പാലക്കാട്: പട്ടാമ്പിയില്‍ ഒരു കോവിഡ് പോസിറ്റീവ് കേസ് തിരിച്ചറിഞ്ഞതിനെ തുടര്‍ന്നുണ്ടായ രോഗബാധിതരെയെല്ലാം ഫസ്റ്റ്ലൈന്‍ ട്രീറ്റ്‌മെന്റ് സെന്ററുകളില്‍ എത്തിക്കാനുള്ള നടപടി സ്വീകരിക്കുമെന്നും സംശയമുള്ള സ്ഥലങ്ങളിലെല്ലാം റാപ്പിഡ് പരിശോധന നടത്തുന്നതിനുള്ള നടപടികള്‍ സ്വീകരിച്ചു കഴിഞ്ഞതായും മന്ത്രി എ.കെ ബാലന്‍ അറിയിച്ചു.
ജനങ്ങള്‍ പരിഭ്രാന്തരാവേണ്ടതില്ല. സ്ഥിതി ഗുരുതരമാണെന്നുള്ളത് ശ്രദ്ധയില്‍പെട്ടിട്ടുണ്ട്. അതുകൊണ്ട് തന്നെ ജനങ്ങള്‍ അതീവജാഗ്രത പാലിക്കാനും മന്ത്രി മുന്നറിയിപ്പ് നല്‍കി.
പട്ടാമ്പിയുടെ അനുഭവത്തിന്റെ അടിസ്ഥാനത്തില്‍ നിയന്ത്രണം കൂടുതല്‍ ശക്തമാക്കണം. മത്സ്യമാര്‍ക്കറ്റിലെ ഒരു കേസാണ് വ്യാപനത്തിന് ഇടയാക്കിയതെന്നാണ് മനസിലാക്കാന്‍ സാധിച്ചത്. അതുകൊണ്ട് മത്സ്യമാര്‍ക്കറ്റുകള്‍ ഉള്‍പ്പെടെയുള്ള ജില്ലയിലെ പ്രധാനപ്പെട്ട ഇരുപതോളം കേന്ദ്രങ്ങളില്‍ അടിയന്തരമായി റാപ്പിഡ് ടെസ്റ്റ് നടത്താനുള്ള സംവിധാനമൊരുക്കും. മുന്‍പ് പാലിച്ച നിബന്ധനകളും നിര്‍ദ്ദേശങ്ങളും പൊതുജനങ്ങള്‍ അക്ഷരംപ്രതി പാലിക്കുക. രോഗം വ്യാപിക്കാതിരിക്കാന്‍ ശ്രദ്ധ പുലര്‍ത്തുക. സംശയമുള്ള സ്ഥലങ്ങളിലെല്ലാം റാപിഡ് ടെസ്റ്റ് നടത്തും. രണ്ട് ദിവസത്തിനുള്ളില്‍ തന്നെ ടെസ്റ്റ് പൂര്‍ത്തിയാക്കുമെന്നും മന്ത്രി അറിയിച്ചു.
പട്ടാമ്പിയില്‍ തന്നെ ഫസ്റ്റ് ലൈന്‍ ട്രീറ്റ്‌മെന്റ് സെന്ററിനുള്ള സൗകര്യം ഉണ്ടോയെന്ന് പരിശോധിക്കും. ഇല്ലെങ്കില്‍ ജില്ലയിലെ മറ്റ് ഫസ്റ്റ് ലൈന്‍ ട്രീറ്റ്‌മെന്റ് സെന്ററുകളില്‍ രോഗബാധിതരെ പ്രവേശിപ്പിക്കാന്‍ സൗകര്യങ്ങള്‍ ഒരുക്കുമെന്നും മന്ത്രി അറിയിച്ചിട്ടുണ്ട്.
Discussion about this post