: അക്ഷിദ് മേനോന്. സംസ്കാരം ബുധനാഴ്ച ഒന്നിന് പാറമേക്കാവ് ശാന്തിതീരം ശ്മശാനത്തില് നടക്കും.
നടന് സന്തോഷ്.കെ.നായരുടെ വിയോഗത്തില് ശ്രീരാമദാസമിഷന് അധ്യക്ഷന് ശ്രീശക്തി ശാന്താനന്ദ മഹര്ഷി അനുശോചിച്ചു. ആശ്രമ ബന്ധുവും തികഞ്ഞ ഹിന്ദുത്വാഭിമാനിയും ഭക്തനും ശുദ്ധ ഹൃദയനുമായിരുന്ന അദ്ദേഹത്തിന് ആദരാഞ്ജലി അര്പ്പിക്കുന്നതായും അനുശോചന സന്ദേശത്തില് പറഞ്ഞു.
