പൊന്മുടി: ബുറേവി ചുഴലിക്കാറ്റിന്റെ പശ്ചാത്തലത്തില് മുന്കരുതല് നടപടിയുടെ ഭാഗമായി പൊന്മുടിയില് നിന്ന് ആളുകളെ ഒഴിപ്പിച്ചു. ലയങ്ങളില് താമസിച്ചിരുന്ന 177 പേരെ ഇതിനോടകം മാറ്റിയതായി തിരുവനന്തപുരം ജില്ലാ ഭരണകൂടം അറിയിച്ചു. കെ.എസ്.ആര്.ടി.സി. ബസുകളില് ആനപ്പാറ ഹൈസ്കൂളില് ഉള്പ്പെടെയുളള ക്യാമ്പുകളിലേക്കാണ് ഇവരെ മാറ്റിയത്.
തഹസീല്ദാരുടെ നേതൃത്വത്തില് റവന്യൂസംഘമാണ് ഇവരെ മാറ്റിപാര്പ്പിച്ചത്. വിതുരയിലും ഇവര്ക്കായി ക്യാമ്പ് തുറന്നിട്ടുണ്ട്. തിരുവനന്തപുരം-കൊല്ലം ജില്ലകളുടെ അതിര്ത്തിയിലൂടെ അറബിക്കടലിലേക്ക് എത്തിച്ചേരുന്ന രീതിയിലാണ് കാറ്റിന്റെ പ്രതീക്ഷിക്കുന്ന സഞ്ചാരപഥമെന്ന് കാലാവസ്ഥാ കേന്ദ്രം മുന്നറിയിപ്പ് നല്കിയിരുന്നു. ഇതിന്റെ പശ്ചാത്തലത്തിലാണ് നടപടി. തിരുവനന്തപുരം ജില്ലയിലേക്ക് നിയോഗിച്ചിട്ടുള്ള എന്ഡിആര്എഫ് സംഘം അമ്പൂരിയില് എത്തി വിവിധ സ്ഥലങ്ങളില് പരിശോധന നടത്തി.
കൊല്ലം ജില്ലയിലെ കുളത്തുപ്പുഴ, തെന്മല, ആര്യങ്കാവ് ഭാഗങ്ങളില് ചുഴലിക്കാറ്റ് ബാധിക്കാന് സാധ്യതയുണ്ടെന്നും ഇവിടെ എല്ലാ സുരക്ഷാ നടപടികളും സ്വീകരിച്ചതായും കലക്ടര് ബി അബ്ദുല് നാസര് അറിയിച്ചു. മുന്കരുതലായി 35,000 ആളുകളെ മാറ്റി പാര്പ്പിക്കാനുള്ള നടപടികള് ആരംഭിച്ചു. ഇതിനായി 358 കേന്ദ്രങ്ങള് ഒരുക്കി. അപകടാവസ്ഥയില് കഴിയുന്ന 2391 പേരെ എത്രയും പെട്ടെന്ന് മാറ്റി പാര്പ്പിക്കാനുള്ള നടപടികള് ആരംഭിച്ചതായും കളക്ടര് വ്യക്തമാക്കി.
ചുഴലിക്കാറ്റ് പാമ്പന് കടന്ന് പടിഞ്ഞാറ് -തെക്കുപടിഞ്ഞാറ് സഞ്ചരിച്ച് രാത്രിയോടെയോ പുലര്ച്ചയോടെയോ തെക്കന് തമിഴ്നാട് തീരത്തു പ്രവേശിക്കുമെന്നാണ് കാലാവസ്ഥാകേന്ദ്രത്തിന്റെ മുന്നറിയിപ്പ്. കാറ്റിന്റെ പരമാവധി വേഗത മണിക്കൂറില് ഏകദേശം 70 മുതല് 80 കിമീ വരെയും ചില അവസരങ്ങളില് 90 കി.മീ. വരെയും ആയിരിക്കുമെന്നാണ് പ്രതീക്ഷിക്കുന്നതെന്നും കാലാവസ്ഥാകേന്ദ്രം വ്യക്തമാക്കുന്നു.
