പറവൂര്: ജ്യോതിഷാചാര്യനും തന്ത്രശാസ്ത്രവിശാരദനുമായ പറവൂര് ശ്രീധരന് തന്ത്രി (86) അന്തരിച്ചു. കൊച്ചിയിലെ സ്വകാര്യ ആശുപത്രിയില് വ്യാഴാഴ്ച ഉച്ചയ്ക്ക് 12.19 നായിരുന്നു അന്ത്യം. കഴിഞ്ഞ ഏതാനും ദിവസമായി ശാരീരികക്ഷീണത്തെ തുടര്ന്ന് അദ്ദേഹം പറവൂര് കെ.എം.കെ. ജങ്ഷനിലെ കളവമ്പാറ വീട്ടില് വിശ്രമത്തിലായിരുന്നു. തിങ്കളാഴ്ച രാവിലെ കടുത്ത ശ്വാസതടസ്സവും അസ്വാസ്ഥ്യവും അനുഭവപ്പെട്ടതോടെ കൊച്ചിയിലെ ആശുപത്രിയിലേക്ക് മാറ്റുകയായിരുന്നു.
ശ്രീനാരായണ ദര്ശനങ്ങളുടെ പ്രചാരണത്തിനു വേണ്ടി പ്രയത്നിച്ച പറവൂര് ശ്രീധരന് തന്ത്രി മുന്നൂറോളം ക്ഷേത്രങ്ങളില് പ്രതിഷ്ഠ നടത്തി. ഇരുനൂറോളം ക്ഷേത്രങ്ങളിലെ തന്ത്രിയുമായിരുന്നു. പറവൂര് ശ്രീനാരായണ താന്ത്രിക ഗവേഷണ വിദ്യാപീഠം സ്ഥാപകനാണ്. ശബരിമല, ഗുരുവായൂര്, ഏറ്റുമാനൂര്, വൈക്കം, ചോറ്റാനിക്കര, കൊടുങ്ങല്ലൂര് തുടങ്ങിയ മഹാക്ഷേത്രങ്ങളില് നടന്നിട്ടുള്ള അഷ്ടമംഗലപ്രശ്നവേദികളില് സക്രിയ സാന്നിധ്യമായിരുന്നു. കര്മംകൊണ്ട് ബ്രാഹ്മണ്യം നേടാമെന്നതിന്റെ പ്രഖ്യാപനമായ പാലിയം വിളംബരത്തിലെ പ്രധാനികളിലൊരാളായിരുന്നു. ഈഴവസമുദായത്തില്നിന്ന് ആദ്യമായി സഹസ്രകലശം നടത്തിയ പുരോഹിതന് ശ്രീധരന് തന്ത്രിയാണ്.
മാതാ അമൃതാനന്ദമയി മഠത്തിന്റെ അമൃതകീര്ത്തി പുരസ്കാരം, പാവക്കുളത്തമ്മ പുരസ്കാരം, സ്വാമി മൃഡാനന്ദജി സ്മാരക ആധ്യാത്മിക പുരസ്കാരം എന്നിവ ഉള്പ്പെടെ ഒട്ടേറെ പുരസ്കാരങ്ങള് ലഭിച്ചിട്ടുണ്ട്. ദേവയജനപദ്ധതി, പിതൃകര്മവിധി, ഗുരുശിഷ്യ സംവാദം എന്നീ ഗ്രന്ഥങ്ങളുടെ കര്ത്താവാണ്.
1925 ഒക്ടോബര് 9ന് പുണര്തം നക്ഷത്രത്തില് പെരുമ്പടന്ന കളവമ്പാറ മാമന് വൈദ്യരുടെയും എടവനക്കാട് കായന്ത്ര പാര്വതിയുടെയും മൂന്നാമത്തെ മകനായാണ് കെ.എം. ശ്രീധരന്തന്ത്രി ജനിച്ചത്. കെടാമംഗലം എല്.പി. സ്കൂളിലും പറവൂര് ഗവ. ബോയ്സ് സ്കൂളിലുമായിരുന്നു പ്രാഥമിക വിദ്യാഭ്യാസം. നമ്പ്യാത്ത് കരുണാകരപിള്ള, പെരുവാരം ശങ്കരന്ഭട്ടതിരിപ്പാട്, പാഴൂര് പടിപ്പുര, വരിക്കോലി കൃഷ്ണന് ജ്യോത്സ്യന് എന്നിവരുടെയടുക്കല് ജ്യോതിഷപഠനം, ശ്രീനാരായണഗുരുദേവന്, ചട്ടമ്പിസ്വാമി എന്നിവരുമായി അടുത്ത സമ്പര്ക്കം പുലര്ത്തിയിരുന്ന അയ്യമ്പിള്ളി പഴമ്പിള്ളി കണ്ടച്ചനാശാന്റെ ശിക്ഷണത്തില് തന്ത്രശാസ്ത്രപഠനം എന്നിവ നടത്തി.ജ്യോതിഷത്തിലെന്നപോലെ ക്ഷേത്രപ്രതിഷ്ഠ, ലക്ഷാര്ച്ചന, കോടി അര്ച്ചന, സഹസ്രകലശം എന്നിവയിലും പ്രാവീണ്യമറിയിച്ചു.
2009ല് നടന്ന ശതാഭിഷേകച്ചടങ്ങുകളില് ഗുരുവായൂര് തന്ത്രി, അമ്പലപ്പുഴ തന്ത്രി, കൊല്ലൂര് മൂകാംബിക തന്ത്രി എന്നിവരുള്പ്പെടെ ഒട്ടേറെ പുരോഹിതശ്രേഷ്ഠര് സംബന്ധിച്ചു. ഭാര്യ: കൊടുങ്ങല്ലൂര് നാലുമാക്കല് സുബ്രഹ്മണ്യന് വൈദ്യരുടെ മകള് പരേതയായ എന്.എസ്. അമൃതവല്ലി (റിട്ട. അധ്യാപിക). മക്കള്: പറവൂര് ജ്യോതിസ് (ജ്യോതിഷസംസ്കൃത പണ്ഡിതന്), കെ.എസ്. ഗിരീഷ് (ടിഎന്പിഎല് ആന്ഡ് കെടിസി), പറവൂര് രാകേഷ് തന്ത്രി. മരുമക്കള്: രമ്യ (ഫിഷറീസ് വകുപ്പ് എറണാകുളം), വത്സല, പ്രീത. ശവസംസ്കാരം വെള്ളിയാഴ്ച ഒമ്പതിന് പറവൂര് കേസരി റോഡിലുള്ള ശ്രീനാരായണ താന്ത്രിക ഗവേഷണ വിദ്യാപീഠം വളപ്പില്.
