തിരുവനന്തപുരം: കേന്ദ്ര വിദേശകാര്യ മന്ത്രാലയത്തിന്റെ നേത്യത്വത്തില് നടത്തിവരുന്ന ഇന്ത്യയെ അറിയുക (Know India Programme) പരിപാടിയുടെ ഭാഗമായി കേരളത്തിലെത്തിയ ഇന്ത്യന്വംശജരുടെ യുവസംഘം രാജ്ഭവനില് ഗവര്ണര് ആരിഫ് മുഹമ്മദ് ഖാനെ സന്ദര്ശിച്ചു. കേരളത്തിന്റെ ഉയര്ന്ന സാക്ഷരതാ നിരക്ക്, വിദേശശബന്ധം, സാമൂഹിക സാംസ്കാരിക, ആരോഗ്യ രംഗങ്ങളിലെ മുന്നേറ്റങ്ങളെ സംബന്ധിച്ച് സംഘം ഗവര്ണറുമായി സംവദിച്ചു. തങ്ങളുടെ പൂര്വികരെ സംബന്ധിച്ച് അറിയാന് എല്ലാ മനുഷ്യര്ക്കും ആഗ്രഹമുണ്ടാകുമെന്ന് ഗവര്ണര് പറഞ്ഞു. നോ ഇന്ത്യ പരിപാടിയിലൂടെ പൂര്വികരെയും നാടിനെയും കുറിച്ചറിയാന് ശ്രമിക്കുന്ന യുവാക്കളെ അദ്ദേഹം അഭിനന്ദിച്ചു.
നൂറ്റാണ്ടുകള് മുമ്പുള്ള കേരളത്തിന്റെ വൈദേശിക ബന്ധമാണ് സാക്ഷരതയില് മുന്നേറാന് കേരളത്തെ സഹായിച്ചതെന്ന് സന്ദര്ശകരുടെ ചോദ്യത്തിന് മറുപടിയായി ഗവര്ണര് പറഞ്ഞു. സാമൂഹിക, സാമ്പത്തിക മേഖലയില് ഇന്നത്തെ മുന്നേറ്റത്തിനും വിദേശബന്ധം സഹായിക്കുന്നുണ്ട്. അറിവും വൈവിധ്യവുമാണ് മറ്റു രാജ്യങ്ങളില് നിന്ന് ഇന്ത്യയെ വ്യത്യസ്തമാക്കുന്നതെന്നും അദ്ദേഹം പറഞ്ഞു. ആനയെ ജീവിതത്തിലാദ്യമായി കണ്ട അനുഭവവും സംഘാംഗങ്ങളില് ചിലര് ഗവര്ണറുമായി പങ്കുവെച്ചു. നോ ഇന്ത്യ പരിപാടിയുടെ 56-ാം പതിപ്പാണിത്. ലോകത്തിന്റെ വിവിധ ഭാഗങ്ങളില് പ്രവാസജീവിതം നയിച്ചുവരുന്ന ഇന്ത്യക്കാരുടെ മൂന്നാം തലമുറയ്ക്ക് മാതൃരാജ്യവുമായുള്ള ബന്ധം നിലനിര്ത്തുന്നതിനും കല, പൈതൃകം, സംസ്കാരം എന്നിവ അടുത്തറിയുന്നതിനും വ്യവസായം, വിദ്യാഭ്യാസം, ശാസ്ത്രം തുടങ്ങിയ മേഖലകളിലെ പുരോഗതി അറിയുന്നതിനുമാണ് പരിപാടി സംഘടിപ്പിച്ചിരിക്കുന്നത്.
ഒന്പത് രാജ്യങ്ങളില് നിന്നായി 40 അംഗ സംഘമാണ് പരിപാടിയുടെ ഭാഗമായി കേരളത്തിലെത്തിയത്. ഫിജി, ഗയാന, ഇസ്രയേല്, മ്യാന്മര്, സൗത്ത് ആഫ്രിക്ക, സൂരീനാം, ട്രിനിടാഡ് & ടൊബാഗോ, മൗറീഷ്യസ്, മലേഷ്യ എന്നീ രാജ്യങ്ങളില് നിന്നുള്ള വിദ്യാര്ഥികളും യുവ പ്രൊഫഷണലുകളുമാണിവര്. കേരളത്തില് മുസിരീസ് കോട്ട, കേരള കലാമണ്ഡലം, കോയിക്കല് കൊട്ടാരം, കയര് വില്ലേജ്, ബാലരാമപുരം കൈത്തറി നെയ്ത്ത് വില്ലേജ്, വിതുര ജഴ്സി ഫാം, വി. എസ്. എസ്. സി തുടങ്ങിയ സ്ഥാപനങ്ങളാണ് സന്ദര്ശിക്കുന്നത്. ഒക്ടോബര് 15 വരെയാണ് പരിപാടി സംഘടിപ്പിച്ചിരിക്കുന്നത്.
ഗവര്ണറുടെ പ്രിന്സിപ്പല് സെക്രട്ടറി ഡോ. ദേവേന്ദ്രകുമാര് ദോദാവത്ത്, കേന്ദ്രവിദേശകാര്യ മന്ത്രാലയത്തിലെ കണ്സള്ട്ടന്റ് സുനില് അഗ്നിഹോത്രി, നോര്ക്ക വകുപ്പിലെയും നോര്ക്ക റൂട്ട്സിലെയും ഉദ്യോഗസ്ഥര് തുടങ്ങിയവര് സംബന്ധിച്ചു.
