തിരുവനന്തപുരം: വയനാട്ടിലെ പരിസ്ഥിതി ലോല മേഖല വിജ്ഞാപനം ഭേദഗതി ചെയ്യണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയന് പ്രധാനമന്ത്രിക്ക് കത്തയച്ചു. വയനാട് വന്യജീവി സങ്കേതത്തിന് ചുറ്റുമായി 118.59 ചതുരശ്ര കിലോമീറ്റര് സ്ഥലം പരിസ്ഥിതി ലോല മേഖലയാക്കുന്നതിനുള്ള കേന്ദ്രത്തിന്റെ കരട് വിജ്ഞാപനം ഭേദഗതി ചെയ്യണമെന്നാവശ്യപ്പെട്ടാണ് കത്തയച്ചത്.
പരിസ്ഥിതി ലോല മേഖലകള് വിജ്ഞാപനം ചെയ്യുമ്പോള് ജനങ്ങള് തിങ്ങിപ്പാര്ക്കുന്ന പ്രദേശങ്ങള് ഒഴിവാക്കണമെന്ന് സംസ്ഥാന സര്ക്കാര് ആവശ്യപ്പെട്ടു. തോല്പ്പെട്ടി, കാട്ടിക്കുളം, പനവല്ലി, കുറുക്കന്മൂല, ചാലിഗഡ, കാപ്പിസ്റ്റോര്, ചീയാമ്പം, മൂടക്കൊല്ലി, ചീരാല് എന്നീ പ്രദേശങ്ങള് ഒഴിവാക്കണമെന്നും ജീവിക്കാന് പ്രയാസപ്പെടുന്നവരാണ് ഈ മേഖലകളില് താമസിക്കുന്നതെന്ന കാര്യം കണക്കിലെടുത്ത് കരടു വിജ്ഞാപനത്തില് ആവശ്യമായ മാറ്റം വരുത്താന് വനം – പരിസ്ഥിതി മന്ത്രാലയത്തോട് നിര്ദേശിക്കണമെന്നും കത്തിലുണ്ട്.
സംസ്ഥാന സര്ക്കാര് 2020 ജനുവരിയില് സമര്പ്പിച്ച ഭേദഗതി ചെയ്ത ശിപാര്ശ പ്രകാരം 88.2 ചതുരശ്ര കിലോമീറ്ററാണ് പരിസ്ഥിതി ലോല മേഖലയായി വിജ്ഞാപനം ചെയ്യേണ്ടത്. എന്നാല് കേന്ദ്ര വനം- പരിസ്ഥിതി മന്ത്രാലയം 118.59 ചതുരശ്ര കിലോമീറ്ററാണ് ഉള്പ്പെടുത്തിയിരിക്കുന്നത്.
